Hin íslenska helgislepja

Úff. Íslansku fánalögin. Ein helgislepjan enn. Það er makalaust hve helgislepja er rík í íslendingum.

Tökum jól og páska sem dæmi. Þessi þjóð sem er líklega með ókristnari kristnum þjóðum. Þjóð sem hefur meiri áhuga á álfum, draugum, stokkum og steinum, en Ésú og Co. Nei nei, svo koma þessar svokölluðu stórhátíðir. Þá má enginn dansa og helst eiga allir að leggjast í kör og hlusta á englakóra. Allt samkvæmt yfirlýstum og úr sér gengnum staðli þjóðkirkjunnar.

Fyrir mér er þetta fánadæmi svipað. Fólk er ekki ýkja upptekið af fánanum. Einstaka fólk flaggar honum á 17. júní, búi það svo vel að eiga fánastöng. En nei. Það má sko alls ekki nota þetta þrílita léreftslak á annan hátt nema með þinglýstu samþykki ráðuneytis, í þríriti.

Að gera fánann svo heilagan samsvarar því að gera sjálfan sig heilagan. Taka sjálfan sig of hátíðlega.

Lítum á Bandaríkin. Líklega sú þjóð sem er hvað uppteknust af fánanum sínum. Endalausar fánaserimoníur þar á bæ. Þó virðast þeir lausir við þessa fádæma helguslepju varðandi fánann, þótt þeir játi honum hollustu og ég veit ekki hvað.

Það er nefnilega engin óvirðing í því fólkin að prýða sig eða föt sín með fánanum eða litamynstri hans. Það er, þvert á móti, virðing. Það er ekki mikil virðing við fánann að nota hann (svo til) aldrei.

 

p.s. ég þori ekki fyrir mitt litla líf að setja inn mynd af fánanum. ég gæti lent í gúlaginu fyrir vikið.

Nærbuxur í fánalitum

Tvenn eldri hjón festust í leðju

Kalla þurfti til lögreglu og björgunarsveitir þegar tvenn eldri hjón festu bifreið sína í leðjupytt, rétt ofan Hafravatns síðdegis í gær. Hjónin sem eru á áttræðisaldri ætluðu að láta reyna á lipurð bifreiðarinnar.

„Þetta er nýlegur Subaru, á góðum dekkjum og fjórhjóladrifinn“ sagði Hafsteinn Kúld, er ók bifreiðinni. „Þegar ég hafði ekið um það bil hálfa leið yfir pyttinn drap bíllinn á sér og við það náði hann að festast“ bætir Hafsteinn við.

Jensína Kúld, eiginkona Hafsteins segist hafa orðið mjög skelkuð. „Ég hélt þetta væri mín hinsta stund“ sagði Jensína. „Við náðum þó að hringja eftir hjálp í tæka tíð. Guði sé lof fyrir farsímann hans Steina míns.“

Hafsteinn og Jensína jöfnuðu sig þó flótlega eftir að björgunarsveitin Hrólfur hafði losað bifreið þeirra. Samferðafólk þeirra Hafsteins og Jensínu, hjónin Leó og Lovísa Löve, þáðu hinsvegar áfallahjálp og treystu sér ekki í viðtal.

28 klappstýrur festust í lyftu

Vond kaup og góð

Við, ég og föðurbetrungarnir, kíktum á þetta tívolí sem staðsett er á baklóð álversins í Straumsvík, eða þar um bil. Ætluðum í fyrradag, en komumst að því að ekki er hægt að greiða með kortum þar og næsti hraðbanki einhversstaðar lengst í rassgati. Gerðum annað í staðinn en kíktum þangað aftur í gær, eftir að hafa orðið okkur úti um skotsilfur.

Það er lítið um þetta blessaða tívolí að segja annað en við vorum einróma á þeirri skoðun að það ætti fyllilega skilið titilinn „glatað.“ Fyrir utan að vera fátæklega tækjum búið er verðlagningin út úr kortinu. Hver miði, í tækin, kostar tvöhundruðkall og í tækin kostar þrjá miða. Ok, það má veiða tuskudúkkur fyrir tvo miða!

Ég man þegar við fórum síðast, í fyrra eða hitteðfyrra. Þá kostaði miðinn aðeins hundrað krónur. Enda var hægt að fara í þó nokkuð mörg tæki fyrir fimmþúsundkallinn. Núna tók u.þ.b. tuttugu mínútur að spandera tvöþúsundkalli. Það var ekki áhugi, hvorki hjá mér né krökkunum, á að eyða meiri pening í þetta okurdæmi. Held menn hafi skitið langt yfir strikið í verðlagningunni.

Í fyrsta skipti, svo ég muni, kom upp sú hugsun hjá mér að ódýrt væri í bíó.  Þar fær maður þó níutíu mínútur fyrir þúsundkallinn.

Þessi tívolíferð var semsagt, vond kaup. Fórum og fengum okkur burrito á heimleiðinni. Það voru góð kaup.

Svo þurfti ég að koma við í Hagkaup, að versla hleðslurafhlöður. Komum við í Smáralindinni. Þar rak sonurinn augun í geisladisk. Gömlu góðu útvarpsþættirnir með spæjurunum Harry og Heimi. Þættirnir „Með öðrum morðum.“ Þegar ég frétti af útgáfu þessa disks, í vor, var ég staðráðinn í að kaupa hann. Svo bara gleymdist það. Snillingurinn, sonur minn, sá diskinn og stakk upp a að kaupa hann. Það var og gert. Það voru mjög góð kaup.

Hlustuðum á fyrstu þrjá þættina í gær og í kvöld verður haldið áfram.

Læknisfræðilegar heilbrigðisáhyggjur Ólafs F.

Ekki ætla ég að tjá mig um téð sjónvarpsviðtal. Þá er það afgreitt.

 

Nei, annað í viðhangandi frétt fangaði athygli mína. Ólafur F. Magnússon hefur áhyggjur. Já og ekki neinar venjulegar áhyggjur, eins og ég og þú. Ó nei. Ólafur hefur læknisfræðilegar heilbrigðisáhyggjur. Það er ekki lítið.

Hann segist hafa áhyggjur af að fagmennska og heiðarleiki séu ef til vill ekki hluti af leikreglum fjölmiðlamanna, eins og Helga Seljan. Ég get svo sem alveg sett mig í þau spor að skilja áhyggjur Ólafs. Hitt skil ég þó ekki. Hvað á maðurinn við með að blanda læknis- og heilbrigðisstarfsmannstitlinum í málið? Er hann að gefa eitthvað í skyn?

Í fréttinni er höfð eftir honum þessi málsgrein;

„Ég hef áhyggjur af því sem læknir og heilbrigðisstarfsmaður ef fagmennska og heiðarleg vinnubrögð eru ekki hluti af leikreglunum hjá fjölmiðlamönnum eins og Helga.“ Leturbreytingin er mín.

Ég get með engu móti séð hvernig læknisstarfið tengist fjölmiðlum, eða að fjölmiðlamenn og heilbrigðisgeirinn tengist á einhvern sérstakan hátt. Nema tengingin sé sérstaklega ætluð Helga, persónulega? Ég skal ekki um það segja.

 

Ég hef hinsvegar talsverðar áhyggjur af þessu. Ég verð að segja það. Þó hvorki sem rafeindavirki né tölvunarfræðingur, heldur einungis sem Reykvíkingur.

Ólafur: Boðaður á fölskum forsendum

McCain kominn í gírinn

Svo virðist sem spéfuglinn og húmoristinn John McCain hafi fundið taktinn. Fyrir skömmu síðan, er keppinautur hans, Barack Obama, hafði í frammi uppistand í Evrópu varð lýðnum ljóst hve mikilvægt er fyrir kjörþokkann að hafa sig í frammi og vera sniðugur.

Það er einmitt aðalsmerki McCains, að vera sniðugur. Eins og fram kom í fyrri færslu, fann John McCain upp skopskynið. Það mátti berlega sjá á kosningafundi um daginn. Fyrir þann fund skildu heil 9% frambjóðendurna að. Nú eru þeir jafnir.

Obama mætti örlítið of seint á fundinn. Þar sem hann gekk í salinn tók McCain eftir að buxnaklauf Obama var opin. Hann greip tækifærið og sagði við Obama; „Þú átt eina, tvær, þrjár, [...], níu, tíu kærustur!“

Ekki að spyrja að snilldinni.

Frambjóðendur hnífjafnir

Snillingurinn, dóttir mín

Hún er snillingur, dóttir mín. Genin, sjáið til

Hún hefur verið að læra á píanó í tvö eða þrjú ár og það liggur vel fyrir henni.

Ég hef átt forláta gítar í fjölda ára. Hún hefur ekki sýnt honum sérstakan áhuga hingað til, en spilar og æfir sig reglulega á píanóið. Svo gerðist það í gær að hún tekur fram gítarinn og fer að fikta við hann. Í dag hefur hún meira og minna verið með hann í kjöltunni og spurt mig ýmissa spurninga. Hvernig hann sé stilltur og hvernig gripin eru.

Nú er ég einungis í mesta lagi fyllerísfær á gítar. Varla það, því þegar ég hef fengið mér í aðra tánna verð ég umsvifalaust ófær um að leika á hljóðfæri. Löngu hættur að reyna það líka í þannig aðstæðum.

Allavega. Hún spurði mig hvernig ég hefði lært á gítar (það litla sem ég kann). Ég lærði upphaflega með aðstoð gamallar bókar og ég sagði henni frá því. Ég gúgglaði því næst „gítarkennsla“ og fékk fullt af misáhugaverðum síðum. Þó var ein sem var gaman að sjá. Síða gamals skólafélaga míns úr Iðnskólanum. Þar má sjá helling af gripum. Dóttirin hóf strax að skoða og æfa.

Þó fann ég fáar síður með lögum ásamt gítargripum. Að æfa sig á gítar er ekki bara spurning um að kunna gripin heldur ekki síst að æfa sig í að skipta milli gripa, spilandi lög.

Ég verð endilega að grafa eitthvað upp handa henni. Ég heyri það strax að gítarinn muni liggja jafn vel fyrir henni og píanóið.

Hún er ekki bara áhugasöm um þessa hluti eins og gamli. Hún hefur einhverja hæfileika sem ég hef ekki.

Maðurinn sem fann upp skopskynið

Það verður seint ofsögum sagt að John McCain sé bráðfyndinn og skemmtilegur maður. Það drýpur af honum fyndnin, ekki síður en viskan. Enda upphafsmaður margra klassískra frasa.

Það var á námsárum sínum, sem McCain skellti fram fyrsta frasanum. Bless kex klukkan sex. Við gríðarlegan fögnuð viðstaddra. Þó má segja að hann hafi toppað sniðugheitin í mannkynssögufyrirlestri síðar. McCain var að gjamma eitthvað og kennarinn segir við hann, „John, haltu kjafti!“ John McCain bætti þá við, „snúðu skafti.“

Það dygði ekki allt geymslupláss hinnar nýju diskastæðu blog.is, ætlaði ég að telja upp öll gullkorn McCains. Ég læt því staðar numið hér, en vil þó taka fram að það mun vera misskilningur að John McCain hafi samið frasann íslenski fáninn, bandaríski bjáninn. Sá frasi mun vera íslenskur en á þó vel við, bæði um McCain sem og hans sitjandi forseta. Ekki síst á fánadögum.

 

 

 

 

 

 

 

 

John McCain

McCain: Skopskyn nauðsynlegt í kosningabaráttunni

Spellvirki gegn spellvirki?

Eins og fram hefur komið í fréttum, varð rafmagnslaust í Herjólfsdal, laust eftir hádegið. Ýmsar getgátur hafa verið uppi um orsök rafmagnsleysisins. Allt frá raka til bilunar í rofa langt uppi á landi.

Nú hefur hinsvegar komið í ljós að rafmagnsleysið hafi verið af Manna völdum. Rétt um það leiti sem rafmagn fór af var Árni Johnsen að hefja brekkusöngsæfingar. Sá er olli rafmagnsleysinu heitir Manfred Slafenwafen og er þýskur skiptinemi. Hann vill meina að rafmagnsleysið hafi komið í veg fyrir andleg spellvirki, eins og hann orðar það. Fjöldi fólks var enn í dalnum og því hætta á miklum andlegum áverkum.

Rafmagnslaust í Eyjum í stutta stund

Rockstar-nýlenduvörur hætt rekstri

Í vikunni hætti rekstri hin gamalgróna verslun, Rockstar-nýlenduvörur.

Verslunin var rekin hátt í fjörutíu ár í sama húsnæðinu við Bræðraborgarstíg og eiga ófáir íslendingar minningar tengdar henni.

Stofnandi verslunarinnar, Magni Ásgeirsson, hóf rekstur hennar eftir frægðarför sína til útlanda, í keppnina Rokkstjarna alþýðunnar. Verslunin hafði til sölu ýmsan varning er nauðsynlegur má teljast hverri alþúðurokkstjörnu, s.s. leðurólar og keðjur.

Magni segir mikla eftirsjá vera að versluninni. „Þetta hefur verið mitt annað heimili í mörg ár“ segir Magni. „Hinsvegar neyddist ég til að loka. Salan dróst svo saman eftir að heimsmarkaðsverð á leðri rauk upp.“

Minningartónleikar verða haldnir í kvöld, klukkan 20, í húsakynnum verslunarinnar. Fram koma ýmsar gamlar alþýðustjörnur s.s. Bo - ðe '69 rockstar og Bubba Mo - the 80's rockstar.

Magni hættir verslunarrekstri

Nýjar íslenskar agúrkur

Það er gaman að vita af hamingjusömu fólki. Það er líka gaman að heyra af öðruvísi athöfnum. Þó þykir mér það skondið að sjá frétt af svona brúðkaupi. það sem mér þykir þó enn skondnara er lokamálsgrein fréttarinnar.

„Nánar er fjallað um þetta í Morgunblaðinu í dag.“

Þessi frétt á mbl.is er semsagt aðeins yfirlit. Mun meira og djúsí lesefni um brúðkaupið í pappírsútgáfu Moggans.

Ég vil alls ekki gera lítið úr brúðhjónunum eða þessari stóru stund þeirra. Ég bara sé ekki alveg í svipinn hversu mikilvægt erindi hún á líklega við okkur hin.

Líklega er hér um að ræða týpískar ferskar sumaragúrkur.

Brosað út í annað á brúðkaupsdaginn