Stærstu mistök Íslandssögunnar...

...voru þeirra sem kusu framsóknar- og sjálfstæðisfólk á þing. Kannski hin hafi líka gert mistök, en boy oh boy.

Fyrst eyða þau sumrinu í þras og fyrirvarasmíðar um Icesave. Berja sér á brjóst fyrir að hafa komið fyrirvörunum í gegn, en sitja svo hjá þegar að sjálfri atkvæðagreiðslunni kemur.

Síðan núna, er allt ómögulegt við fyrirvarana. Þessa sömu og þau börðust svo mikið fyrir að koma á koppinn.

Hvurn fjárann eru þessi himpigimpi að þvælast á þingi? Þvílíkt og annað eins hef ég ekki séð síðan í barnaskóla. Heldur þetta lið að það hafi verið kosið til einhverrar Morfís-keppni?

Ég ætla svo sem ekki að dásama Joðhönnu, en þau virðast þó átta sig á að þau voru ekki kosin til keppni í ræðumennsku, froðusnakki og orðhengilshætti.

Stærstu mistök Íslandssögunnar

Íslensk moldakofahugsun

Íslendingar fluttu úr moldakofunum á 20. öld. Og þó. Moldakofahugsunarháttur virðist enn vera ríkjandi, þótt efnislega hafi menn flutt í steinsteypu.

Það er t.d. landlægur andskoti að horfa bara á brúttótekjur fólks þegar ákvarðanir eru teknar. Hvort sem um ræðir greiðslumöt, úrskurði til aukameðlaga eða samningu nýrra skattalaga.

Rætt er um breytingu skattheimtu. Ég leyfi mér að kópera texta héðan:

Einstaklingur með 250 þús. kr. mánaðarlaun myndi greiða 2.500 krónum minna í tekjuskatt á mánuði.

Einstaklingur með 400 þús. kr. mánaðarlaun myndi greiða 3.500 krónum meira í tekjuskatt á mánuði.

Einstaklingur með 550 þús. kr. mánaðarlaun myndi greiða 12.500 krónum meira í tekjuskatt á mánuði.

Einstaklingur með 800 þús. kr. mánaðarlaun myndi greiða 29.500 krónum meira í tekjuskatt á mánuði.

Einstaklingur með eina milljón króna í mánaðarlaun myndi greiða 33.500 krónum meira í tekjuskatt á mánuði.

Ok. Ég er alveg hlynntur aukinni skattbyrði á hákarla, sem hafa milljón plús á mánuði. Sem er úr kortinu. Hins vegar er hópurinn sem ég tel þorra landsmanna falla í þeir sem hafa laun á bilinu 250 til 500 þúsund.

Hverjir eru þeir sem aðeins hafa 250 þúsund mínus á mánuði? Mestmegnis fólk sem hefur ekki menntað sig og vinnur því við ófagmenntuð láglaunastörf. Hinir, sem menntuðu sig hafa vitanlega hærri laun. EN, jafnframt námslán að greiða. Alla vega flestir. Sjálfur greiði ég uþb. 300 - 400 þúsund kall á ári bara vegna námslána, svo ég nefni ekki aukameðlög. Þeir sem ekki tóku námslán borga núll. Væri ekki nær að horfa frekar á nettótekjurnar? Eru menntað og sæmilega launað fólk réttdræpt? Joð virðist telja svo vera. Velgengni virðist vera eitur í hans beinum. Þó er hann hákarl með sitt þingfarakaup og nefndarisnu.

Ég er menntaður og með sæmilegar tekjur. Ergó, réttdræpur.

Annars finnst mér, eins og fram kom í síðasta Silfri, að þeir sem setji reglurnar fatti ekki samhengi hlutanna og hvernig ein aðgerð getur haft dómínóáhrif. Hvernig skattahækkun á einum stað veltur áfram gegn um kerfið. Held við værum betur sett með tarfinn Guttorm í ráðuneyti fjármála, en hann er víst allur. Blessuð sé minning hans.

Eitruð blanda skulda og skatta

Maður fólksins

Maður fólksins gjörir heyrinkunnugt að um áramót verði innleidd alvöru skattpíning á Íslandi, að skandinavískri fyrirmynd. Norræna velferðarmódelið, sjáið til.

 

Eftir áramót mun Ísland taka hin norðurlöndin í nefið. Skattpíningin verður reyndar ögn minni en t.d. í Svíþjóð og Danmörku, en þar sem verðlag er mun hærra hér mun svíða enn meir undan skattpíningunni hér en þar.

Loksins virðist hafa náð að koma norrænu velferðarmódeli á koppinn. Húrra fyrir því.

En svona í ljósi þess að myndin af manni fólksins virðist vera tekin ca 1980, er ekki úr vegi að geta þess að maður fólksins var á þeim tíma íþróttafréttamaður á sjónvarpsstöð allra landsmanna og þegar hann sá um íþróttaþættina á mánudagskvöldum, sem þá voru, voru vitanlega fyrirferðarmestar þær íþróttir sem þorra landsmanna eru hugleiknar og vill svo til að þykja manni fólksins áhugaverðastar, blak og hestamennska.

Húrra fyrir manni fólksins og skjaldborgum hans.

 

Sjónarmið karla komast ekki að

Áhugafólk um kvenréttindi vill koma á framfæri óánægju sinni með hve lítið körlum er hleypt að í umræðum um kvenréttindi.

Máli sínu til stuðning bendir það á að framkvæmdastjórn og framkvæmdastjóri Kvenréttindafélagsins eru allt konur og aðeins einn karl sitji í aðalstjórn þess. Samtals, af þrettán stjórnendum félagsins sé einn karl á móti tólf konum.

Þetta sé ekki til þess fallið að hugmyndir og viðkorf karla fái hljómgrunn í umræðunni, þrátt fyrir að að íslenskar konur framtíðinnar séu dætur karla jafnt sem kvenna þessa lands.

Sjónarmið kvenna komast ekki að

Sýndarpeningar og mannlegur máttur

Í fréttum fyrir stuttu sagði félagsmálaráðherra, Árni Páll Árnason, að ekki væri í mannlegum mætti að lækka skuldir heimilanna.

Stór orð það.

Hér ætla ég að einbeita mér að verðtryggðum lánum.

Verðtrygging hækkar höfuðstól lána. Hækki verð á rakspíra, tannkremi og píputóbaki, hækka verðtryggð lán.

Láni ég vini mínum viskíflösku ætlast ég til þess eins að fá borgað í sama. Fá eins flösku til baka eða andvirði hennar í peningum, á því verði sem gildir við endurgreiðslu. Þetta er verðtrygging. Þarna er um eðlilega verðtrygginu að ræða. Þ.e. að einungis verðgildi viskíflöskunnar er notað til grundvallar verðtryggingarinnar. Okkur vinunum finndist báðum óeðlilegt að binda verðgildi viskíflöskunnar við verð á svitaspreyi.

Því væri eðlilegast, vilji menn nota verðtryggingu, að verðtryggja húsnæðislán með vísitölu húsnæðisverðs og bílalán með einhverskonar vísitölu bifreiðaverðs. Veit ekki til þess að hún sé til. En að verðtryggja með svitaspreyi og tannstönglum er úr kortinu.

En allt í lagi. Við búum við vísitölu neysluverðs. Þessa með tanntönglunum og dömubindunum. Vísitölu sem notuð er til verðtryggingar á allihoopa. Burt séð frá hvort það tengist bleium og dömubindum eður ei.

Hvað er það sem gerir það mannlegum mætti ófært að færa niður lán handvirkt?

Það gengur mér illa að sjá. verðbætur á lán, af völdum verðtryggingar, eru nefnilega í senn sýndarpeningar og mannanna verk. Því ætti auðveldlega að vera hægt fyrir mannskepnuna að hafa áhrif á eigin gjörðir. Það er ekki eins og um sé að ræða einhver óviðráðanleg náttúrulögmál.

Sýndarpeningar segi ég. Já og ég skal útskýra það.

Tökum dæmi.
Ég kaupi hlutabréf á 1 krónu. Stuttu síðar hækkar það á markaði í 10 krónur. Hef ég þá grætt 9 krónur? Nei, ekki nema ég selji hlutabréfið. Haldi ég hlutabréfinu og það lækkar aftur í verði niður í 5 krónur, hef ég þá tapað eða grætt? Meðan ég á enn bréfið hef ég hvorki tapað né grætt. Ég hef misst af þeim 9 króna gróða miðað við að ég hefði selt bréfið þegar verð þess voru 10 krónur, en ég hef ekki orðið fyrir neinu raunverulegu tapi. Gæti enn selt það og grætt 4 krónur.

Meðan bréfið er ekki innleyst verður enginn fyrir tapi né hlýtur gróða. Svo er eins með verðbætur.

Verðbætur eru sýndarpeningar sem ákveðnir er með manngerðri vísitölu. Hækkun höfuðstóls án þess að neinir peningar liggi að baki. Því kostar engin fjárútlát að skera niður verðbætur. Það er bara gert með pennastriki. Niðurskornar verðbætur yrðu þá í mesta lagi missir af gróða, en aldrei fjárhagslegt tap.

Svona eins og þegar ég hef útfyllt lottóseðilinn en gleymi að kaupa hann. Sé svo að ég hefði fengið 5 rétta. Væri ég þá kominn milljónir í mínus?

Ég ætla að bíða með fagnaðarlætin

Þar til ég hef fengið að sjá í hverju aðgerðir stjórnvalda til stuðnings skuldugum heimilum felast og þá ekki síst að hafa lesið smá letrið.

Í frétt Vísis segir; „Samkvæmt heimildum fréttastofunnar verður greiðslubyrði allra húsnæðis - og bílalána, hvort sem þau eru verðtryggð eða gengistryggð færð að því sem hún var tiltekinn dag áður en bankarnir og gengi krónunnar hrundu. Það sem eftir standi að lánstíma liðnum verði síðan afskrifað.“

Í fyrstu virðist manni sem færa eigi lánin niður eins og sumir hafa krafist. Miða þá gjarnan við dagsetninguna 1. 1. 2008.

Hins vegar segja heimildir Vísis að greiðslubyrðin ein verði lækkuð, en höfuðstóllinn ekki. Annars væri ekkert til að afskrifa að lánstíma loknum.

Aðgerðirnar munu því einungis létta greiðslubyrðina en ekki létta á skuldum fólks. Fólk mun því áfram vera í stofufangelsi á eigin heimilum.

Þótt létt verði á afborgunum stendur höfuðstóllinn óbreyttur og vex sem hraðar en ella, því vitanlega verður sá ógreiddi hluti afborgananna sem að óbreyttu væri greiddur, leggjast ofan á höfuðstólinn.

Án þess ég hafi engar tölur er það mín tilfinning að fólk í yngri kantinum, segjum undir 55 ára aldri, muni aldrei greiða allar afborganir lána sinna. Þ.e. það fólk mun skipta um húsnæði áður en lánstíminn er allur. Óvíst er hvort það fólk muni fá að flytja lánin með sér. Í mörgum tilfellum yrði fólk að greiða lánin upp og taka ný lán. Mér þykir reyndar líklegra að það fólk muni ekki fá að flytja lán sín heldur þurfa að greiða lánin upp því þá þarf að greiða allt upp í topp og lánveitendur þurfa ekkert að afskrifa.

Því tel ég umræddar aðgerðir, miðað við heimildir Vísis, engu breyta nema fyrir þann hóp fólks þar sem börnin eru flogin úr hreiðrinu og fólk mun búa í núverandi húsnæði til dauðadags.

Greiðslubyrði aftur fyrir hrun

Greiðsluverkfall - ég er með

Ég er reyndar ekki að greiða af húsnæðisláninu mínu eins og er. þurfti að fá það fryst til að geta greitt niður bakreikning vegna aukameðlaga úrskurðuð 1,5 ár aftur í tímann. Það bólgnar væntanlega duglega á meðan. Beltin og axlaböndin sko.

Hins vegar hlustaði ég á Marínó Njálsson í Kastljósi kvöldsins, í bakgrunni, meðan ég var að stússast. Hann talaði um fleira en bara að greiða ekki af lánum. Ss. að hemja útgjöld og kortanotkun, sem og að taka út bankainnistæður.

Ég ætla að taka þann þátt sem ég get. 1. október ætla ég að taka út allt af mínum reikningi og greiða fyrir vörur með reiðufé þann mánuð. Þótt í fréttum hafi verið talað um að innlánsvextir séu himinháir og því liggi fólk með peningana sína á bankareikningum, er verið að tala um hákarlana sem geta leyft sér að láta peninga liggja lengi inni á reikningi. Innlánsvextir af tékkaréikningum, sem flestir landsmenn nota, eru ekki nema uþb. 0,5%

Held að koddinn ávaxti ekki mikið verr en það.

Hvort heldur fólk ætlar að taka þátt í greiðsluverkfalli eður ei, hvet ég alla til að taka út allt sitt af bankareikningum sínum og láta reikninginn standa á núlli í október. Engin áhætta fyrir okkur en bankarnir munu finna fyrir því. Þeir þurfa nefnilega innlánin til að lána út. Reyndar finnst mér að við ættum að gera þetta í hverjum mánuði allt þar til við sjáum breytingar og leiðréttingar á lánum.

Látum bankana ekki njóta afnota af peningunum okkar!

 

Eins finnst mér skrítið að enginn mótmæli þeim rökum sem þeir sem vilja viðhalda verðtryggingunni halda fram. Vissulega er rétt að ef engin væri verðtryggingin væru vextir hærri. Það skil ég vel. Hins vegar myndi höfuðstóllinn aldrei vaxa, eins og verðtryggður höfuðstóll gerir og fólk væri alla vega að greiða eitthvað niður við hverja afborgun. Jafnvel þótt megin hluti greiðslunnar væru vextir. Lánin myndu aldrei hækka. Í versta falli standa í stað. Hví bendir enginn á það?

Óraunsæi að hundsa verkfall

Njóli Ingvarsson, borgarfulltrúi D lista segir...

Man bara ekki nafnið hans. 

Leitaði að téðum borgarfulltrúa, á reykjavik.is, en fann ekki. Fann þó þar aðra facebook-fulltrúa.

Hr. Ingvarsson segir, í viðtengdu viðtali (ca 3/4 tímans) að Nasa tengist ekki skemmtanalífi borgarinnar og hafi ekki gert síðan það var Sjallinn.

Var maðurinn í sveppatínslu?

Staðurinn (Nasa) er með dansleiki um hverja helgi. Stundum hljómsveitir, en þó ekki alltaf. Stundum bara dansiböll. Pallinn heldur sín reglulegu eðalböll á Nasa. engin hljómsveit þá. Bara plötuspilarinn.

Held að Hr. Ingvarsson ætti að taka sér laaaaaaangt frí og helst að snúa ekki aftur.

Hann veit ekki rassgat um hvað hann talar.

Er ekki hægt að koma manninum í malbikunarvinnu? Hann kann svo sannarlega að malbika.

 

Forsetinn og gjáin

Í þessari færslu ætla ég ekki að tjá mig um Icesave, heldur gerast Sjálfstæðismaður. Hafa sterkar skoðanir á málinu en taka þó ekki afstöðu.

Hins vegar vil ég birta mynd sem náðist á Bessastöðum í dag.

Forsetinn staðfestir Icesave-lög

Skattlagning á lofti

„Íslandsbanki hyggst grípa til þess ráðs að lækka höfuðstól húsnæðislána í erlendri mynt og hefðbundinna verðtryggðra lána og breyta þeim í óverðtryggð lán í krónum.“

Svona hefst viðtengd frétt. Gott er ef satt reynist. Það sem mér fannst þó merkilegat í fréttinni var eftirfarandi málsgrein:

„Samkvæmt lögum þyrfti að greiða skatt af niðurfellingu lánsins, í hlutfalli við þá upphæð sem yrði afskrifuð.“

Ég er pínulítið hugsi yfir þessu.

Annars vegar vegna þess að mér þykja verðtryggð húsnæðislán verðtryggð á rangan hátt. Verðtrygging er hugsuð þannig að lánveitandi fái til baka upphæð sem hefur sama verðgildi og upphaflega lánið var á þeim tíma. Hvernig mælum við verðgildi peninga? Jú, til þess var fundin upp vísitala sem samanstendur af allskyns varningi. Taki ég lán til kaupa á spergilkáli, er þá ekki eðlilegast að verðtryggja það með vísitölu spergilskáls? Ok, hún er víst ekki til og því er notuð vísitala neysluverðs. Yrði að sætta mig við það þótt í þeirri vísitölu séu augnskuggar, áfengi og ananas. Fái ég lánað til kaupa á húsnæði, er þá ekki eðlilegt að verðtryggja það með vísitölu húsnæðisverðs? Það finnst mér. Sú vísitala er til og því óþarfi að verðtryggja með augnskugganum. Þar sem almennur neysluvarningur hefur hækkað mikið í verði, á sama tíma og húsnæðisverð hefur lækkað er hér um að ræða ósanngjarna hækkun sem er í raun bara loft. Því tel ég skattlagningu á því sem ég kýs heldur að kalla leiðréttingu verðtryggðra lána ósanngjarna.

Á hinn bógin eru gengistryggðu lánin. Lán sem tekin voru í íslenskum krónum, nota bene. Aðgerðir bankanna sjálfra, í fyrra, gegn krónunni vilja sumir segja helstu ástæðu fyrir gengishrapi krónunnar. Er þá réttlátt að lántakinn blæði fyrir það? Væri ekki réttast að senda bönkunum sjálfum reikninginn? Auk þess að vafi leikur á hvort sú verðtrygging sem þar var brúkuð sé lögmæt. Að því gefnu að svo sé ekki er um ólögmæta hækkun lánanna að ræða og því yrði leiðrétting þeirra einungis afskrift ólöglega hækkanna. Er ríkinu stætt á að skattleggja slíkt?

Það kemur manni svo sem fátt á óvart lengur. Eins absúrd og íslenskt þjóðfélag er. Mér skilst að sykurskatturinn hans Joðs nái meira að segja til sódavatns. Þótt sykurlaust sé.

Höfuðstóll lána verði lækkaður