Fjas

Miðvikudagur, 19. nóvember 2008

Nafnbreyting, en ekki kennitöluskipti

Bókarupplestur Seðlabankastjóra í gær hefur valdið því að ríkisstjórnarflokkarnir hafa ákveðið að gera skipulagsbreytingar í bankanum. Til greina kemur í því sambandi að skipta út stjórn bankans fyrir aðra, faglega, stjórn. Reyndar fátt annað sem komi til greina.

Reyndar hefur, óskiljanlega, ekki komið til tals að skipta ríkisstjórninni út fyrir faglega skipaða stjórn.

En aftur að Seðlabankanum...
Samkvæmt frétt á visir.is um þetta efni, segir forsætisráðherra „ekki gefið að Davíð Oddsson fari frá þó Fjármálaeftirlitið verði sameinað Seðlabanka Íslands“ eins og segir í fréttinni.

Utanríkisráðherra segir þó „Þessi faglegi bankastjóri á ekki að heita Davíð Oddsson“ samkvæmt sömu frétt.

Því er ljóst að ríkisstjórnin er ekki samstíga í málinu. Samkvæmt heimildum Bergmálstíðinda mun þó vera hugsanleg lausn í málinu. Sjálfstæðismenn vilja hlífa manninum í brúnni, meðan Samfylking vill Davíð burt.

Þann vanda megi hinsvegar leysa á einfaldan hátt.

Seðlabankastjóri, Davíð Oddsson, taki sér nýtt nafn. Þannig megi á sama tíma halda manninum en losna við Davíð.

Heimildamaður segir Davíð vera helst að hugsa um fjóra möguleika:
Tanni Oddsson, Hannes Hólmsteinn Oddsson, Jón Steinar Oddsson eða Kjartan Oddsson.

Hvert nafnanna verður fyrir valinu mun skýrast eftir fáeina daga.