Strunz

Samtök strunsandi kvenna strunsaði út frá sáttasemjara ríkisins, í dag.

Nú hefur félag kvenna á atvinnumarkaði, ásamt félagi sprautufræðinga hafið verkfall.

 

 

Sprautufræðingar sem og kvenmenn almennt munu hafa lagt niður störf sín.

Félag strunsandi kvenna skorar á ríkisstjórnina að gera eitthvað í málunum.

Frír bjór handa eldri körlum

Jesus de Erectos, bæjarstjóri í Puerto Varas í Chile, hefur fyrirskipað að öllum karlmönnum 65 ára og eldri skuli gefnir átta lítrar af bjór á viku. Forsaga þess máls mun vera sú að eldri konur bæjarins hafi ítrekað kvartað yfir áhugaleysi karlpeningsins. Eldri karlmenn hafi ekki sýnt þeim tilhlýðilegan áhuga, heldur hafi í auknum mæli leitað í yngra kvenfólk. Ástæðan muni ekki vera risvandadamál heldur fyrst og fremst að þær þyki ekki nægilega aðlaðandi. Í tilskipun de Erectos segir: „Vitað er að bjór hefur þau áhrif á neytandann að jafnvel ryðguð skófla verður áhugaverð. Því er reynandi sú leið að auka bjórdrykkju eldri karlmanna.“

Þar sem ofangreind tilskipun er nýútgefin liggja ekki fyrir tölur um ágæti hennar. Þó munu vera vísbendingar í þá átt að hún hafi gefið góða raun.

Eldri borgarar fá frítt viagra

Öflug 12 spora samtök

það er ekki ofsögum sagt að sprenging hafi orðið í starfi 12 spora samtakanna Al-Qaida. Haft er eftir Afgani Suranami, talsmanni samtakanna í Pakistan, að þar í landi hafi fundasókn fimmfaldast á jafnmörgum árum.

„Sprenging á vel við“ segir Suranami.

Al-Qaida eru systursamtök Al-Anon og annarra 12 spora samtaka sem starfrækt eru um allan heim. Elstu 12 spora samtökin eru AA. Þau voru stofnuð of félögunum Bill og Ted, árið 1935. Í upphafi nefndust samtökin Excellent journey, en heiti samtakanna var síðar breytt í AA þar sem hátt heimsmarkaðsverð á bréfsefni, í kreppunni, gerði stutt heiti hagstæðara.

Al-Qaida samtökin að eflast samkvæmt nýrri skýrslu

Það verður vetur í sumar

Eins og Bergmálstíðindi greindu frá nýverið taldi Veðurstofan litlar líkur á vori, þetta árið. Nú hefur Veðurstofan uppfært spá sína og segir það sýnt að ekki mun vora í ár. Því muni ekki koma sumar. Áfram er gert ráð fyrir hörðum vetri, eitthvað fram í júní. Þá muni hausta.

Allt á kafi í snjó fyrir austan

Viðvörun frá Veðurstofunni

Veðurstofan gaf út stormviðvörun í kvöld, þar sem varað er við hvössum vindi á Kjalarnesi, undir Hafnarfjalli, sem og á Stórhöfða.

Þessir þrír staðir hafa það sammerkt að þar eru vindmælar núllstilltir við 15 m/s.

Von er á  um 50 m/s á fyrrgreindum stöðum og eru eigendur hjólhýsa sérstaklega varaðir við að vera á ferli, hvort heldur sem hjólhýsið er með í för eður ei.

Varað við hvassviðri og slæmri færð

Sinueldur á salerninu

Það varð uppi fótur og fit á Slökkvistöðinni í Reykjavík í dag. Mikinn reyk tók að leggja um húsnæðið og fór eldvarnarkefið í gang. Reykkafarar voru sendir um húsið og fannst eldur á salerni á 2. hæð. Slökkviliðsstjórinn í Reykjavík, Gunnar Thorvaldsen, vill ekki gera mikið úr atvikinu en viðurkennir að vegna samdráttar í fjárveitingum ríkisins hafi Slökkvistöðin þurft að skera niður.

„Það er rétt. Við höfum þurft að skera niður og draga úr útgjöldum“ segir Gunnar. „Eitt af því er að við kaupum ekki lengur klósettpappír, heldur notumst við hamp. Hampurinn er þó frekar eldfimur.“

Orsök brunans er talið sú að í gær pöntuðu starfsmenn pizzur í hádeginu, með chilli og miklum jalapeño.

„Það er bara svona, þegar menn skila svona heitu fæði af sér. Þá þarf að gæta að örygginu“ segir Gunnar.

Í framhaldi þessa segir Gunnar að Slökkvistöðin muni endurskoða matseðil starfsmanna.

Sinueldur við slökkvistöð

Í upphafi skyldi endinn skoða

Það hefði Marc Kaplan, sælkeri í Bristol, betur gert áður en hann birti auglýsingu sína í Sunday Times.

Marc er mikill sælkeri og sérstaklega fyrir súkkulaði. Hann birti auglýsingu þar sem hann bauð konur að koma til sín að borða með sér súkkulaði.

Bergmálstíðindi náðu sambandi við Marc eftir margar tilraunir. 

„Stærstu mistökin voru að birta heimilisfang og símanúmer“ segir Marc. „Þið sjáið það sjálf. Þið náðuð ekki sambandi fyrr en eftir margar tilraunir. Það var alltaf á tali“ bætir Marc við. „Síminn hefur ekki stoppað í tvo daga og ég hef ekki getað sofið. Svo hafa tugir kvenna hreiðrað um sig við húsið mitt. Þetta er eins og á tjaldstæði.“

Blaðamaður spurði Marc hvað honum hafi gengið til með auglýsingunni.

„Ég var bara einmana eitt kvöldið og langaði í félagsskap. Mér datt í hug að auglýsa eftir súkkulaðigrís, vitandi að konur standast ekki súkkulaði. Þessu átti ég þó aldrei von á.“

Súkkulaðigrísa leitað

Er gróðureldi vonlaus atvinnugrein?

Það er von að menn spyrji sig þeirrar spurningar nú eftir nýjustu fregnir af gífurlegu tapi Gróðrastöðvar Hvaleyrar. „Það virðist ætla að verða með gróðureldi eins og fiskeldi“ segir Rúnar Geirfinnsson, framkvæmdastjóri GH. „Allt sem endar á eldi, endar eins og í eldi. Peningarnir fuðra upp“ bætir Rúnar við.

Bergmálstíðindi leituðu álits Ingimars Ögmundssonar, ráðgjafa, sem hefur sjálfur komið nálægt gróðureldi.

Aðspurður hvort hér á landi sé ekki rekstrargrundvöllur fyrir gróðureldi og þá hvers vegna, svarar Ingimar, „Nei, það er alveg ljóst að gróðureldi á Íslandi er dauðadæmt og fyrir því eru tvær megin ástæður. Fyrst og fremst er sú ástæða að Ísland er kulda- og rokrassgat og því er það hrein firra að reyna svo mikið sem að rækta einhverja jurt hér. Hin ástæðan er sú að Íslendingar kunna flestir ekki með peninga að fara og ættu að halda sig alfarið frá rekstri fyrirtækja, nema rekstrargrundvöllurinn sé tryggður. Svo sem eins og með flestan innflutning. Bíla- eða sælgætisumboð.“

Mikið tjón í gróðureldi

Nýju rökstólarnir komnir í notkun

Forsætisráðuneytið fékk fjárveitingu, á gildandi fjárlögum, til kaupa nýrra rökstóla. Nýju stólarnir voru teknir í notkun í dag. Rökstólarnir sem ráðuneytið hefur notað til þessa eru frá árinu 1966. „Það var löngu kominn tími til að endurnýja rökstólana“ segir forsætisráðherra, Geir H. Haarde. „Gömlu stólarnir eru löngu orðnir rökþrota og þ.a.l. ónothæfir“ bætir Geir við.

Gömlu rökstólarnir, sem eins og áður segir eru frá árinu 1966 voru smíðaðir á Smíðaverkstæði Haraldar, sem var lýst gjaldþrota árið 1982 og hefur þeim ekki verið haldið við síðan þá. Þó hafa gömlu stólarnir skilað sínu.

„Gömlu stólarnir voru t.d. notaðir í Höfða, þegar leiðtogafundurinn stóð yfir“ segir Geir. „Hefði ekki verið fyrir þá, hefði líklega lítið komið út úr þeim fundi. Í þjóðarsáttarsamningunum, árið 1990, voru svo mörg rök sett fram úr stólunum að þeir hafa verið rökþrota síðan. Því var löngu kominn tími til að endurnýja, enda rökleysi ríkisins orðið algert.“

Nýju stólarnir voru formlega teknir í notkun í ráðherrabústaðnum í dag. Matti Vanhanen forsætisráðherra Finnlands, ásamt Geir H. Haarde forsætisráðherra Íslands, settust á rökstólana og á fimm mínútum var kominn rammi að tollaívilnnasamningi milli landanna tveggja.

Hinir nýju rökstólar munu hafa verið smíðaðir í Rúmeníu.

Ráðherrar á rökstólum

Uppvakningurinn Vöxtur

Í þjóðsögum Jóns Árnasonar segir af Vexti. Vöxtur var uppvakningur er olli mikilli skelfingu meðal bænda á suðurlandi í upphafi sextándu aldar. Hann mun hafa komið í skjóli nætur, laggst á og rýrt bóndans fé. Fer sögum af mörgum hungurdauðanum af hans völdum, eða eins og segir í þjóðsögunum, „Vöxtur kom um kvartil hvert og lá hans leið í bæði fjárhús og fjós. Rýrði hann þar allan pening.“

Færri vita þó að Vöxtur hefur lifað með þjóðinni eftir þetta og fram á þennan dag. Það varð að orðatiltæki að Vöxtur legðist á [bú]pening fólks, þegar rýrnun varð í stofninum. Síðar varð notkunin víðtækari og var jafnframt farið að tala um Vöxt í sambandi við peninga almennt. Vextir og verðbólga eiga nafn sitt að rekja til uppvakningsins Vaxtar.

Birni nokkrum Jónssyni tókst að ráða niðurlögum Vaxtar, við Rangá, árið 1508. Þá segir sagan að á þeirri stundu er Vöxtur var aftur rekinn til heljar hafi hann sagt við Björn, „Aftur mun ég snúa á þúsöldinni þriðju.“

Það er því skiljanlegt að menn séu óttaslegnir nú, réttum 500 árum eftir fráhvarf Vaxtar.

Verðbólgan „skelfileg"