Hnetur

 

 

 

 

Ég er mikill aðdáandi hneta. Saltaðra sérstaklega.

Löðrandi fitan og saltið hefur þessa afurð í hærri hæðir.

Við erum of norðarlega, hér í Mongólíu, til að rækta hnetur. Kaupum þær aðallega frá Thailandi og Indlandi. Hnetur eru okkar feitmeti. Feitmeti hefur bjargað mörgum frá hungri. Í því sambandi má nefna Frakka, Þjóðverja, Japani og Íslendinga.

Japanir og Íslendingar uppgötvuðu spik hvala, en Frakkar og Þjóðverjar voru meira í fituinnihaldi rauðvína.

Kannski þetta sé skýringin á langlífi Íslendinga og Japana?

Hnetur eru góðar, ekki síst vegna fitunnar.

Vinna á hnetuofnæmi

Tímamót

Bergmálstíðindi hafa náð tímamótasamningi við Heimssamtök pistlahöfunda. Í samningnum felst að pistlar margra þekktustu og virtustu pistlahöfunda heims munu birtast á vef Bergmálstíðinda.

Okkar eigin pistlahöfundur, hr. Fjasmann mun að sjálfsögðu skrifa og setja pistla hinna erlendu höfunda í íslenskt samhengi. Til glöggvunar, þá er samhengi nokkurskonar sameiginlegt sturtuhengi.

Bergmálstíðindi munu því hér eftir færa ykkur fréttir úr öllum heimshornum.

Fastir pistlahöfundar eru frá Mongólíu, Grikklandi, Ísrael, Turkmenistan, Gambíu og Trékyllisvík.

Líklega mun pistlahöfundum fjölga von bráðar.

 

Stei tjúnd

Úr anus

Það er stæk skítalykt af þessu máli. Ríkisfyrirtæki selur eignir án útboðs eða auglýsinga.

Hverjum var boðið á útsöluna og hvernig voru þeir valdir? Sem eigandi bankans á ég kröfu að fá það uppgefið.

Hvernig tókst bankamönnum t.d. að hafa uppi á bílasölunni Úranusi? Bílasala sem virðist staðsett í skúffu í íbúðarhúsinu að Hegranesi 21, Garðabæ.

Ætli nágrannarnir séu ekki pirraðir að hafa hverfið morandi í bílum, til sölu, um allar gangstéttir? Einmitt, það eru engir bílar. Bara brask. Líklega gamall böddí einhvers bankamannsinns.

Fnykurinn er sem væri hann Úr-anusi.

Seldu lúxusbíla Kaupþings

Sem aldrei fyrr

Held ég að lagið Forystan, samið og framið árið 1995, eigi aldrei betur við en núna, þegar verkalýðsins afætur hafa sýnt sitt rétta andlit.

Lagið er aftast í spilaranum.

Peningaþvætti

Þessar fréttir eru svo sem ekki nýjar. Hvort þær eru réttar skal ég ekki segja um. Hins vegar hefur fólk talað um sín á milli að rússagullið hefði flætt hingað síðan...tja...ca 2003.

Utanríkisráðuneytið mótmælir. Segir að hér hafi gilt regluverk sem komið hefði fyrir þetta.

Hvaða opinbera stofnun fylgdi regluverkinu eftir? Fjármálaeftirlitið?  Stofnun sem fattaði ekki sjálf hvenær henni var mál að kú**.

Afsakið mig....ég þarf að hlægja smá.

Segir Rússa hafa keypt Ísland

Á bak við tjöldin

Nú er ljóst að alþjóða gjaldeyrissjóðurinn (IMF), stjórnar Íslandi bak við tjöldin.

Þjóðirnar í kring um okkur, sem og fjarlægari þjóðir, hafa undanfarið unnvörpum lækkað stýrivexti niður í gólf til að efla sín hagkerfi. Hér á landi er því öfugt farið. Hér eru vextirnir að brjótast upp úr loftinu.

Ástæðan er tilraunaverkefni IMF. Sú stofnun er ekki beinlínis þekkt fyrir vel unnin verk. Meira hefur farið fyrir hrakfara- og hörmungasögum úr fortíðinni, þar sem sú stofnun hefur ekki bara skitið upp á bak heldur alla leið upp á hnakka.

Nú hafa þeir þessa fínu tilraunarottu. Þrjúhundruðþúsunda manna samfélag í rassgati. Þvílík hátíð fyrir tilraunaglaða bjána.

Jón Baldvin fór mikinn á haustdögum og talaði fyrir að stjórnvöld ættu að leita til IMF. Hann getur trútt um talað, með Bryndísi sína sem er þekkt fyrir hagsýni og kaupir bara ódýran marhnút í soðið.

Er ekki tími til kominn að gefa þessu apparati fingurinn?

Peningamálastefnu ekki breytt

Semja fyrir aðra, en þó aðallega fyrir sig sjálfa

Þetta verkalýðsforkólfalið ætlar að sitja fast á sínu.

Ég ætla svo sem ekki að leggjast gegn því. Tel marga, ef ekki flesta ekki veita af smá launahækkun, nú á tímum verðbóta og vaxta, sem allt eru að drepa.

Þeirra hagur liggur þó ekki í laununum mínum, eða þínum. Ekki beint, en óbeint.

Þetta er allt saman meira og minna sama liðið. Verkalýðsliðið og lífeyrissjóðaliðið.

Einmitt.

Þeirra hagur af hækkandi launum er að sjá hærri upphæðir greiddar í hítirnar, sem kallast lífeyrissjóðir.

Hítirnar sem fólk fær síðan greitt úr, nái það gamalsaldri. Deyi það fyrir þann tíma tapast lífeyrinn. Alla vega erfist hann ekki. Fer líklega í að smíða sumarhús.
Lífeyrissjóðsgreiðslur skerða ríkisellilífeyri Tryggingastofnunar.
Þeir einir sem nógu andsk***** mikið hafa náð að safna í lífeyrissjóð munu koma út í plús. Hinir væru jafn vel settir, hefðu þeir aldrei greitt krónu í lífeyrissjóð. Þeir fá samt lágmarkslífeyrinn frá TR.

Forkólfarnir munu verja verðtrygginguna út í rauðan dauðann, til að vernda eigið rassgat og eigið verðbréfabrask sem hefur orsakað neikvæða ávöxtun margra sjóða.

Orðabók menningarsjóðs á gott orð yfir forkólfa: afætur [n. kvk.  e-h sem nærist á öðrum].

Staðið verði við launahækkanir

Dalai Lama sýnir listir sínar í sumar

Sú frétt að Dalai Lama hafi boðað komu sína hingað til lands hefur glatt marga.

Lamatarfurinn Dalai hefur skemmt víða um heim í fjölmörg ár, með söng og dansi. Þjálfari hans, Tenzin Gyatso, handhafi Friðarverðlauna Nóbels og andlegur og veraldlegur leiðtogi Tíbeta, hefur náð ótrúverðum árangri í þjálfun sinni á Dalai. Tenzin mun hafa þróað eigin tamningatækni sem gefist hefur undra vel. Klapptæknin. Með klappi myndar hann taktinn sem Dalai dansar við og syngur.

 

 

Tenzin er svo iðinn við að iðka og æfa klappið, að fáar ef nokkrar myndir hafa náðst af honum óklappandi.

 

Tenzin sagði, á blaðamannafundi í dag, að listin við klappið væri ekki flókin. Andleg íhugun og kærleikur væri allur galdurinn.

Dalai Lama kemur til Íslands

Samgönguráðherrar

Það var löngum sagt, í gamla daga, að utanríkisráðherrar mættu alls ekki koma úr röðum Alþýðubandalagsins. Það væri og hættulegt (!).

Á sama hátt virðist vera óskrifuð lög að samgönguráðherrar megi alls ekki koma úr röðum höfuðborgarbúa.

Leiðréttið mig, fari ég rangt með, en ég man ekki eftir reykvískum samgönguráðherra. Er ég þó orðinn vel hálfnaður í gamalmennaflokkinn.

Sturla Böðvarsson var samgönguráðherra. Nú gegnir því embætti Kristján malari. Báðir utan að landi.

Áður hafa setið í sama stóli, snillingar (!) eins og Halldór Blöndal.

Allt landsbyggðarþingmenn.

Enda jarðgöng í útnárum ævinlega sett í forgang, meðan þjóðþrifaverk eins og Sundabraut fá að reka á reiðanum.

Sturla og Herdís hætta

Núll prósent líkur

Veit reyndar ekki hvort núll prósent líkur séu á að Davíð hætti „sjálfviljugur“ eða láti henda sér út. Ekki veit ég heldur hvað bréf hinna tveggja stjóranna innihéldu.

Umskipti í bankanum hafa með traust samfélagsins og ekki síður alþjóðasamfélagsins á honum að gera. Hefur ekkert með persónur Davíðs, Eiríks eða Ingimundar að gera. Þótt þeir væru Gísli, Eiríkur og Helgi, þyrfti að skipta þeim út.

En aftur að núll prósent líkunum.

Ef Davíð Oddson hefur verið svona sannfærður snemmsumars 2008 um að bankarnir færu á hausinn. Að núll prósent líkur væru á að þeir lifðu af, eins og hann sagði. Hví samþykkti hann þá, ásamt meðstjórnendum sínum, að lána Kaupþingi 200.000.000.000, tvö hundruð þúsund milljónir, korteri áður en sá banki var ríkisvæddur þegar ljóst þótti að Kaupþing færi í þrot? Þegar vitað var, samkvæmt hans orðum, að peningarnir væru settir í hít.

Getur einhver svarað mér því?