Brúin yfir Kwai fljótið var opnuð í dag

Hinni áralöngu brúarsmíði yfir Kwai fljótið, lauk í gær.

Mikið var um dýrðir er forseti Kína Wanhg Su Kim opnaði brúna.

Kwai fljótið og brúarsmíðin varð fræg í kvikmynd Kawasakis um brúna yfir vatnið.

Ríkisstjórn Íslands hefur nú þegar sent hinni Kínversku frelsiselskandi ríkisstjórn kærar kveðjur

Ein lengsta brú í heimi opnuð í Kína

Fljúga hægar = spara bensín

Flugfélögin hafa í ríkari mæli leitað leiða til að spara eldsneyti. Nokkur atriði hafa verið týnd til.

1) að hætta að fljúga. Sem hefur ekki fengið miklar undirtektir.

2) að fljúga með tómar vélar. Sem hefur ekki heldur ekki fengið miklar undirtektir.

3) að fjúga hægar. hefur fengið athygli

Í tillögum alþjóða flugnefndarinnar er mælst til að flugvélar fljúgi á 30 Km hraða, sem þykir hagkvæmur. Þessu mótmæla flugfélög sem segja 250 Km hraða vera lágmarkshraða þota, eigi þær að haldast á lofti. Talsmaður þotunefndar ríkisins, sem er bókmenntafræðingur að mennt,  segir þetta tóma tjöru, enda hafi Tolstoj sannað mál sitt. Hvernig svo sem það er nú fundið út.

Fljúga hægar og spara eldsneyti

Umgengni við börnin okkar

Öfund er vond tilfinning og ef hún bærir á sér drep ég hana í fæðingu. Hún er niðurdrepandi og innanétandi viðbjóður, sem eitrar allt í kring um sig.

Það að sjá gott í fari annarra eða að hrífast að tækifærum eða lífsháttum annarra þarf ekki endilega að brjótast út í formi öfundar. Til er nokkuð sem heitir að samgleðjast.

Ég samgleðst t.d. vini mínum sem á þess kost að vera með stráknum sínum oftar en bara aðra hverja helgi. Ég veit að það styrkir ekki bara samband hans við strákinn, heldur ekki síður samband stráksins við föður sinn. Það er þeim báðum til góðs að eiga náið og ástríkt samband. Ég öfunda hann ekki en ég er fullur þakklætis að vinur minn eigi þennan kost. Segir líklega mikið um mannkosti barnsmóður hans, sem gæti, hefði hún vilja til, takmarkað aðgang hans að syni sínum og aðgang sonarins að föður sínum. Ég veit að hann tekur tímann með stráknum sínum fram yfir allt annað.

Sem betur fer fyrirfinnst heilbrigt hugsandi fólk.

Gætum hófs

Félag hestamanna hvetur aðildarfélög sín að gæta hófs, enda fari nú í hönd járnun hesta, eftir veturinn. Að sögn samtakanna eru hófar sérstaklega viðkvæmir á vorin og skipti miklu máli að járnun takist í fyrstu tilraun. Hestamannafélagið 'What a yeah, hófar', sem á aðild að Félagi hestamanna,  hefur þegar lokið járnun og tekur undir yfirlýsinguna og segir að aðgát skuli höfð í nærveru hófa.

Hvetur fyrirtæki til að gæta hófs

Enduruppsetning fyrstu forsetatölvunnar lokið

Ólafur Ragnar Grímsson, forseti Íslands, mun á morgun taka á móti forsetatölvu frú Vigdísar Finnbogadóttur, sem nýlega hefur verið enduruppsett. Tölvan er i486 vél af gerðinni Packard Bell, frá árinu 1994.

Tölvan var gjöf þáverandi Bandaríkjaforseta, Bill Clinton, til frú Vigdísar. Tölvan er eign Þjóðminjasafns Íslands en mun verða geymd á Bessastöðum og notuð við hátíðleg tilefni.

Tölvan mun verða til sýnis á Bessastöðum klukkan 15 á sunnudag. Við það tækifæri mun jafnframt hópur félaga í Tölvunördaklúbbi Íslands heimsækja Bessastaði með gömlu tölvurnar sínar.

Tölvan er með Intel 486sx örgjörva og með 4MB minni, 512MB disk, 1MB skjákort, 14" SVGA skjá og innbyggðu 14.4Kbps mótaldi. Hún keyrir Windows 3.1 og er hlaðin forritum, ss Netscape 1.0 og Norton Disk Doctor.

Endurgerð fyrsta forsetabílsins lokið

Gengur dæmið upp?

Er hægt að fara inn á 780.000 vefsíður á 9 mánuðum, á vinnutíma? Fræðilega er það líklega hægt, en varla raunhæft.

Nú veit ég reyndar ekki hvernig vinnutíma Japana er háttað. Hve marga tíma á dag þeir vinna eða hve marga daga vikunnar. Gefum okkur, í gamni, að maðurinn hafi unnið alla daga, 10 tíma á dag. Til að einfalda dæmið segjum við að hver mánuður séu 30 dagar.

Þá eru 9 mánuðir = 270 dagar. 780.000 síður á 270 dögum eru 2.889 síður á dag. 2.889 síður á dag gera þá 289 síður á klukkustund, á 10 tíma vinnudegi, sem gera aftur 4,8 síður á mínútu. Síða á 12,5 sekúndna fresti.

Gerum við ráð fyrir að maðurinn hafi eytt tíma í að skoða síðurnar, en ekki bara flett og flett, hefur hann ekki bara haft lítið að gera í vinnunni. Hann getur ekki hafa gert nokkurn skapaðan hlut. Reyndar hlýtur hann að hafa þurft að vinna mikla yfirvinnu til að ná þessum 780.000 síðum á 9 mánuðum.

Horfði 780 þúsund sinnum á klám í vinnunni

Skák og mát

Forseti Skáksambandsins, Guðríður L. Geirsdóttir, hefur tilkynnt afsögn sína. Í tilkynningu sem hún gaf út í morgun segir hún orsök afsagnar sinnar vera heimaskítsmát gegn Benetict XVI páfa.

„Það er ljóst að forseti þarf að eiga í fullu té við páfann. Að tefla við hann er nokkuð sem allir eiga að kunna. Þegar ég þarf að láta í minni pokann þar, þykir mér tímabært að víkja“ segir Guðríður.

Nú fer í gang undirbúningur kosninga um eftirmann Guðríðar og búast má við spennandi kosningum. „Já, hraði og spenna er nokkuð sem einkennir skákina“ segir Guðríður. „það verður eflaust hamagangur í öskjunni í kosningunum. Ekki síður en við skákborðið.“

Þess má geta, í framhjáhlaupi, að páfi beytti indverskri vörn í skák sinni við Guðríði.

Guðfríður Lilja lætur af embætti forseta Skáksambandsins

Lúðrasveitin Ómar

Í dag heldur lúðrasveitin Ómar sína árlegu tónleika. Tónleikarnir eru að þessu sinni haldnir á Arnarhóli og hófust þeir klukkan 14.

Á dagskrá tónleikanna eru verk eins og Básúnukvartett Bachs, Einleikur fyrir túpu nr. 4 eftir Brahms og slagverksverkið Bumba og Symball eftir Ketil Sveinsson.

Lögreglan segir allt hafa farið vel fram, að mestu. Þrátt fyrir að í dag sé dagur mótmæla hafi lítið verið mótmælt.

„Það komu upp tvö atvik. Kona henti inniskóm í stjórnanda sveitarinnar, af svölum húss í grenndinni og ungur maður lagði vörubíl sínum á hólnum. Hann mun hinsvegar hafa talið hér væri fólk samankomið að mótmæla háu verði á frostlegi. Hann hefur þegar fært bíl sinn“ segir Ólafur Óliversson, lögregluvarðstjóri.

Lúðrasveitahljómur ómar

Strunzað í dag

Samtök strunsandi kvenna mun standa fyrir strunzgöngu í dag, í tilefni baráttudags verkalýðsins. Strunzað verður frá heilbrigðisráðuneytinu og upp á hlemm. Strunzgangan hefst klukkan 14.

 

 

Félagskonur á æfingu í morgun.

Allra vilji að leysa málið

Sest í hinn helga stein

Það mun verða mikið um dýrðir þegar Bjarni Búason búálfur mun setjast í hinn helga stein við Álfhólsveg í Kópavogi, síðar í dag.

Bjarni, sem á ættir að rekja í steininn, hefur alla sína tíð búið meðal manna.

„Móðir mín, í kví kví, fluttist brott úr steininum ung að aldri“ segir Bjarni. „Hún var í ástandinu. Það vita ekki allir að álfamær stóðu ekki síður í því en mennskar konur, enda fylgdu hermönnunum margir álfar.“

Móðurfjölskylda Bjarna mun taka á móti honum. Móðir hans lést fyrir fimmtán árum. Faðir Bjarna, sem var Bandarískur garðálfur, lést árið 1979. Föðurfjölskylda hans átti ekki heimangengt í dag.

„Nú er ég orðinn gamall og langar að eyða ævikvöldinu meðal míns álfafólks“ segir Bjarni að lokum.

Bjarni sest í helgan stein