Astraltertugubb

Því má hér við bæta að fyrir tæpum þremur áratugum gerðist sá atburður hér á landi, að íslenskur söngflokkur varð vitni að heimsókn geimvera. Þetta átti sér stað seint að kvöldi, langt úti á landsbyggðinni. Meðlimir söngflokksins héldu fram að þeir hefði séð hinar frægu Kizu geimverur, er gjarnan sáust hafa í frammi undarlegar líkamshreyfingar í þá daga. Yfirvöld voru treg til að leggja trúnað á söguna, enda höfðu meðlimir söngflokksins stundað söng og hljóðfæraslátt sama kvöld. Það vildi nefnilega brenna við að við slík tækifæri innbyrtu menn of mikið af rækjusamlokum og maltöli. Auk þess höfðu þeir ekki myndir máli sínu til staðfestingar. Að lokum fékkst staðfesting á sögu þeirra eftir að þeir höfðu lagt fram astraltertugubb sem sönnun.

Áhorfendur átu sönnunargagnið

Mold á Mars

Geimfuglinn Fönix lenti í gær á plánetunni Mars. Tilgangur ferðarinnar er að kanna gæði jarðvegs til notkunar í landbúnaði, sem og að kanna hvort sífrerinn á norðurskautinu kunni að gefa möguleika á frumstæðu lífi. Þá yrði stefnt á að þar risu höfuðstöðvar Framsóknarflokksins.

Fyrstu myndirnar sem bárust í nótt gáfu mönnum tilefni til bjartsýni. Þær bera greinilega með sér að á Mars er að finna mold. Þó á eftir að efnagreina hana. Hugsanlega þyrfti síðar að senda annan leiðangur, áburðardreifarann Alexis, til að bæta gæði moldarinnar.

Félagsmaður Framsóknarflokksins, sem blaðamaður Bergmálstíðinda ræddi við í morgun, segir það nefnilega málið að Framsóknarflokkurinn íslenski nenni ekki að hugsa um Evrópusambandið vegna þess að þar hugsi menn um Alheimssambandið. Þó sé ekki ljóst nú hver niðurstaða ferðar Fönix verði. Það muni hinsvegar verða ljóst í sumar þegar landsfundur flokksins fer fram, undir Snæfellsjökli. Þá verði fyrst ljóst hvort Framsóknarflokkurinn fari í alheimsútrás.

Fyrstu myndirnar frá Mars

Íslendingur hannaði sólvindmæli

Geimrannsóknafarinu Gazella var skotið á loft í morgun. Tilgangur farsins er að rannsaka sólvinda og hugsanlega sólfellibyli. Mun farið stefna til sólar og fara tvo hringi umhverfis hana áður en það síðan hrapar á hana og brennur upp.

Íslenskur vísindamaður, Páll Haraldsson, hannaði vindmæli þann sem er aðalmælitæki Gazellunnar. Páll segist hafa byggt á hollenskri hönnun, nema hvað breyta þurfti nokkrum atriðum til að mælirinn réði við aðstæður í geimnum.

 

 

 

Hér sést mælir Páls

Ó-hefðbundnar lækningar

Það kemur ekki á óvart, sú þróun að bakteríur verði sífellt ónæmari fyrir sýklalyfjum. Frá því maðurinn uppgötvaði sýklalyfin hafa þau verið einhverskonar allsherjarredding við hverskonar bakteríusýkingum. Nú er ég ekki að mæla gegn sýklalyfjum. Vitanlega eru tilfelli þar sem sýking er það alvarleg að sýnt er að sjúklingurinn sjálfur, eða ónæmiskerfi hans, nái ekki að vinna bug á henni án inngrips. Inntaka sýklalyfs er inngrip í baráttu ónæmiskerfisins við vágestinn. Þar er tekið fram fyrir hendurnar á líkamanum sjálfum að yfirbuga innrásarliðið og í leiðinni að styrkja ónæmiskerfi sitt.

Ég held að lyftingakappi myndi seint bæta eigin árangur fengi hann aldrei að taka á lóðunum sjálfur heldur mættu alltaf aðstoðarmenn sem lyftu fyrir hann.

Þetta leiðir huga minn einnig að svokölluðum 'óhefðbundnum' lækningum, sem í raun eru mun hefðbundnari en hin viðurkenndu vestrænu læknavísindi. A.m.k. hafa þannig lækningar verið stundaðar mun lengur. Það má samt hinsvegar varla nefna slíkt á nafn án þess að hinir 'beturvitandi' fræðingar ésúi sig í bak og fyrir og froðufelli. Hvers vegna? Jú, vegna þess að í margar eða flestar hinna 'hefðbundinna' lækninga hafa ekki verið vísindalega staðfestar. Þ.e.a.s. að menn hafa ekki getað sýnt fram á að það sé nákvæmlega 'þetta' eða 'hitt' sem orsaki lækninguna, enda ekki hagsmunir þeirra sem fjármagnið hafa að fá fram sannanir í þeim efnum. Jafnvel þótt sýnt sé að sjúklingar læknist þá geta menn, í ljósi þess að sönnun liggi ekki fyrir, véfengt árangurinn. Sagt hann til kominn vegna þess að sjúklingurinn trúði á meðalið, en ekki að meðalið sjálft hefði læknað.

En skiptir það öllu máli? Ef ég eða barnið mitt veiktist og fengi lækningu, væri mér svo gersamlega sama hvað olli henni. Lækningin er það sem máli skiptir. Varla færi ég að bölsótast yfir henni, vegna þess hún væri ósönnuð?

Ég er hvorki sérfræðingur í læknavísindum, né 'óhefðbundnum' lækningum. Ég veit þó að heitið 'óhefðbundnar' lækningar er notað yfir allt annað en þær vestrænu og svo mjög vísindalegu. Allt frá andakukli til hómópatíu. Þó er þar himinn og haf á milli. Ég veit t.d. að hómópatía miðar að því að virkja ónæmiskerfi líkamans til að berjast sjálft við sjúkleikann, en ekki að vera inngrip. Ég hef líka orðið vitni af of mörgum kraftaverkum hómópatíunnar til að ég geti bara afneitað henni vegna þess það vanti sannanir. N.B. er ég ekki hómópati sjálfur.

Hugtakið 'black box' er víða notað um eitthvern hlut, forrit eða tæki t.d., sem fær eitthvað inntak og skilar einhverju út, án þess að liggi fyrir hvað gerist inni í því. Þannig kýs ég að líta á lækningar. Mér er gersamlega sama hvað gerist í lækningaferlinu, eða af hverju það virkar. Meðan inntakið er sjúkleiki og úttakið heilbrigði er ég sáttur. Er það ekki það sem málið ætti að snúast um? Árangur.

Þróun ónæmis gegn sýklalyfjum hafin hér

Kílóið

Bergmálað úr borunni #2

Nú berast þær fregnir að Þjóðverskir vísindamenn vinni hörðum höndum við að endurskilgreina kílógrammið. Starf vísindamannanna hefur farið afar leynt og hafa bæði fjölmiðlar og fræðimenn velt vöngum yfir í hverju hin breytta skilgreining verði fólgin.

Eins og hvert mannsbarn veit er núverandi skilgreining kílós miðuð við platínusívalning sem geymdur er í hvelfingu rétt utan við Parísarborg, í Frakklandi. Er skilgreining þessi m.a. sú að eitt kílógramm skuli vera sama þyngd og þúsund grömm.

Ýmsar hugmyndir hafa skotið upp kollinum um hver hin nýja skilgreining muni verða. Fyrst skal þar nefna hugmyndir Þjóðverja sjálfra að platínusívalningurinn skuli ekki geymdur í hvelfingu utan við París, heldur skuli hann geymdur í kjallara þýska ríkislistasafnsins í Berlín. Við það eitt muni kílóið minnka um hálft gramm.

Önnur hugmynd og öllu nýstárlegri, hafa Rússneskir, Ástralskir og Þýskir fræðimenn sett fram. felst hún í að miða við meðalþyngd sílíkonbrjósta. Hugmynd þessi virðist hafa hlotið talsverða hylli. Reyndar er tímafrekt verk að mæla þyngd allra sílíkónbrjósta í heiminum, enda hafa mælingar þegar staðið yfir í fimm ár. Reyndar hefur ekki skort sjálfboðaliða til að framkvæma mælingarnar, en erfiðara hefur verið að hafa uppi á öllum konunum.

Þrátt fyrir það sem að framan greinir er þó þriðja hugmyndin líklegust til að verða ofan á. Hún byggir á þeirri einföldu reikniaðferð að miða annaðhvort við þúsund grömm af gæsafiðri, eða þúsundasta part úr tonni af blýi.

Kílóið endurskilgreint

Bylting í veðurvísindum - staðbundnari veðurspár

Það er aldeilis að veðurvísindunum fer fram. Að sjá fyrir staðbundið óveður eins og milli Borgarness og Hvanneyrar, sem eru ekki nema örfáir kílómetrar í beinni línu.

Ég hlakka til að fá fleiri og staðbundnari veðurspár, s.s. hvernig veðrið verður á Laugavegi, milli Barónstígs og Klapparstígs.

Varað við stórhríð

Skilgreiningin á heilum hellingi

Þar sem spekingarnir hafa hótað miklu frosti (~ -15° C), síðar í vikunni, fannst mér rétt að fara á bensínstöð að láta mæla frostþolið á bílskrjóðnum. Bensínkallinn tók dropa úr vatnskassanum og setti í stafrænt hátæknimælitæki sitt. Bar það upp að auga sínu og kvað upp sinn dóm. "Þetta þolir heilan helling." "Hmm  ok" sagði ég. "Þolir hann þá undir fimmtán gráðum, eins og spáð er?" spurði ég. "Jájájá" svaraði bensínkallinn.

Þar með lýsi ég hér með yfir að með nýtízku rafeindabúnaði, hefur fengist staðfest að heill hellingur er lægri tala en -15. Hver hún er nákvæmlega, á eftir að rannsaka nánar. Þó er hér óneitanlega um tímamótauppgötvun að ræða.

Blessaður kuldaboli

Það er bara verst að fjandans snjóinn hefur ekki tekið nægilega upp enn. Allt í lagi með blessað frostið, með tilheyrandi sultardropum og almennu nefrennsli. Allt er betra en helvítis snjórinn, uppfinning andskotans.

Kuldatíð framundan

Minnir mig á það...

Þegar ég las þessa frétt um hið gígantíska svarthol sem gleypir allt sem það kemst í tæri við, mundi ég að styttast fer í skattframtalið.

Gríðarstórt svarthol fundið

Stærðfræðileg tjara

V+(G-g) x TN
_____________
   M x FN

Greinilegt að eftir því sem útkoman er hærri tala, þeim mun verri er dagurinn.
Það vantar reyndar alveg skilgreiningu á skölun breytanna.
Hve hátt getur V orðið? Getur það verið neikvæð tala?
Eins er með breytuna M.
Ég gef mér gildin frá 0 til 10, þar sem 0 er gott og 10 slæmt.
Fyrir G og g, set ég upphæðir í krónum. g táknar væntanlega nettó laun.
Í TN táknar T væntanlega fjölda daga frá jólum og N táknar væntanlega fjölda svikinna áramótaheita.
Í liðnum FN, táknar F væntanlega löngunina (gef mér frá 0 til 10) og N fjölda aðgerða sem grípa þarf til.

Þá er að reikna...
Byrjum undir strikinu.
M = 8 (er ansi góður þessa dagana)
F = 8, N = 0 (sé enga þörf á aðgerðum, er í góðum málum). Þar af leiðir að FN = 0.

Ekki þarf að reikna frekar því þar sem FN = 0 verður M * FN = 0.
Jafnan hefur því enga lausn, í mínu tilfelli.

Líklega hefðu forsendurnar að vera aðrar, s.s. að nota skalann frá 1 - 10.
Það er hinsvegar ekki ásættanlegt því þá hefði ég neyðst til að setja inn 1 fyrir N í FN.
Þá væri ég að segja að ég teldi þörf á a.m.k. einni aðgerð, sem er ekki satt og rétt.

Því tel ég jöfnu þessa tóma tjöru.

þessi frétt hefði átt að vera undir öðrum flokki en vísindum og fræðum. T.d. undir flokknum tilgangslaus tjara.

Versti dagur ársins í dag