Moldarkofaþankar

Setti (hálfs árs) gamalt lag í spilarann. Bloggvinkona mín, hún Jenný á þar alveg heilan vegg sem ég henti mér í.

 

endurnefndi beibíið, Á íslandi viljum búa.

Í minningu Bóbós

Ég átti samtal við ástkæra dóttur mína í kvöld. Hún sagði farir sínar ekki sléttar. Henni var mikið niðri fyrir og var með ekka.

Bóbó er dáinn.

Þessi gleðigjafi og hvers manns (og fugls) hugljúfi. Ekkert hafði amað að honum fyrr en í dag og Birna mín horfði á þennan vin sinn kveðja þennan heim, óforvarendis.

Dýralæknirinn sagði að hjartaáföll væri tíð hjá gárum.

Bóbó fer líklegast ekki í krufningu, né að annarskonar rannsókn fari fram á dauða hans. Því verður hjartaáfall líklega skýringin á hans sviplega fráfalli.

Hann var ungur. Ekki nema eins árs. Hann var sóttur, sem ungi, í dýrabúð á aðfangadag jóla 2007. Hann bjó síðan í góðu yfirlæti tveggja barna sem þóttu vænt um hann. Sjálfur naut ég félagsskapar hans fyrr í sumar. Í júní, meðan forráðamenn hans skruppu til vesturheims.

Við Bóbó áttum góðan tíma saman. Móuðumst hvor í öðrum og áttum þess á milli heimspekilegar samræður um menn, fugla og málefni.

Bóbó var afar málefnalegur og fylginn sér í allri þeirri vitleysu sem hann tók sér fyrir hendur vængi.

Mig langar að kveðja þennan einlæga og góða félaga sem ég kynntist, því miður, of lítið.

Blessuð sé minning þín Bóbó.

Að verðtryggja eða ekki verðtryggja, það er spurningin

Ég var að lesa pistil Egils Helgasonar, á vefsíðu hans og umræður sem honum fylgdu. Pistillinn fjallar um verðtryggingu og réttmæti hennar.

Allra handa skoðanir eru viðraðar í athugasemdum, en aðeins einn (áður en ég bættist í hópinn) sem nefnir lausn sem kalla megi sanngjarna, að mínu mati.

Afnám verðtryggingar húsnæðislána myndi vissulega þýða raunverulega eignamyndun fólks í húsnæði sínu. Hinsvegar myndi hún jafnframt hafa í för með sér hærri vexti og þyngri greiðslubyrði. Verðtryggingin hefur bæði kosti og galla.

Það sem er þó ósanngjarnt við verðtryggingu húsnæðislána er að hún byggir á vísitölu neysluverð, en ætti að byggja á vísitölu húsnæðisverðs.

Svo ég vitni í sjálfan mig:

Hugmyndin að baki verðtryggingunni er að tryggja að eignin/skuldin haldi raungildi sínu. Láni ég þér fyrir mjólkurlítra í dag fylgi skuldin verði á mjólkurlítranum, þannig að þegar þú greiðir hann til baka seinna samsvari endurgreiðslan verði á mjólkurlítra. Meðan þú skuldar mér borgarðu auk þess vexti (leigu) af peningnum sem ég lánaði þér.

Í þessu samhengi er verðtrygging ekki óréttlát. Það sem er hinsvegar óréttlátt er að verð á einhverju allt öðru en því sem lánað var fyrir ræður verðtryggingunni. Nýjasta dæmið er hækkun eldsneytis, áfengis og tóbaks. Neysluvörur sem hafa nákvæmlega ekkert með íbúðalán að gera. Útreikningur verðtryggingar húsnæðislána er óréttlátur.

Lausnin er nákvæmlega sú sem Birkir B nefnir hér að framan.

„Ef lán mundu verð tengd við vísitölu húsnæðisverðs eingöngu, þá væri lánveitandi alltaf tryggur um að fá verðmæti sítt til fasteignakaupa alltaf til baka + vexti.“

Þesslags verðtrygging húsnæðislána myndi gera nákvæmlega það sem verðtryggingu er ætlað að gera og það á sanngjarnan máta. Þannig myndi 80% sem Íbúðalánasjóður lánaði mér í fyrra af verði íbúðar minnar skila sér til baka sem 80% af verði sömu íbúðar.

Er það ekki eðlilegast, að miða við að borga til baka í því sama og lánað var fyrir?

Hávísindalegar pólitískar vangaveltur um útlit ríkisstjórna

Ég rakst í dag á tengil á vefsíðu, þar sem fólk getur sóað tíma sínum í að búa til börn. Eftir að hafa gert nokkrar tilraunir með hinar og þessar myndir fékk ég þá hugmynd að nýta þessa hávísindalegu leið til að kanna nokkur ríkisstjórnarmynstur. Við getum sagt að ríkisstjórn sé afkvæmi þeirra flokka sem hana skipa.

Þar sem, eðli málsins samkvæmt, barn getur að hámarki átt tvö foreldri kom ekki til greina önnur stjórnarmynstur en tveggja flokka.

Í dag eru það einungis D+S annarsvegar og D+V hinsvegar sem geta myndað tveggja flokka stjórn með þingmeirihluta á bak við sig. Samkvæmt nýjustu skoðanakönnunum gætu S+V hinsvegar myndað slíka stjórn að undangengnum kosningum.

Til að hafa kynjajafnrétti í hávegum og að móðga nú engan, setti ég ávallt konu í móðurhlutverkið og karl í föðurhlutverkið. Ýmist með formönnum flokkanna eða varaformönnum. Hvoru foreldrinu barnið líkist meir, fer eftir þingstyrk þess foreldris (sirka).

Núverandi ríkisstjórn lítur svona út.

Skiptum við formönnum flokkanna út fyrir varaformennina, liti hún svona út.

Mynduðu Sjálfstæðismenn og Vinstri grænir ríkisstjórn, liti hún annað hvort svona út

eða svona

Færu fram kosningar nú og í framhaldinu skipuðu Samfylking og Vinstri grænir ríkisstjórn, hafandi þingmannafjölda samkvæmt skoðanakönnunum, fengjum við þessa stjórn

eða þessa

Svo verður hver að gera upp við sig hvaða stjórnarmynstur hann kýs.

Andskotans bændur

Eða þannig. Ég hef ekkert á móti bændum, per se. Þessar andskotans beingreiðslur þarf samt að afnema. Ekki fá fiskframleiðendur beingreiðslur, frekar en aðrir framleiðendur hérlendis.

Komum bændum út afætustöðunni í að vera venjulegir framleiðendur. Ok, örugglega fara einhverjir á hausinn, en það er fórnarkostnaður sem mun skila sér á endanum.

Af hverju er ekki hægt að reka landbúnað eins og hvern annan framleiðsluiðnað?

Bændur vilja óbreytta samninga

And evrópunefnd

Á sama hátt og €vrópunefnd hjá sjálfstæðismönnum, legg ég til að skipuð verði and-evrópunefnd. það er nauðsynlegt til að halda jafnvæginu.

ég sting upp á tveimur einstaklingum í nefndina:

Jón Baldvin Hannibalsson
Eiríkur Bergmann

Stjarneðlisfræði

Það þarf hvorki stjarneðlisfræðing né beturvitring til að lesa milli línanna.

Eins og ég hef sagt áður, liggur allt fyrir. Sjálfstæðismenn taka nýja stefnu og aðildarviðræður munu hefjast strax í vor.

Gott mál.

Hvort við munum svo ganga inn í bandalagið, mun ráðast í þjóðaratkvæðagreiðslu. Vonandi að samningamenn íslendinga standi sig svo við fáum eitthvað almennilegt að kjósa um.

Ég vona að góðir samningar náist og við getum gengið þarna inn. Ég er orðinn frekar leiður á að horfa á verðtrygginguna éta upp allan minn sparnað, sem ég setti í steinsteypuna.

Losna svo við verðtrygginguna, sem lífeyris- og verkalýðsforkólfar vilja verja, en er að brenna upp mínum eigum sem ég hefði annars getað notið í ellinni.

Ríkisstjórnin verður að svara kalli um breytingar

Ég á eftir að sjá þetta halda

Ekki veit ég lagalegar forsendur fyrir skráningu einkaleyfa. Hvort menn þurfi að sýna fram á að viðfangsefnið sé sannanlega frá þeim komið.

Hvað broskarlana varðar, eru þeir alls ekki nýir af nálinni, þótt þeim hafi fjölgað gegn með árunum.

Líklega er hér einungis um að ræða myndútfærslur á hinum fornu táknum, s.s. :) og :( og :| og ;)  svo fáein séu nefnd. Myndútfærslum eins og t.d. MSN messenger notar, þar sem innslegið tákn er birt sem mynd.

Ekki veit ég með vissu hve gömul upprunalegu táknin eru, en þau sáust fyrst notuð á IRC. Þegar ég hóf að nota IRC, árið 1994, voru þau þá þegar í fullri notkun.

Segist eiga réttinn á ;-)

Hátekjuskattur bara táknrænn, segir Ingibjörg. Björgvin veit ekki neitt

„Ingibjörg Sólrún Gísladóttir formaður Samfylkingarinnar segir að hátekjuskattur hafi komið til umræðu hjá ríkisstjórninni. Horfið hafi verið frá honum þar sem hann sé fyrst og fremst táknrænn“

Þetta er alveg rétt. Þorri fólks er á skítalaunum og ekki nema ráðherrar, banka- og auðmenn sem eru á almennilegum hákarlalaunum. Hátekjuskattur kom til umræðu á ríkisstjórnarfundi. Það var svo, eftir að húsvörður hafði bent þeim á að það hefðu bara ekki allir sömu laun og þau sjálf. Þá var hætt við.

Eitthvað varð samt að gera. Þá kom upp þessi líka snilldartillaga. Hækka neysluvörur svo um munar. Kynda vel undir verðbólgunni svo hún brenni eigur fólks sem aldrei fyrr. Það komi jafnframt harðast niður á þeim sem skulda mikið. Þetta eru almennilegar aðgerðir.

Skál fyrir því!

Eins hefur komið í ljós að það er talsvert sem Björgvin G. vissi ekki um og veit ekki um. Í raun má segja að hann viti fæst um flest, kannski bara ekkert um allt?

Fyrir utan það sem rekið hefur verið síðustu daga, um hvort og þá hvað Björgvin veit eða vissi og þá hvenær, hvernig og hvers vegna eða hvers vegna ekki.

Björgvin segist nú ekki hafa vitað að hann væri í ríkisstjórn. Hann hafi fyrst í gær frétt að hann væri viðskiptaráðherra.

Hátekjuskattur bara táknrænn

Verðbólgudrekinn

Íslendingar eiga slæmar minningar frá baráttu við verðbólgu. Oft var þá talað um verðbólgudraug, en verðbólgan er þó í líki dreka.

Frá örófi alda hafa verðbólgudrekar látið sjá sig hér og þar, annað veifið. Til eru hellaristur og aðrar fornar heimildir um verðbólgu, víða að úr veröldinni.

 

 

Fræg er t.a.m. teikning Leonardo da Vinci af verðbólgudreka, af tegundinni Pricibus Klikkusis.

 

 

Verðbólgudrekinn hefur um aldir verið eitt helsta tákn hreðjataks yfirstéttarinnar á almúganum. Enda var það fyrst og fremst efnafólk sem stundaði kaupmennsku og okur á alþýðunni. Því er ekki að furða að algengt er að sjá verðbólgudreka í skjaldarmerkjum gamalla yfirstéttarætta.

 

Verðbólgudrekinn er hér var upphaflega fyrir einhverjum árum síðan, var af harðgerðu kyni, Procentus Klikkusis. Hann át bæði upp sparnað og skuldir, en náði aldrei að bíta á aðrar eignir fólks, s.s. fasteignir. Þær jukust með minnkandi skuldum. Því þótti ljóst að kynbæta yrði skepnuna, sem var og gert. Fáir voru betur að sér í kynbótum og öðrum bændatengdum hlutum í þá tíð en Framsóknarmenn. Því var það, árið 1979, að skepnan var sædd með sæði Ólafs nokkurs. Ólafur þessi mun hafa verið Framsóknarmaður og sem slíkur líklegur til að búa yfir afætuarfberum. Enda kom á daginn að afkvæmið þótti undravel heppnaður verðbólgudreki.

Trixið var að láta skepnuna éta upp eignir fólks, en hugsa minna um sparnaðinn. Enda mesti sparnaður fólks bundinn í fasteignum. Íslendingar hafa hvort eð er aldrei kunnað að spara á annan hátt. Hið kynbætta afbrigði fék fræðiheitið Procentus Pricibus Tryggus Klikkusis.

Það gerðist svo að illa áraði fyrir skepnuna, eftir 1991 og á endanum veslaðist hún upp og dó. Hún bar beinin í Mýrdalnum, þar sem hún hafðist við undir lokin. Íslendingar hafa trúað því allar götur síðan að verðbólgan tiheyrði fortíðinni og kæmi ekki aftur.

Annað hefur komið á daginn.

Drekaegg hefur verið geymt í kjallara Svörtulofta frá árinu 1989 og í haust var því ungað út, að beiðni ríkisstjórnarinnar. Svartstakkar Svörtulofta hafa átt veg og vanda af útunguninni og umsjóninni.

Ríkisstjórnin setti af stað neyðaráætlun um hvernig afla skyldi skepnunni fæðis og hefur þegar hafist handa, með hækkun ýmissa neysluvara, sem hækka vísitöluna, sem brennir upp eignir. Fyrir utan þann unað sem það veitir þeim að sjá sultaról lýðsins herðast enn betur að, svo hann vart nái andanum.

Þar sem skepnan hefur ekki enn náð kynþroska þykir mikilvægt að vernda hana sérstaklega, því ekki er hægt að geyma egg hennar fyrr en kynþroska er náð. Varðsveitina skipa Diablo von Svörtuloft, Solla Stirða og Geiri Hinn Harði.

Leit er þegar hafin að vænlegum sæðingamanni. Reyndar þarf ekki að leita mikið, því framboðið þykir yfir nóg. Afæturnar eru á hverju strái.