Hallelúja, segir Gunnar Krossfari

„Þetta var stórkostleg samkoma og mikil smurning“ segir Gunnar krossfari Sigurðsson, samkomustjóri um samkomu félags áhugamanna um fundahöld, sem haldin var í kvöld.

„Samkoman var afskaplega vel sótt. Útvarpað var beint frá samkomunni á útvarpi Alfa“ segir Gunnar.

Á fundinum héldu nokkrir beturvitringar tölur. Þar má helsta nefna, Böðvar Broddason og Ernir Traustason, sem báðir hafa getið sér gott orð fyrir opinbert skoðanahald.

Fundinn sóttu um 800 manns og færri komust að en vildu.

„Góðir andar voru í salnum“ segir Gunnar.

„Stórkostlegur fundur“

Nei! Detta mér nú allar dauðar!

Er Baldur Þórhallsson að segja að Framsóknarflokkurinn, af öllum flokkum, sé sá eini sem praktíseri lýðræði?

Fjandakornið. Í því samhengi, hverjum ég hef verið sammála um orð og athafnir undanfarið, er ég á leið með að verða kommúnískur bóndi.

Ég sem er háskólaborgari af mölinni

 

 

Hjálp!!

Árni, í bílstólnum, íhugar

Í þættinum Ísland í dag, á Stöð 2, viðurkenndi barnabílstólsráðherra, Árni Mathiesen, að hafa íhugað afsögn sína. Hann mun hins vegar hafa komist að annari niðurstöðu.

Árni telur einnig óskynsamlegt að fram fari þingkosningarnar á næstunni. „Í kosningum verðum við vegin og metin á grundvelli þess sem hér hefur gerst.“ sem þýðir á íslensku að axla ábyrgð sína. Árni veigri sér hins vegar frá að axla ábyrgð þar sem hann þurfi með því, að axla ábyrgð. Enda sé ófært að ráðherra þurfi að gera hvoru tveggja samtímis, að axla ábyrgð og að axla ábyrgð. Það sjái hver heilvita maður.

Starfsfólk Bergmálstíðinda hyggst nú funda með loftinu og reyna að botna í málinu. 

Talað með rassgatinu - kafli milljón

Enn og aftur trana menn sér fram, talandi með rassgatinu.

Flestir Íslendingar eru sammála um að aðgerðir Breta hafi verið allt of harkalegar og jafnvel ólöglegar. Sér í lagi að ráðast gegn öllu sem íslenskt er. Hinu er ekki hægt að neita að samkvæmt EES samningnum hafa Íslendingar skuldbundið sig að standa undir lágmarkstryggingu á inneign fólks á innlánsreikningum Íslenskra banka, hvar svo sem það er býr innan Evrópu. Það er ekki flóknara en það. Íslendingar hefðu aldrei komist undan að standa við skuldbindingu sína. Er flókið að sjá það?

Vissulega finnst mér að ríkisstjórnin og íslenskar ríkisstjórnir almennt mættu bera meiri virðingu fyrir þinginu. Það breytir því þó ekki, að sama hve menn hefðu rausað fram og aftur um málið á Alþingi, hefðum við þurft að borga. Umræður á Alþingi hefðu engu getað breytt, nema í mesta lagi að fullnægja þörfum sumra fyrir málefnarunk.

Hvers vegna eru menn að reyna að slá sig til riddara með svona rausi? Menn virðast nýta hvert tækifærið til að upphefja sjálfa sig. Menn hafa rausað lengi og það með réttu, en eins og staðan var orðin gat Alþingi engu breytt. Hinsvegar er krafan um að hinir ábyrgu axli ábyrgð sína réttmætari sem aldrei fyrr. Yfir því ættu menn frekar að rausa og málefnarunka.

Vissulega er blóðugt að þurfa að taka á sig skuldabaggann fyrir greifana. Hins vegar lá það fyrir allan tímann og á ábyrgð þeirra sem áttu að fylgjast með. Ríkisstjórnar, Alþingis, Fjármálaeftirlits og Svörtulofta. Vissulega hafa komið fram aðvaranir á vettvangi Alþingis, en þar sem Alþingi  virðist einungis vera færibandsafgreiðslubatterí ríkisstjórnar er auðvitað ekki von á að á það sé hlustað.

Hlustar einhver á raus starfsmanna á plani?

Sakar ráðherra um óheilindi

Vikuleg mótæli eru í tísku

Það er ekki ofsögum sagt af beljueðli íslendinga. Um leið og einhver fær sniðuga hugmynd, fylgja allir á eftir og éta hana hráa. Þetta kallast beljuþvaglátasyndrome í fræðimáli.

Á undanförnum sex vikum hefur skapast sú tíska hérlendis, að mótmæla einu sinni í viku. Hvorki oftar né sjaldnar. Hingað til hefur alþýðan ein haft í frammi mótmæli en nú hafa framsóknarmenn slegist í hópinn.

Bjarni Harðarson reið eftirminnilega á vaðið í seinustu viku. Ekki þá síst fyrir hvaða aðgerðum hann beytti við mótmæli sín. Framdi hann gjörning sem alls óþekktur er hérlendis. Hann tók ábyrgð og sagði af sér. Hvort tveggja er einsdæmi í íslandssögunni, að taka ábyrgð sem og að segja af sér.

Næstu framsóknarmótmælin fóru fram í dag, u.þ.b. viku síðar. Þá sagði Guðni Ágústsson af sér. Var útspil hans nokkuð óvænt. Spennandi verður að vita hver stígi næst á stokk. Valgerður þykir efnilegur kandídat, en óvíst er hvort hún þori. Heimildir herma að hún sé nokkuð spéhrædd þegar kemur að mótmælum.

Nú spyrja menn sig hvað aðrir munu gera. Þá ekki síst Sjálfstæðismenn, sem þykja eiga inni nokkur efnileg mótmæli. Fróðir menn telja þó að þeir muni ekki segja af sér, líkt og framsóknarmenn, heldur muni þeir fyrst og fremst tala af sér.

Reyndar vilja innanbúðarmenn í flokknum halda fram að Sjálfstæðismenn hafi verið á undan framsóknarmönnum. Sjálfstæðismenn hafi fyrir löngu byrjað að tala af sér og þá einskorðist það alls ekki við þingmenn flokksins.

Fyrirstaðan brostin. Ísland í €vrópusambandið?

Þau merku tíðindi berast nú um heimsbyggðina að Evrópusambandið hafi aflétt umdeildu banni á afskræmdu grænmeti. Eins og flestir vita hefur bannið fyrst og fremst staðið í vegi fyrir inngöngu Íslands í Sambandið. Helst hafa Bændaflokkur Íslands og Kommúnistaflokkurinn staðið gegn inngöngu Íslands meðan bannið hefur gilt.

Talsmenn Kommúnista segja af og frá að gangast undir slíkt bann. Slíkt hefði gengið af íslenskum samyrkjubúskap dauðum.

Talsmenn bænda segja ömögulegt fyrir íslenska bændur að hlíta slíku banni, enda íslenskt grænmeti tiltölulega pervisið og afskræmt. Því beri að fagna afléttingu bannsins og þú fyrst séu bændur til viðræðu um hugsanlega inngöngu í Sambandið.

Kommúnistar segja hinsvegar afléttingu bannsins engu skipta. Þeir séu á móti aðild, sama hvað.

Annar helmingur ríkisstjórnarinnar mun þegar hafa hafist handa við undirbúning aðildarviðræðna.

Aflétta banni við bognum gúrkum

Ráðinn verði reyndur bankaeftirlitsmaður

Þegar ég rakst á frétt á visir.is um viljayfirlýsingu þess efnis að ráðinn yrði reyndur bankaeftirlitsmaður, fékk ég sem snöggvast á tilfinninguna að eitthvað meira lægi undir. Ekki síst þar sem mynd af Seðlabankastjóra fylgdi fréttinni.

 

Við lestur fréttarinnar kom hinsvegar annað á daginn. Jú, verið var að tala um að koma brennuvörgum frá. Hinsvegar ekki helsta brennuvarginum að sumra mati. Nei, hann er hinsvegar einn þeirra sem standa bak við yfirlýsinguna.

Er nema von að íslendingar geri sig að athlægi um heim allan? Það er ekki nóg að þeir skipi afdankaða pólitíkusa í fagstörf, eins og stjórn banka, heldur hafa þeir ekki til þess vit að koma þeim frá þegar þeir hafa gerst sekir um afglöp.

Jónas afþakkar verðlaunin

Jónas Hallgrímsson, rithöfundur, ljóðskáld og bóhem, hefur afþakkað menningarverðlaun menntamálaráðherra. Ráðherra hugðist veita Jónasi verðlaunin fyrir beytingu hans á íslenskri tungu.

Jónas segir að það sé tómt rugl að veita svona verðlaun.

„Beyting íslenskrar tungu, hvað? Ég kann bara ekki önnur mál og er því nauðbeygður til að beyta þessu hrognamáli“ segir Jónas. „Þetta er sambærilegt og að sitja uppi með glataða krónu. Ég hef ekki aðra kosti.“

Til vara stóð til að veita Megasi verðlaunin, en hann var upptekinn við annað.

Til þrautavara var því Herdísi Egilsdóttur veitt umrædd verðlaun.

Herdís Egilsdóttir fær verðlaun Jónasar Hallgrímssonar

Hægðatruflandi tónlist

Ég var að hlusta á Rás 2 áðan. Bein útsending frá tónleikum í Laugardalshöll. Það komu hinir og þessir fram. Misskemmtilegir. Eitt stóð upp úr. Ham.

Ham flytur einskonar anal recursion tónlist. Sem á íslensku myndi útleggjast sem rassaríðingatónlist. Þ.e. tónlist sem þeir sem finnst vont að fá í rassinn, kjósa í staðinn.

Tónlistin er á þá leið að hún veldur verkjum í endaþarmi, fyrir utann alla verkina í hlustinni.

Heilbrigðisráðuneytið var ekki haft með í ráðum við skipulagningu tónleikanna, en heimildir herma að heilbrigðisráðherra muni fara fram á neyðarfund eftir helgi.

Spaugstofan er eins og Íbúðalánasjóður

Spaugstofan hefur skemmt landanum í sjónvarpinu á laugardagskvöldum lengur en elstu menn muna og Íbúðalánasjóður hefur lánað landanum fyrir húsnæði lengur en elstu menn muna.

Undanfarin ár hefur verið sótt að báðum stofnununum. Já, ég skilgreini Spaugstofuna sem stofnun.

Undanfarin ár vildu nýgræðingarnir leggja niður Íbúðalánasjóð. Töldu hann gamaldags og púkó. Í dag vitum við öll betur. Nýgræðingarnir eru aftur skriðnir oní holur sínar eftir að hafa skitið upp yfir axlir. Í hvaða sporum væri almenningur nú, hefði Íbúðalánasjóður verið lagður niður?

Líkt er með Spaugstofuna. Hún hefur þurft að liggja undir allskyns ákúrum undanfarin ár. Sögð vera gamaldags og púkó. Miklu betri væri kúk og piss húmorinn sem tröllriði öðrum grínþáttum í sjónvarpi. Prumpuhúmorinn væri framtíðin en Spaugstofan bara fyrir börn og gamalmenni. Eins og þau séu ekki líka fólk?

Hvað svo? Svo skellur á kreppa og Spaugstofan blómstrar sem aldrei fyrr. Hnífbeittir í sinni snilldarlegu hæðni. Hver nennir að hlusta á prumpubrandara í kreppuni.

Þeir klikkuðu ekki í kvöld, frekar en fyrr. Enda hafa þeir af nógu að taka. Grín er eins og eldur og nú er nægur eldiviður og súrefni og því logar eldurinn glatt.

Það var flott hvernig þeir tóku Bjarna Harðar - málið. 

 

 

 

 

 

 

 

En mesta snilldin var leitin að Árna Mathiesen, sem fannst í barnabílstól hjá Dabba á Svörtuloftum.