Um fótboltatuð

Í dag og í gær hef ég dottið inn á nokkur blogg, þar sem viðkomandi tuða um fótboltafárið á RÚV. Einhver vildi fá afslátt af útvarpsskatti. Aðrir eitthvað annað.

Ég get svo sem alveg skilið gremjuna, við að fá þetta yfir sig í einni holskeflu.

Vissulega eru margir sem hafa ekki gaman að fótbolta, handbolta, eða öðrum íþróttum. Sjálfur nenni ég ekki að fylgjast með enska boltanum, sem dæmi. Hef bara engan áhuga á að fylgjast með einhverju ókunnungu fólki í vinnunni sinni. Reyndar er enski boltinn ekki sýndur á RÚV.

Þó hef ég gaman að HM og EM. Hvort heldur er í fótbolta eða handbolta. Læt stórmótin duga mér. Horfi kannski á Ólympíuleikana. Svona stund og stund. Þá er það upp talið.

Stórmót í íþróttum koma í holskeflum. HM í fótbolta stendur yfir í mánuð, á fjögurra ára fresti. Önnur mót eitthvað skemur. Ólympíuleikarnir í hálfan mánuð, á fjögurra ára fresti, t.d.

Væri útsendingartíma allra þessarra stórmóta dreift yfir árin, hversu mikill yrði hann á viku? Ég hef engar tölur yfir það en tel þann tíma vart lengri en þann tíma sem fer í útsendingar innihaldslausra sápuafþreyginga s.s; Lífsháska, Berlínaraspanna, Taggart, Framtíðarleifturs, Að duga eða drepast, Bræðisvaktina, Níðþröngra eiginkona, eða hvað svo allir þessir þættir heita. Nú eða bíómyndanna um helgar og heimsóknaþáttarins Norður og niður.

Ekki nenni ég fyrir mitt litla líf að sólunda tíma mínum að horfa á slíkt. Mér dettur þó ekki í hug að fara að hafa í frammi sérlegt nöldur yfir því. Ég er vel meðvitaður um að til er fólk með allt annan smekk en ég, sem kýs Níðþröngu eiginkonurnar fram yfir fréttir, Kastljós, Silfur Egils eða Popppunkt, sem ég horfi gjarnan á.

Bara allt í lagi með það og engin ástæða til nöldurs. RÚV er miðill allra landsmanna og ber að bera á borð allskonar fyrir alla. Þó er ekki hægt að bjóða upp á allskonar handa öllum í einu.

Athugasemdir

[Jóka (IP-tala skráð) 29.6.2010 kl. 12:25]

Ég held þú elskir níþröngar eiginkonur alla vega svona in general svo ég tali nú ekki um heilsuþætti bláu handarinnar á ÍNN sem gott er að horfa á tvisvar svo maður nái öllu innihaldi vel :) Áfram RÚV, ÍNN og Omega, þessi þrenna klikkar seint

[Brjánn Guðjónsson, 29.6.2010 kl. 19:46]

Omega boðskapurinn mun seint síast inn í minn níðþrönga haus