Hann eyddi allri símnúmeraskránni

Guðmar Magnasson steypubílstjóri hefur kært lögreglumann fyrir að hafa eytt gögnum úr síma sínum.

„Ég var bara þarna að tala við hann þegar hann rífur af mér símann og fer að fikta í honum. Ég reyndi að ná símanum aftur og rifnaði nýja LaCoste treyjan mín við þau átök. Að lokum, þegar ég fékk símann aftur, var símnúmeraskráin tóm“ segir Guðmar. „Þegar ég uppgötvaði þetta fór ég fram á að hann gæfi mér upp númerið sitt, en hann neitaði mér um það“ bætir Guðmar við og þykir heldur hart hafa verið gengið á rétt sinn. „Mér þykir ansi hart að vera búinn að glata öllum mínum númerum, hvort heldur er númerið hennar mömmu, hennar Lóló á Laufásveginum, eða á Goldfinger. Númer sem ég þarf oft að hringja í.“

Bergmálstíðindi leituðu svara hjá lögreglustjóra höfuðborgarsvæðisins, sem ekki vildi tjá sig um málið.

Heimildarmaður innan lögreglunnar, sem ekki vill láta nafn síns getið segir að málið sé persónulegt. Þeir, Guðmar og umræddur lögreglumaður, hafi verið að deita á laun um hríð, en lögreglumaðurinn hafi viljað slíta sambandinu. Hann hafi beðið Guðmar að eyða símanúmeri sínu úr síma sínum, en Guðmar hafi þvertekið fyrir það. Guðmar hafi verið að senda sms allar nætur og kona lögreglumannsins hafi verið hætt að lítast á blikuna. Því hafi lögreglumaðurinn viljað enda þetta. Þegar Guðmar hafi ekki viljað eyða út númerinu hafi lögreglumaðurinn ekki séð annan kost en að taka til sinna ráða og eyða númerinu út sjálfur. Það hafi verið fyrir slysni að allri símnúmeraskránni hafi verið eytt.

Er Bergmálstíðindi báru ofangreindar upplýsingar undir Guðmar vildi hann ekki tjá sig frekar um málið.

Lögreglan eyddi gögnum af farsíma

Heilbrigðisbissniss

Sjúkrahúsin á SV-horni landsins hafa ákveðið að draga stórlega úr þjónustu sinni yfir sumarið.

Ástæðurnar eru margar, að sögn heilbrigðisyfirvalda.

Til að mynda er það þekkt staðreynd að kynhvöt fólkst á SV-landi er engin, þrjá seinusti mánuði ársins. Því er ekki talin þörf á að halda fæðingardeildum opnum yfir síðari hluta sumars.

Vegna niðurskurðar verður einungis 15 rúmum, af 40, á hand- og lyflækningadeildum haldið opnum yfir sumarið. Þeir sjúklingar sem liggja nú í þeim rúmum sem verður lokað, hafa frest til 15. júní til að koma sér framúr. Að öðrum kosti verða þeir innlyksa í rúmum sínum til 15. ágúst.

Allar skurðstofur verða lokaðar frá miðjum júní og fram í miðjan ágúst, þar sem ljóst þykir að alvarleg tilfelli, s.s. illkynja æxli, koma ekki upp að sumarlagi.

Samdráttur verður í þjónustu endurhæfingarsviðs. Þó er gert ráð fyrir að 26 legurými verði opin, en megináhersla verður lögð á að halda opnum stand- og seturýmum.

Bergmálstíðindi leituðu skýringa hjá heilbrigðisráðherra. Hann segir þetta til marks um þá staðreynd að heilbrigðisbissniss sé ekkert öðruvísi en hver annar bisniss. „Ef menn eru ekki að græða nóg, verða menn að hagræða“ segir ráðherra. „Mikils misskilnings hefur gætt lengi í þjóðfélaginu, um að heilbrigðiskerfið sé þjónusta við borgarana. Eitthvað sem menn hafa kallað velferðarkerfi. Ég veit ekki til að hér hafi nokkurntímann verið rekið neitt slíkt kerfi.“

Dregið úr starfsemi sjúkrahúsa

Engum til framdráttar

Svona talsmáti er engum til framdráttar. Fyrir utan að lýsa mikilli heift og dónaskap, lýsir hann jafnframt kunnáttuleysi skrifara í stafsetningu. Mér sýnist annað hvert orð textans vera rangt stafsett. Þriðja atriðið er að þarna er farið með fleipur. Rögnvaldur Freymóðsson, niðursetningur á Ytri Brekku í Skútustaðahreppi, er stærsti hálfviti Íslands og hefur borið þann titil til margra ára.

 

 

 

 

 

 

 

 

Rögnvaldur ásamt lagskonu sinni, henni Jófríði Jörgensdóttur.

„Gerðu þjóðini greiða og skjótu þig"

Spáð er afleitu sumri

Veðurstofan hefur gefið út yfirlýsingu.

„Vor er í lofti, en hvorki á láði né legi. Því er ljóst að einungis þriðjungur vorsins er kominn og óvíst um hvort vori meira. Sú staðreynd að ekki frysti s.l. nótt eykur líkurnar á vor- og sumarleysi til muna.“

Spáfuglar Veðurstofunnar, þau Lóa Gunnarsdóttir og Þröstur Pétursson, segja yfirgnæfandi líkur á að líklega vori ekki frekar. Það megi best sjá á gæðum mjólkurafurða, sem væru svo að segja fitusnauðar um þessar mundir.

Árni Björnsson, veðurfræðingur, segir fostleysið í nótt vera lykilatriði varðandi hvort komi vor og sumar. „Þau eru ekki úr lausu lofti gripin, visindin með samhengi næturfrosts og tíðafars“ segir Árni. „Þau byggja á reynslu forfeðranna. Eins og allir vita frystir ekki á þessum tíma suður í löndum. Allir vita hve slæm sumurin eru þar, á Mallorca og á Florida.“ 

Vor í lofti

Húsmæðratíðindi á krossgötum

Það er ekki laust við að sprengju hafi verið varpað í íslenskt samfélag í dag, þegar tilkynnt var að nýr ritstjóri Húsmæðratíðinda hafi verið ráðinn.

Húsmæðratíðindi hafa liðna áratugi þótt eitt merkasta dagblað hér á landi og þótt stimpill um sannleiksgildi frétta.

Herborg Hreiðarsdóttir hefur stýrt Húsmæðratíðindum frá upphafi, eða í ein 53 ár. Hún hefur þótt hafa sýnt fádæma stefnufestu og áræðni. Ekki síst á sjöunda áratugnum er íslenskar húsmæður börðust hvað harðast fyrir að fá fatasnið í íslensk blöð, hafandi þurft að leita til Bo bedre og Femina til þess. 

Nú ber til tíðiðinda. Herborg mun um næstu mánaðamót stíga niður úr stól ritstjóra og Guðfinna Garðarsdóttir mun taka við ritstjórn blaðsins.

Í viðtali við Bergmálstíðindi segir Guðfinna að megin stefnu Húsmæðratíðinda verði haldið til streitu, enda hafi blaðið tryggt sig í áranna rás. Helstu áherslubreytingarnar verði á þá vegu að meira verði tekið fyrir af borðbúnaði, án þess þó að fatasnið verði tekin út.

„Silfurstellið er ekki síður mikilvægt en dúkarnir“ segir Guðfinna. „Eins þykir mér rétt að koma að fleiri uppskriftum, góðum ráðum við þvotta, sem og öðrum kvennamálum“ segir Guðfinna að lokum.

Bergmálstíðindi vilja óska Guðfinnu velfarnaðar í komandi starfi.

Nýr ritstjóri hlakkar til

Heppinn!

Þrjú hundruð þúsund til milljón! Sá er heppinn að hafa ekki framið alvarlegri glæp en þennan. T.d. að hafa framið meiðyrði gegn bissnissmanni. Þá værum við að tala um tugi milljóna.

Minnir mig á auglýsinguna...

Hann svívirti 'bara' sex börn og slapp með skrekkinn. Heppinn.

Braut gegn sex ungum stúlkum

Um viðrun stefnuljósa og raus um ljósabúnað bifreiða

Ljósabúnaður bifreiða getur stundum verið fagur á að líta. Þó er tilgangur hans ekki þess eðlis að vera skraut. Tilgangur hans er er fyrst og fremst að vera leiðbeinandi fyrir aðra í kring um mann.

Eiginlega eru háu ljósin (og kannski þokuljós að framan) einu ljósin sem ætluð eru fyrir ökumann bifreiðarinnar sjálfrar, til að sjá fram á veginn í niðamyrkri. Lágu ljósin kannski að hluta til, en þau veita afar takmarkaða lýsingu og gegna því frekar því hlutverki að þeir sem mæti bílnum sjái hann.

Öll önnur ljós bifreiðarinnar hafa þann tilgang að leiðbeina hinum. Afturljósin eru kannski ekki alltaf sjálfvirk en [eiga að] loga allan tímann sem bifreiðin er í gangi. Bakkljós og bremsuljós eru, sem betur fer, sjálfvirk. Bakkljósið kveiknar um leið og bifreiðin er sett í bakkgír og gefur þá þeim sem aftan við bílinn er vitneskju um að nú verði bílnum bakkað.

Bremsuljósin kveikna að sama skapi um leið og stigið er á bremsuna. Þótt tæknilega séð segi ljósið að nú sé verið að bremsa, en ekki að viðkomandi sé í þann mund að fara að bremsa, er það þó þannig að sjaldnast nauðhemla menn og því gefur ljósið, þeim sem fyrir aftan er, góða vitneskju um að nú skuli hann jafnframt hægja á sér ætli hann ekki að lenda aftan á þeim sem fyrir framan er. Til að forðast nauðhemlunartilfellið eiga menn vitanlega að hafa nægilegt bil milli bílanna, miðað við hraða þeirra.

Stefnuljósin eru aðeins annars eðlis. Tilgangur þeirra er að láta aðra vita að maður sé í þann mund að fara að beygja. Ekki að maður sé að beygja. Menn hafa ekki fundið tæknilega lausn á að gera stefnuljósin sjálfvirk. Því er það algerlega undir ökumanninum komið að nota þau rétt. Öryggismarkmið stefnuljósa kann þó að vera óljóst, a.m.k. í mínum huga. Að mínu mati eru tilgangur stefnuljósa fyrst og fremst sá að liðka fyrir umferðinni. Vissulega má segja að það snerti öryggi að gefa stefnuljós ætli maður sér að skipta milli akreina, en þó finnst mér liðkunarelementið vega þyngra. Til þess að það virki sem slíkt verða menn að nota stefnuljósin rétt. Annars geta þau gert meira ógagn en væru ekki notuð yfir höfuð. Fólk notar gjarnan stefnuljós til að gefa þeim sem fyrir aftan er merki um að honum sé óhætt að taka fram úr. Eins gefur fólk stefnuljós tímanlega áður en það beygir, eða hvað? Þar kemur að þeirri spurningu um gagn og ógagn.

Ef allir gæfu stefnuljós tímanlega áður en þeir beygðu inn í aðra götu og einhver biði við gatnamótin og biði þess að komast inn á, vissi sá er biði að honum væri óhætt að fara strax inn á gatnamótin. Þannig liðkar fólk fyrir. Hinsvegar er allt of algengt að fólk annaðhvort gefi ekki stefnuljósið eða allt of seint (þegar byrjað er að beygja) og láta þ.a.l. þann sem bíður bíða lengur en annars þyrfti. Hitt er öllu verra. Þegar fólk fer að viðra stefnuljósin sín. Er með stefnuljósin blikkandi, til merkis um að það ætli sér að beygja, en beygir svo ekki. Það getur valdið hættu. Oft, vegna þessa, treystir fólk ekki stefnuljósum og bíður með að aka inn á gatnamót eða inn á götu. Þar er tilgangur stefnuljósanna fyrir bí.

Ég var einmitt áðan á heimleið úr vinnunni. Beið eftir að komast inn á götu, út af bílaplani. Ætlaði að beygja til hægri inn á götuna og beið eftir umferðinni sem kom frá vinstri. Þar kom bíll með blikkandi hægra stefnuljós, sem sagði mér að viðkomandi ætlaði sér að beygja inn á planið sem ég var að fara út af og ég dreif mig þess vegna inn á götuna. Þá ók hann bara áfram og ég þakka fyrir að hafa ekki fengið hann inn í hliðina á bílnum mínum.

Ég vil af þessu tilefni biðja alla þá sem skreppa vilja út að viðra stefnuljósin sín að gera það á lokuðu svæði.

Tími til kominn

Loksins bregst lögreglan við þessum endalausu lautarferðum Sandskötunnar á vegum landsins. Ég gef mér að ekki hafi verið gripið til táragassins og bareflanna nema annað hafi verið reynt fyrst. Það nær ekki nokkurri átt að hópur fólks geti stöðvað umferð heiðvirðra borgara trekk í trekk.

Lögregla beitir táragasi

Æsispennandi kosningar

Það er ljóst að kosningarnar milli Barack Obama og Hillary Clinton, í Pennsylvaníu, ætla að verða æsispennandi.

Obama var spáð 5% meira fylgi en Clinton. Eins ótrúlegt og það er, virðist Obama aðallega sækja fylgi sitt til svartra meðan Clinton á meira fylgi að fagna meðal hvítra. Helstu stuðningsmenn Obama eru heimadrengir, jazzspilarar og körfuboltamenn, meðan Clinton höfðar meira til embættismanna og tannsmiða.

Fáum sögum hefur þó farið af repúblikananum John McCain. Hann stendur í harðri baráttu við sjálfan sig og virðist ætla að merja sigur í New Hampshire. McCain hefur átalið fréttastofur fyrir einsleitan fréttaflutning og gefur lítið fyrir þau rök fréttamanna að barátta hans sé óspennandi.

„Ég er bara víst spennandi“ sagði McCain á blaðamannafundi í Boston fyrir skömmu. „Ég er alveg að rúlla yfir sjálfan mig og þarf ekki að standa í strögli eins og þau þarna kratarnir“ bætti hann við.

Úrslit í Pennsylvaníu munu verða ljós snemma í fyrramálið, er skrifstofa ritsímans opnar.

Mjótt á mununum

Er í alvöru til fólk...

...sem nennir að spá í þetta?

Fólk sem á sér ekki líf.

Vináttan orðin þvinguð