Auðvitað hefur allt verið planað

Ætli aðildarviðræður hefjist ekki strax á útmánuðum, ef ekki fyrr.

Eins og annað, innan Sjálfstæðisflokksins, hafa ákvarðanir verið teknar í reykfylltum bakherbergjum, eða reyklausum. Ákvörðunin um breytta stefnu í €vrópumálum. En vitanlega verður skipuð nefnd og allt fær hið fágaða og formlega útlit. Menn kunna sig alveg sko, enda mikil snyrtimenni þar á ferð.

Svo ég gerist ósamkvæmur sjálfum mér, sem tíska er um þessar mundir, verð ég að segja að ég græt leynimakksvinnubrögðin ekki svo mjög. Ég er nefnilega hlynntur aðildarviðræðum. Það er eina leiðin til að fá botn í hvort €vrópa sé málið fyrir okkur eður ei.

ESB býr sig undir umsókn frá Íslandi

Gat nú verið

Á að fara að láta hina ofurlaunuðu, svokölluðu talsmenn launþega, komast með puttana í aðgerðir til handa almenningi?

Mennina sem hvað harðast standa vörð um verðtrygginguna, sem étur upp sparnaðinn okkar sem fjárfestum í steinsteypu. Sömu menn leggjast gegn því að fólk geti nýtt sér séreignasparnaðinn til að koma sér úr kröggum. Með rökunum að aðeins sumir eigi séreignasparnað og þá síður hinir yngri.

Hvurslags rök eru það? Við hin erum líka launafólk.

 

Ég fæ óbragð í munninn þegar ég heyri eða sé þessa svokölluðu talsmenn launafólks.

Sveiattan.

Ræða við samtök um horfurnar

Næturvara hefur hækkað

Dagvara hefur hækkað um 30,6% milli ára. Mun hefðbundin matvara skipta þar mestu máli. Lítið hefur þó farið fyrir fréttum af hækkun næturvöru.

Hækkun á nætursnarli mun vera um 25% en mest vegur þó hækkun á smokkum, sem mun vera um 42% milli ára. Sala þeirra hefur jafnframt aukist um 15,5%

Áfengi, sem í sumum tilfellum flokkast sem dagvara, en í flestum tilfellum sem næturvara, hækkar um 16,9% Þó hefur dregið úr neyslu þess, eða um sömu 15,5% og söluaukning smokka nemur.

Niðurstaðan er að fólk virðist vera vera í auknum mæli farið að stunda kynlíf allsgáð.

Dagvara hefur hækkað um 30,6%

Hagsmunir

Til að fyrirbyggja misskilning, vil ég taka fram að ég er heilshugar fylgjandi banni á klasasprengjum.

Hinsvegar datt mér bara sisona í hug gagnrýni íslendinga á þjóðir innan hvalræðisráðsins sem hafa engra hagsmuna að gæta vegna hvalveiða.

Auðvitað er okkur umhugsað um líf og heilsu fólks úti í heimi, en er samt ekki skondið að utanríkisráðherra Íslands sé að blanda sér í málið þar sem við höfum engra beinna hagsmuna að gæta? Heitir það ekki hræsni?

Svo má fólk deila um hver hræsnar. Við eða hvalræðissinnar.

bara pæling

„Hugsaðu þér hvað væri nú gaman, ef við bara héldum áfram og gæfum í“

Dofri Hermannsson dró fram gullkorn.

Viðtalið við HHG verða allir að sjá!

Vinstri græn að opna á €vrópuaðild?

„Vinstri græn opna á ESB-aðild á flokksráðsfundi - stefnan trúlega sett á aðildarviðræður.“
Svona er fyrirsögn fréttar á Eyjunni, sem kemur upprunalega úr Fréttablaðinu.

Gott ef satt er. Hverju svo sem aðildarviðræður myndu skila, er löngu tímabært að hætta innantómum fullyrðingum um hitt eða þetta og fá hlutina upp á borðið í eitt skipti fyrir öll.

Hvernig var annars umræðan í kring um EES? Þá voru málaðir hinir ýmsu skrattar á alla veggi. Hingað áttu að þyrpast útlendingar að kaupa upp allt og alla.

Nú, verði niðurstaða viðræðna tóm spæling og á þann veg að auðlindirnar verði allar undir stjórn Evrópusambandsins, verður aðild líklega felld hvort eð er í þjóðaratkvæðagreiðslu.

Fyrsta skrefið er að setjast niður með þessu liði og tjatta yfir nokkrum vínarbrauðslengjum.

Ef VG markar nýja stefnu í málinu, er ekki spurning að Samfó á að koma sér úr meðvirknishjónabandinu svo kjósa megi sem fyrst og mynda ríkisstjórn sem setur aðildarviðræður í gang strax. Ekki seinna vænna meðan þau njóta enn einhvers fylgis. Það mun bara minnka jafnt og bítandi með hverri vikunni úr þessu, verði engin breyting á.

Björgunaraðgerðir ríkisstjórnarinnar

Nú blæs ríkisstjórnin í lúðra. Nú skal bjarga fyrirtækjum landsins sem eru að kikna undan skuldum, eins og annar hver einskalingur gerir reyndar líka um þessar mundir.

Allt gott um það að segja. Að fyrirtæki geti haldið áfram rekstri er mikilvægt. Það skiptir máli fyrir atvinnuástandið og að halda efnahagsapparatinu gangandi.

Hvað er hinsvegar að frétta af nokkurra vikna lúðrablæstri um að bjarga einstaklingum og heimilum landsins?

Reyndar má ekki hreyfa við verðtryggingunni, sem öðru fremur étur upp eignir landsmanna. Eignir sem gætu sko komið sér vel að eiga í ellinni. Geta selt stórar eignir fyrir minni og leyst þar með út einhverjar summur. Nei, það má ekki hreyfa við verðtryggingunni því þá gæti lífeyrissparnaðurinn rýrnað (öööhh). Sparnaðurinn í lífeyrissjóðunum, sjáið til. Þessi sem menn halda fram að verðtryggingin verji. Þessi lífeyrissparnaður í feitu lífeyrissjóðunum sem hefur um árabil verið óvarlega ávaxtaður í hluta- og verðbréfum. Oft með neikvæðri ávöxtun. Svaka verðtrygging það

Nei. Verðtryggingin er heilög og því brenna eignir okkar upp og tómt mál að tala um að gera sér von um að geta notið þeirra á ævikvöldinu.

Einhversstaðar var minnst á að bjóða fólki að leysa út séreignasparnaðinn. Það kæmi sér víða vel að geta losað um smá reiðufé og slegið á skuldirnar. Stungið upp í gammana sem bíða við útidyrnar eftir að leysa til sín húsnæði fólks.

Nei, það má ekki heldur. Verkalýðsforingjarnir okkar ætla að sjá til þess. Þessir sem í hinu orðinu segjast vera að vinna fyrir almenning. Nei, nei. Miklu betra bara að frysta afborganir svo vextirnir geti laggst ofan á verðtryggðan höfuðstólinn. Tendra enn frekar bálið sem brennir upp eignirnar.

En aftur að fyrirtækjunum. Þar er talað um að breyta skuldum í eigið fé. Mér dettur í hug eldgamall Spaugstofuskedds þar sem talsmaður loðdýrabænda, sem þá börðust í bökkum, talar um skuldbreytingu. „Breyta skuldunum í gróða. Þá er hægt að fara að reka þetta að einhverju viti.“

Mætti ég biðja um að mínum skuldum verði breytt í eigið fé? Það kæmi sér afar vel akkúrat núna.

Ég gæti vel þegið, á sama tíma, að losna við skuldirnar og fá svolítið meira eigið fé til ráðstöfunar.

 

Ehaggi?

Bjarga á fyrirtækjunum

Talnaleikir

Fréttin af aukinni ánægju með stjórnarandstöðuna er gott dæmi um hvernig leika má með hlutfallstölur. Með hlutfallstölum má auðveldlega snúa lygi í sannleika og öfugt.

Fyrirsögn fréttarinnar „Ánægja með stjórnarandsöðu vex“ má svo sem réttlæta á þann hátt að hlutfall þeirra sem segjast ánægð með stjórnarandstöðuna hafi hækkað frá síðustu könnun. Það segir hinsvegar ekki nema hálfa söguna. Það þarf alls ekki að þýða að ánægja með hana hafi aukist, heldur aðeins að óánægja með stjórnina hafi aukist. Reyndar kemur einmitt fram sú staðreynd í sömu frétt; „Hlutfall þeirra sem segjast óánægðir með störf stjórnarandstöðunnar hefur hinsvegar líka hækkað á sama tímabili, því 35% segjast nú óánægð.“

Er ekki málið einfaldlega að þriðji hópurinn hafi stækkað mest?

„Stærstur hluti svarenda, 38%, er þó á þeirri skoðun að stjórnarandstaðan myndi hvorki standa sig betur né verr en núverandi ríkisstjórn.“

Ánægja með stjórnarandstöðu vex

Enn vefjast talningar fyrir blaðamönnum

Eða lögreglunni, eða hverjum þeim sem telja.

Ekki veit ég hvor talningin er réttari, moggans eða vísis. Þó er ljóst að þegar talað er um nokkur hudruð, er um að ræða færri en þúsund. Eins þegar talað er um þúsundir er um að ræða tvö þúsund eða fleiri.

Þarna munar a.m.k. 100%

Er það ekki full mikil skekkja?

Þjóðfundur á Arnarhóli

Hægðaleikur lögreglunnar

Lögreglan þurfti að hafa afskipti af þremu mönnum í gær vegna hægða.

Sá fyrsti, mun vera góðkunningi lögreglunnar. Hann hafði gengið örna sinna á Austurvelli. Hann var settur inn og látinn sofa úr sér skituna.

Sá næsti mun hafa kúkað á leiði í kirkjugarðinum við Suðurgötu. Sá var einnig settur inn og látinn sofa úr sér skituna.

Sá þriðji var ráðherra og hafði skitið upp á bak sér. Honum var sleppt eftir að hafa skolað á sér herðablöðin. Mun hann halda áfram skitu sinni strax eftir helgina.

Gekk örna sinna í runna á Austurvelli