Ég er bátsmaður, einn á báti og heimta kjöldrátt

Nú á seinustu dögum, í öllu efnahagsfarganinu, er sumum ansi tíðrætt um báta. Talað um þjóðarskútuna, sem réttilega hefur strandað langt upp á túni. Í umræðum á Alþingi um stefnuræðu forsætisráðherra, sté varla sá maður í pontu að hann talaði ekki um báta. Að tala í líkingum var þema kvöldsins og tengdist aðallega sjávarútvegi. Ólgusjór, allir í sama bát, yrir utan þjóðarskútuna sjálfa. Það gefur á bátinn við Grænland, söng einhver. Jú, Ísland er við Grænland svo það er allt satt og rétt.

Hvar var ég?....Jú, þetta með bátinn. Allir í sama bát. Það er auðvitað tómur þvættingur. Í besta falli störfum við hjá sama útgerðarfyrirtækinu, Bruðli hf. Hver á sínum bát þó. Einhverir á lystisnekkjum, aðrir á skemmtiferðaskipum. Flestir þó á opnum árabátum og því miður einhverir sem ekki einu sinni hafa bát, heldur halda sér í fljótandi trjádrumba. Sjálfur er ég á þokkalega vel tjörguðum árabát. Ég sé þó engan biskup þar um borð.

Í öllu havaríinu undanfarið hafa heyrst raddir um að nú sé ekki tíminn að leita sökudólga. Heldur skulu allir taka til, saman. Mér finnast það klénar raddir. Hví ætti ég að taka til eftir partíið í næsta báti? Bátnum þar sem formaðurinn var fullur og klessti á bátinn minn, svo leki kom að. Á ég bara að ausa og ausa meðan fíflið sem ók á mig siglir makindalega burt? Nei!

Þannig vill til að ég hef ráðið mér starfsmenn á minn bát. Nokkrir eru nú að ausa og ég vil að hinir fari nú og kjöldragi kvikindið á hinum bátnum. Það getur vel gerst samhliða austrinum og má ekki bíða. Hinn seki má ekki komast undan.

En svona án líkinga og annars orðskrúðs, þá á þetta við um raunveruleikann líka. Auðvitað á að taka til og bjarga því sem bjargað verður, strax. Hins vegar má á sama tíma setja aðra í þá vinnu að þefa uppi sökudólgana, áður en þeir koma sönnunargögnum fyrir kattarnef.

Svo ég skelli mér aftur í líkingarnar...Ef kveiknar í, er strax hafist handa við að rannsaka brunann. Það er ekki beðið í margar vikur eða mánuði meðan húsið er endurbyggt. Nei, vísbendingarnar um upptök brunans eru nefnilega til staðar í upphafi, en ekki eftir að skipt hefur verið um hverja spýtu hússins.

Það þarf að finna sökudólgana strax og gera þá óvirka svo þeir valdi ekki meiri skaða en orðinn er. Það er ekkert vit í að hafa þá enn valsandi allsstaðar og innan um, meðan hinir eru að reyna að byggja upp.

Athugasemdir

[Thee, 17.10.2008 kl. 19:44]

Við eigum eftir að sjá bráðum á eftir stjórnmálamönnum og embættismönnum flýja dallinn. Það er víst sagt að rotturnar flýji sökkvandi skip. Þeir eru bara að tryggja það að báturinn sökkvi áður en þeir fara.

Hvort er betra kjöldráttur eða venjulegur dráttur? Er kannske sinadráttur bestur?

[Brjánn Guðjónsson, 17.10.2008 kl. 19:48]

örugglega dráttur með kjölfestu heimilisins, en þar sem ég er einn á báti og án kjölsvíns er það líklega bara sinadráttur. ég bý líka bara á mölinni svo ekki verður það fjárdráttur.

[Thee, 17.10.2008 kl. 20:09]

Að öðru, þá var ég að heyra það að það er til betri aðferð en stígvél á bjargbrún ef þú ert fjárdráttarmaður.

[Brjánn Guðjónsson, 17.10.2008 kl. 20:11]

já, að gerast útrásarvíkingur

[Thee, 17.10.2008 kl. 20:17]

Hvað er annars að frétta af þér kallinn?

[Brjánn Guðjónsson, 17.10.2008 kl. 21:10]

hurru, bara allt hið besta. maður bara tekur þetta með hægri

[Lára Hanna Einarsdóttir, 17.10.2008 kl. 21:16]

Þú mætir á morgun klukkan þrjú, er það ekki? Hugsaðu þér hvað þú yrðir ánægður með sjálfan þig! 

[Brjánn Guðjónsson, 17.10.2008 kl. 21:18]

jú, ef sófinn verður ekki þeim mun meira sexý

[Jenný Anna Baldursdóttir, 17.10.2008 kl. 21:30]

Ausum og kjöldrögum.  Ég er game.

[Guðbjörg Erlingsdóttir (IP-tala skráð) 18.10.2008 kl. 09:36]

Sammála!