Nýi Brjánn

Ákveðið hefur verið að stofna Nýja Brján Guðjónsson, undir nýrri kennitölu, með aðstoð klónunardeilda bankanna.

Hinn nýi aðili, Nýi Brjánn Guðjónsson, mun taka yfir allar eignir gamla Brjáns, þ.m.t. dósasjóðnum.

Eftir gjörninginn mun gamli Brjánn verða lagður niður með öllum sínum skuldum og hinn nýi mun svífa vængjum þöndum.

Kær kveðja úr sukkinu.
Nefndin.

Kaupverðið á 365 6,4 milljarðar

Eldfim apparöt

Farið hefur framhjá fæstum hve eldfimi vélknúinna apparata, þá helst farartækja, hefur aukist á undanförnum vikum.

Um er að ræða ráðgátu sem færustu sérfræðingar hafa mikið velt fyrir sér. Helst er talin orsökin að er hitna fari undir eigendum geti það aukið á íkveikjuhættu. Til að kveikja eld þurfi nefnilega eldsneyti, súrefni og hita.

Bifreiðar hafa hingað til verið í mestri áhættu hvað þetta varðar. Þó virðist sem bátar séu einig að koma sterkir inn.

Leó Löve, sérfræðingur í eldvörnum, segir í samtali við Bergmálstíðindi að líklega muni reiðjól og línuskautar bætast í hópinn fyrr en varir. Einnig að skellinöðrur séu að bætast í áhættuhópinn ásamt sláttuvélum.

Bensínkveikjarar virðast, enn sem komið er, ætla að sleppa.

Er mig að dreyma?

Nei, svei mér þá. Þetta er raunverulegt.

Hvaða fádæma snillingi datt í hug sú fráleita hugmynd að taka hér upp norska krónu? Hvort heldur er beint, eða með að tengja íslensku krónuna við þá norsku.

Þær raddir eru ekki nýjar að hér skyldi taka upp €vru, þá með tilheyrandi inngöngu í €vrópuklúbbinn. Þær hafa þó gerst mun fleiri og mun háværari eftir því sem mánuðirnir og árin hafa liðið. Einhverjir voru framsýnir og sáu fyrir lifandis löngu að íslenska krónan væri ekki upp á marga froska. Eftir að fór að halla af alvöru undan fæti hafa fleiri bæst í þann hóp. Flestir þeirrar skoðunar að beinast lægi við að horfa til Evrópu.

Á sama tíma eru aðrir sem mega ekki fyrir nokkra muni sjá eða heyra neitt sem heitir Evrópa. Sumir þeirra hafa þó áttað sig á hversu handónýtt drasl íslenska krónan er. Þó má ekki tala um Evrópu. Þeir hafa, í móðursýki sinni, reynt hvert hálmstráið á fætur öðru. Einhver nefndi svissneska frankann, annar snillingur nefndi dönsku krónuna. Nýjasta ruglið er norska krónan.

Hvað gengur mönnum til?

Þeir sem harðast leggjast gegn Evrópusambandsaðild leggja fyrir sig framsal sjálfstæðis og segja að ekki yrði gæfulegt að vera undir seðlabanka Evrópu, án þess að hafa þar áhrif. Halda menn að íslendingar hefðu einhver áhrif, tengdir öðrum gjaldmiðlum? Nei. Herra Joð viðurkenndi það meira að segja sjálfur, í Silfri sunnudagsins.

Ok. Menn geta svo sem tínt til fleiri rök gegn Evrópusambandsaðild, eins og yfirráð yfir auðlindum. Slíkir hlutir eru umsemjanlegir og til að semja megi um þá verða menn að hefja viðræður við Sambandið.

Nei, það má alls ekki. Miklu notalegra er að lúra í skotgröfunum eitthvað áfram.

Þótt við íslendingar hefðum e.t.v. lítil áhrif innan Evrópusambandsins, vegna smæðar okkar innan milljónaþjóðanna, hefðum við þó okkar fulltrúa þar og gætum látið okkar rödd hljóma. Hefðum minni áhrif en stóru þjóðirnar, en hefðum þó áhrif. Sem undirsátar Norðmanna eða annara hefðum við engin áhrif. Enga rödd. Hefðum ekkert að segja um peningamálastefnuna. Ekkert. Niente. Nix. Void.

Það er væntanlega það sem Joð & Co vilja helst?

Norsk króna ekki í umræðunni

Þráhyggja Joðs?

Ég var að enda við að horfa á Silfrið, á netinu. Steingrímur Joð talaði þar vítt og breytt. Ég get alveg kvittað undir margt sem hann sagði. Norrænt velferðarþjóðfélag og blandað hagkerfi.

Málið barst að norsku krónunni. Hann talaði um að það væri nærtækasti kosturinn og játaði einnig að það myndi hafa í för með sér skert sjálfstæði.

Halló! Er hann ekki einmitt hvað mest á móti €vrópusambandsaðild á þeim forsendum, að það skerði sjálfstæðið?

Hvað er þá málið? Er betra að ganga Noregskonungi á hönd en lýðræðislegu €vrópsku samfélagi?

Maðurinn er ekki samkvæmur sjálfum sér. Er hann kannski haldinn and-€vrópu þráhyggju? Eða bara lýðskrumari?

Vill að kosið verði í vor

Kaupum íslenskt

Kaupum íslenskt. Herðum sultaról. Herpum görn.

Það er ekki alltaf hægt. Ég hef ekki marga kosti þegar kemur að því að kaupa bensín. Eða þegar ég kaupi pasta.

Þegar ég sé innlent vs útlent. Ég skoða kílóverðið. Innlent tapar oftast fyrir innfluttu. Ég hugsa um budduna mína. Ég kaupi það sem er hagstæðara, þótt það sé útlenskt.

Kannski ég ætti að kaupa sviðahausa, frekar en pasta.

Er kindakæfa, lifrarpylsa og hnoðmör samkeppnishæf við útlönd? Ég spyr.

Vér mótmælum allir! .....Nema ég

Eftir fund með sjálfum mér og sófanum, varð niðurstaða sú að ég ætti ekki heimangengt í dag. Byggi ég á Arnarhóli 1 með þeim Boga og Örvari hefði ég kannski tekið þátt, út um gluggann.

Á undanförnum misserum hef ég fengið staðfest að landsmenn eru ekki afkomendur manna frá Noregi, nema að litlu leiti. Við erum fyrst og fremst afkomendur þræla. Írskra þræla líklega. Þrælseðlið er svo ríkt í okkur. Ég er þar auðvitað ekki undanskilinn, svo því sé haldið til haga.

Fyrir nokkrum dögum voru mótmæli í Róm. Þar mættu þrjár og hálf milljón. Ítalir telja sextíu milljónir, svo þar voru samankomin 5,8% þjóðarinnar. Til að jafna það þyrftu íslenskir mótmælendur að ná átján þúsundum.

Hve margir nenna að mótmæla? Kannski hundruðir.

Reyndar er athyglisvert, að nú nefnir Mogginn hærri tölu þáttakenda en Vísir. Þ.e. Mogginn segir ca þúsund en Vísir segir meira en sexhundruð. Miðað við talningu lögreglunnar eru það kannski um þrjú þúsund.

Já, mótmælin. Taka menn ekki Mólótov, tómata og eggjabakka með sér? Nei. Bara skilti, húfu og vettlinga. Svo mæta einhverjir útvaldir búðingar í pontu og rausa. Allt svo settlegt og fínt.

Hmm, mælendalisttinn er....eitthvert fólk sem enginn þekkir. Jú, er svo ekki formaður Sandskötunnar mættur!!

Stulli Jóns og flautukórinn er með. Þá er kannski von að eitthvað gerist. Kannski egg og gaz?

Samt segir mér eitthvað að ekkert muni gerast. Fólk kemur saman, í vettlingunum sínum, hlustar á geldar ræður. Klappar og fer síðan heim og horfir svo á CSI í kvöld. Mætir svo í vinnu á mánudag, sem enn hafa vinnu, tala um hve kalt hafi verið í bænum. Hvernig skuli baka kleinur, eða búa til sultu.

Ekkert gerist og ekkert breytist. Hey!! Annar mótmælafundur að viku! Eins og að bregða sér í bíó.

Um þúsund mótmælendur

Flotta Þorgerður

Ég hef aldrei kosið Sjálfstæðisflokkinn. Reyndar er fátt sem bendir til að það breytist. Allavega ekki í bráð. Kannski er um að kenna uppeldinu. Pabbi minn var haldinn mikilli vinstri slagsíðu, eins og einn bloggari orðar það.

Þó er ég hægrisinnaðri en gamli. Ég hef skilgreint mig sem hægri krata eftir að ég komst að því hvar ég stæði og hvað ég vildi, eða vildi ekki.

Ég er til að mynda hlynntur því að skoða af alvöru kosti þess og galla að ganga í Evrópusambandið. Hefja viðræður og sjá hverju þær myndu skila. Ég nenni ekki þessum sandkassaleik og skotgrafahernaði sem hér hefur tröllriðið mönnum og músum.

Ég er líka á þeirri skoðun að ríkisfyrirtæki, eins og RÚV, sem hefur skilgreind menningarleg markmið og öryggisleg, eigi að vera að vasast á almennum auglýsingamarkaði. Mér finnst að slíkt fyrirtæki eigi að sinna sínu hlutverki og vera bara á fjárlögum. Einkamiðlarnir geti svo séð um að mata lýðinn á amerískri froðu og öðru taði fyrir almúgann sem á sér ekki líf. Fjármagnað það með auglýsingum um allskyns óþarfa fyrir hinn sama lýð, sem á sér ekki líf.

En að pólitíkinni. Sjálfstæðisflokkurinn virkar ekki sexý á mig. Hann er uppfullur af gömlum menntaskólavinum sem setja sér það helsta markmið að hygla hver öðrum og klóra hvers annars bak. Menn mega alveg gera það, í sínum frítíma, en þeir eru ekki á launaskrá hjá mér til þess. Þeir eru ekki að sinna starfi sínu og ég get ekki einu sinni rekið þá, fyrr en eftir 2,5 ár!!

Að sama skapi vilja þeir hvorki sjá né heyra neitt sem kallast Evrópusamband. Auðvitað ekki. Það myndi ógna bræðralaginu sem þeirra tilvist byggir á.

Þó er gullmoli í fjóshaugnum. Skynsöm, hugsandi kona. Kona sem hefur bein í nefinu og er ekki haldin þeirri meðvirkni gagnvart ónefndum manni, sem hinir í flokknum þjást af. Hún kemur fram eins og hún er klædd og segir það sem henni finnst. Vitanlega er ég að tala um Þorgerði Katrínu Gunnarsdóttir. Þurfti ég nokkuð að taka það fram?

Það hefur reyndar hvarflað að mér hvort hún væri ekki í röngum flokki. Kannski er þó betra að hún sé einmitt í þeim flokki sem hún er. Kannski henni takist að smita út frá sér heilbrigðri hugsun til annara flokksmanna. Ekki veitir víst af.

Fyrst steig hún fram og talaði í raun fyrir að hefja Evrópuumræður. Núna nefnir hún þann möguleika að taka RÚV af auglýsingamarkaði.

Hún virðist taka hagsmuni fjöldans fram yfir sína eigin, eða einkavina sinna.

Myndband frá í fyrra sem á ef til vill enn betur við í dag

Mér var bent á myndband á YouTube sem líklega var gert af tilefni kosninganna, sem þá voru í vændum.

Mér finnst það ekki eiga síður við nú, í ljósi ástandsins og umræðunnar. Kannski aldrei betur en einmitt nú.

Tell me something I don't know

Þetta kemur bara alls ekki á óvart, nema þá að það sé einungis þriðjungur að velta þessu fyrir sér.

Sjálfur hef ég velt þessu fyrir mér og geri enn. Ekki það að kreppan sem slík sé að bíta mig. Það þarf ekki endilega kreppu til þess.

Að horfa síðan um á þetta gegnsýrða meðvirknissamfélag er svo ekki til að draga úr manni að hverfa burt.

Möguleiki á landflótta?

Ég skil þetta allt saman....hmm...hvar er vínarbrauðið nú aftur?

Ég hef lengi velt fyrir mér, hverjar hinna guðlegu vera á Alþingi eru háttvirtar og hverjar hæstvirtar.
Er einhver fastmótuð regla á því?

Okkar hátt- eða hæstvirti forsætisráðherra hefur áhyggjur. Tja, allavega í korter. Rétt meðan hann er til viðtals við Vísi.

Okkar háttæruverðugi leiðtogi gefur sér þó allavega korter til að hafa áhyggjur. Áhyggjur eins og ég og þú, af framtíð okkar. Hvað verði um húsin okkar og það öryggi sem við vildum búa börnunum okkar.

En sem betur fer rennur af honum fyrr en ella og hann gengur aftur að kjötkatlinum. Ha, ég? Gerði ég eitthvað rangt? Eða gaurinn sem situr nú á svörtuloftum? Hann skeit nú bara í hvert horn í 13 ár. Er það ekki löngu gleymt? Hmm? Vill einhver rétta mér vínarbrauðið?

 

Rop!

Afsakið!

 

Ég þen auðvitað á mér skilanefndina og öll þjóðin með.