IRC

Ég man þá tíð, er IRC (Internet Relay Chat) var fullt af lífi. Þá er ég að tala um íslensku rásirnar. Erlendar rásir eru flestar enn lifandi.

Ég kynntist IRC fyrst árið 1994. Ég hef reyndar aldrei endst þar lengi í einu en hef litið þar inn öðru hvoru gegn um tíðina. Nú virðist IRC (íslenskar rásir) hinsvegar vera orðið samansafn fólks í þagnarbindindi. Ég hef reyndar sjaldan básúnað mikið þar, en fylgst með umræðunum og tekið þátt, finnist mér umræðurnar áhugaverðar.

Ég hef prófað nokkrum sinnum í vetur að tengjast og verið tengdur í nokkra tíma í senn. Ég sé stóra breytingu á. Nú er fólk ekki lengur að spjalla á opnum rásum. Líklega er allt spjall bara prívat spjall, milli tveggja einstaklinga.

Ég prófaði að tengjast fyrir ca 2 tímum og opnaði 8 spjallrásir. Á þessum tíma hefur ekki kjaftur sagt rassgat, á opinni rás.

En svona fyrir þá sem ekki þekkja til er IRC spjallkerfi, sem á uppruna sinn á finnsku BBS (Bulletin Board Service) sem voru algeng áður en internetið varð almennt. Síðan komu Billi (Gates) & Co og bjuggu til MSN spjallforritið, sem hefur í raun þann eina kost umfram IRC að þar getur maður stjórnað hverjir geta spjallað við þig og hverjir ekki (contact list) en vantar opnar spjallrásir (spjallherbegi með mörgum notendum), sem IRC hefur.

Athugasemdir

[Jenný Anna Baldursdóttir, 8.6.2008 kl. 10:53]

IRC er algjörlega lokaður heimur fyrir mér.  Ég held að ég haldi því þannig.  Er búin að eyða út MSN-inu mínu, ég ákvað nefnilega að ég nenni ekki að standa í samskiptum með því að slá á lyklaborðið.  Ég hringi í staðinn.

Sunnudagskveðjur til þín.

[Brjánn Guðjónsson, 8.6.2008 kl. 16:48]

nú, hætta að blogga þá? 

[Jóna Kolbrún Garðarsdóttir, 10.6.2008 kl. 02:59]

Ég er irkkari og hef verið það í rúm 7 ár,  ég logga bara finnskar rásir til þess að læra finnsku.  Irknetið er ágætlega virkt, allavega á #finland þar tala allir saman á rásinni.  Svo er ég á Dalnetinu líka, þar eru fáir frá Evrópu.  Svo er alveg hægt að loka á allt prívat tal, og loka á ákveðin nick og lönd.  Það er allt hægt á irkkinu í dag   Ég tala yfirleitt aldrei prívat á irkinu, bara á rásum.   Litli bróðir minn er irklögga og hefur hann kennt mér ýmislegt

[Brjánn Guðjónsson, 10.6.2008 kl. 09:59]

ég átti við að á MSN er lokað á alla, nema þú setjir þá á listann þinn. það er öfugt á irc.

já, fullt af spjalli á írc en íslensku ircnet rásirnar eru orðnar alveg dauðar