Líknandi meðferð

„Þetta er þáttur í lokaferlinu“ segir Seðlabankastjóri um gjaldmiðlaskiptasamningana sem Seðlabanki Íslands gerði nýverið við þrjá norræna banka.

Eins og fram hefur komið í fréttum, hefur íslenska krónan barist við erfiðan sjúkdóm, verðleysi. Banvænan og ólæknandi að margir telja.

„Krónan okkar hefur alveg átt sín góðu tímabil, þegar verkirnir hafa ekki látið á sér bera. Nú virðist þó svo komið að meinið hefur tekið sig upp að nýju og er nú skæðara en nokkru sinni“ segir Seðlabankastjóri. „Það eina í stöðunni er að viðurkenna ástandið og hefja líknandi meðferð. Það höfum við nú gert“ segir Seðlabankastjóri að lokum.

Því má bæta við að Seðlabankinn hefur opnað gjaldeyrisreikning og hafið söfnun til styrktar krónunni. Þjóðin er hvött til að taka þátt og leggja inn evrur í söfnunina. Upplýsingar um söfnunina og reikningsnúmerið má nálgast á heimasíðu bankans.

Fyrsti þáttur í lengra ferli

Fréttamyndir mbl.is

Stjórn mbl.is hefur markað nýja stefnu hvað varðar myndir með fréttum vefsins. Frá og með deginum í dag munu einungis birtast myndir af seðlabankastjóra, Davíð Oddssyni, með öllum fréttum.

Í samtali við Bergmálstíðindi sagði Sigfinnur Sindrason, umsjónarmaður mbl.is þetta fyrst og fremst spara kostnað. „Við höfum verið með allt of marga ljósmyndara á okkar snærum. Þeir hafa tekið urmul mynda á degi hverjum sem reynast svo vera einnota. Með þessu móti getum við endurnýtt þær myndir sem til eru. Svo eigum við líka böns af myndum af kallinum“ segir Sigfinnur.

Í dag hafa fyrstu þrjár myndirnar verið birtar.

 

 

 

 

Þessi mynd fylgdi frétt af síldargöngu við Ísland.

 

 

 

 

 

 

Þessi mynd fylgdi frétt af málefnum sjúkraliða hjá Landspítalanum.

 

 

 

 

 

 

Þessi mynd fylgdi frétt um leiki Landsbankadeildarinnar.

Ekki neyðaraðstoð

Seðlabankastjóri þvertekur fyrir að gjaldeyrisskiptasamningar við þrjá norræna seðlabanka séu neyðaraðstoð við Ísland, heldur sé hér til mikils að slægjast fyrir norrænu bankana þrjá.

„Það er deginum ljósara að skandinavar halda vart vatni yfir íslensku krónunni og hafa hart gengið fram í að komast yfir íslenskar krónur. Því er þessi samningur, þar sem þeir fá krónur fyrir evrur og geta svo skipt aftur á sama gengi, sannkallaður lukkupottur fyrir þá.“ segir seðlabankastjóri.

 „NOT!!“

Já, hann er ávallt jafn orðheppinn og kíminn, seðlabankastjórinn.

Ekki neyðaraðstoð við Ísland

Krónan í öndunarvél

Seðlabankinn tilkynnti í morgun að tekist hefðu samningar við Norræna efnahagsspítalann um svokallaðan gjaldeysisskiptasamning. Samningurinn muni auka lífslíkur krónunnar til muna.

Aðspurður, segir seðlabankastjóri helst mega líkja samningnum við efnahagslega öndunarvél.

„Svona til að sauðsvartur almúgurinn skilji málið, er hér um nokkurs konar öndunarvél að ræða“ segir seðlabankastjóri. „Með tengingu íslensku krónunnar við öndunarvél má auka lífslíkurnar umtalsvert og halda sjúklingnum, krónunni, á lífi þar til ef og þegar lækning finnst.“

Hvernig virkar svo efnagahsleg öndunarél?

„Jú, sjáðu til. Anda inn og anda út, mánuði síðar. Kaup á evrum eru efnahagsleg innöndun. Að skipta þeim aftur í krónur, á sama gengi, er efnahagsleg útöndun. Sniðugt, finnst þér ekki?“ segir seðlabankastjóri að lokum.

Skiptasamningar gilda út árið

Á móti óþarfa lýðræði

Á þingi samtaka sjálfstæðismanna í kvöld hélt Björn Bjarnason, ráðherra dóms- og kirkjumála tölu.

Tjáði hann þá skoðun sína að hann legðist gegn óþarfa lýðræði, s.s. þjóðaratkvæðagreiðslum og þ.h. Betra færi á að þröngur hópur þingmanna færi með allar meiriháttar ákvarðanir.

Í ræðu sinni sagði Björn meðal annars „Ég er þeirrar skoðunar að lýðurinn hafi ekki hundsvit á evrópumálum, frekar en öðru. Því er það eindregin skoðun mín að stjórnarskrárbreytingar, sem og aðrar meiriháttar ákvarðanir, skuli fara fram í reykmettuðum bakherbergjum.“

Aðspurður hvort ekki væri æskilegt að almenningur kæmi eitthvað að málum, sagði Björn. „Æskilegt væri að almenningur vissi eitthvað um eitthvað. Svo er hinsvegar ekki. Ég hef enga lausn á því, aðra en þá góðu og gildu reglu að hafa vit fyrir honum.“

Þinginu verður framhaldið á morgun. Þá mun Davíð Oddsson m.a. flytja erindi um stýrivexti.

Á móti þjóðaratkvæðagreiðslu

Dæmdur til stjaksetningar og reytingar

Héraðsdómur Bakkatjarnar dæmdi í dag Jónatan Livingstone máv til stjaksetningar og reytingar fyrir yfirgang, hreiðurbrot og fósturát.

Jónatan réðist á heimili þeirra Svans og Svanhildar Flyvering. Hrakti þau úr hreiðri sínu og át fimm ófædd börn þeirra.

Í dómnum segir m.a. „Með verknaðinum hefur ákærði sýnt einbeyttan brotavilja og árásin var mjög óvægin.“

Jónatan mun ekki hafa ákveðið enn hvort dómnum verði áfrýjað til Eftirréttar.

Harmleikur á Bakkatjörn

Veðurfræðilegar lokanir í Reykjavík

Gatnamálastjóri hefur ákveðið að taka upp þá nýbreytni í gatnamálum borgarinnar að loka einstökum götum eftir veðurfari. Þetta segir gatnamálastjóri auka öryggi í umferðinni.

Á góðviðrisdögum, eins og í dag, mun Pósthússtræti vera lokað fyrir bílaumferð. Í sunnan strekkingi og rigningu mun Austurstræti vera lokað fyrir umferð fótgangandi. Í sunnan strekkingi, án úrkomu, mun Aðalstræti hinsvegar vera lokað hjólreiðamönnum.

Gatnamálastjóri segir þetta tilraun og að fleiri lokanir munu ekki hafa verið ákveðnar enn. Þó sé öllum borgarbúum velkomið að leggja fram tillögur. Þannig hafi til að mynda sú tillaga komið fram að loka Miklubraut til vesturs þegar alskýjað er og hægur vindur.

Pósthússtræti lokað vegna góðviðris

12 spora þing

Al-Skata, 12 spora deild Sandskötunnar, Samtaka hagsmunaaðila að hagsmunasamtökum, berst nú fyrir að Alþingi íslendinga taki upp 12 spora starf og starfi samkvæmt hinum 12 erfðavenjum Al-Skata. Stulli Jóns, talsmaður Al-Skata, segir ljóst að ástandið á Alþingi sé orðið heldur 'alkóhólískt', eins og hann tekur til orða.

„Það sér hver maður sem sjá vill, að þarna er t.d. fullt af túrafólki sem hverfur til útlanda dögum saman. Eins má líkja mætingunni við mánudagsveiki, nema hvað hún einskorðast ekki við mánudaga. Ástandið þarna er mjög slæmt“ segir Stulli.

Al-Skata fundir eru haldnir á mánudags- og fimmtudagskvöldum kl. 20, á bílaplaninu norðan við Hvalfjarðargöngin.

„Við hvetjum alla til að mæta í kvöld“ segir Stulli að lokum.

Hrópað af þingpöllum

Sökkvandi húsnæðismarkaður

Borgarstarfsmenn eru nú í óða önn að koma fyrir listaverkinu Húsnæðismarkaður á heljarþröm, í NA horni tjarnarinnar í Reykjavík. Verkið er eftir myntlistamanninn Davíð Oddsson og mun eiga að vera táknræn lýsing á stefnu Seðlabankans í stýrivaxtamálum.

Verkið verður til sýnis almenningi um helgina.

Húsi sökkt í Tjörnina

Framsóknarflokknum bjargað

Alþingi Íslands, í samvinnu við alþjóðastjórnmálaráðið hefur ákveðið að setja lög um verndun Framsóknarstofnsins. Stofninn þykir vera í útrýmingarhættu, þar eð hann telur innan við 2000 dýr.

Eftir seinustu skoðanakönnun Gallup, í Reykjavík, var Alþingi ljóst að þessi fyrrum forystustofn væri að hverfa. Því yrði að taka til hendinni.

Settur var upp kjötketill í miðborginni þar sem fjórir framsóknarmenn fengu athvarf. Hvað lansdbyggðina áhrærir var kveiktur eldur við Káraknjúka og átta Framsóknarmönnum komið þar fyrir að, skara eld að kökum.

Að þessum framkvæmdum loknum þótti nefndinni vel hafa til tekist að bjarga kjarna Framsóknarflokksins frá áhrifaleysi og glötun.

Í framhaldinu var reynt að koma sama skipulagi á annan flokk í útrýmingarhættu. Frjálslynda og óháða. Er til þeirra var leitað fékk Alþingi þau svör að þeim þætti fyrirspurnin bæði ómakleg og óviðeigandi.

Ísbirnir settir á lista yfir dýr í útrýmingarhættu