Vorboðinn ljúfi

Heimsótti mig í gær.

Er hún ekki mikið krútt?

Mótmæla lækkun olíuverðs

Nú berast fregnir af lækkun olíuverðs. Þær falla í misjafnan jarðveg. Þorri fólks virðist taka fréttunum vel, en einstaka hópar ekki.

Sandskatan, Samtök hagsmunaaðila að hagsmunasamtökum, hefur sent frá sér áskorun til ríkisstjórnarinnar að mæta þessum lækkunum með auknum álögum á eldsneyti. Í áskoruninni segir m.a. „Samtök hagsmunaaðila að hagsmunasamtökum hvetja ríkisstjórn Íslands til að bregðast við þeim óvæntu og skyndilegum lækkunum á olíu sem hafnar eru. Lækkanirnar ganga gegn hagsmunum þeirra sem eiga hagsmuna að gæta með háu olíuverði. Lækkanirnar munu kippa fótum undan mótmælastarfsemi á Íslandi, sem og að hefta íslenska löggæslu.“

Olíufélögin á Íslandi náðu að hækka eldsneytisverð í tæka tíð, í morgun, um það leiti sem fyrirhugaðar lækkanir á heimsmarkaði fóru að spyrjast út. „Við rétt náðum þessu í morgun. Kölluðum til skyndifundar í Öskjuhlíðinni“ segir Jesper Knútsson, talsmaður samráðsnefndar olíufélaganna.

Nú stendur yfir fundur í Seðlabankanum þar sem rædd eru viðbrögð bankans við þessum fregnum. Í samtali við Bergmálstíðindi, fyrir fundinn, sagði Gunnar Hannibalsson fundarmaður hjá Seðlabankanum, „Komi allar lækkanirnar til framkvæmda munu þær óhjákvæmilega hafa of snögg áhrif á afkomu heimilanna, sem er auðvitað ekki gott. Líklega munum við hækka stýrivexti.“

Olíuverð á niðurleið

Í upphafi skyldi endinn skoða

Það hefði Marc Kaplan, sælkeri í Bristol, betur gert áður en hann birti auglýsingu sína í Sunday Times.

Marc er mikill sælkeri og sérstaklega fyrir súkkulaði. Hann birti auglýsingu þar sem hann bauð konur að koma til sín að borða með sér súkkulaði.

Bergmálstíðindi náðu sambandi við Marc eftir margar tilraunir. 

„Stærstu mistökin voru að birta heimilisfang og símanúmer“ segir Marc. „Þið sjáið það sjálf. Þið náðuð ekki sambandi fyrr en eftir margar tilraunir. Það var alltaf á tali“ bætir Marc við. „Síminn hefur ekki stoppað í tvo daga og ég hef ekki getað sofið. Svo hafa tugir kvenna hreiðrað um sig við húsið mitt. Þetta er eins og á tjaldstæði.“

Blaðamaður spurði Marc hvað honum hafi gengið til með auglýsingunni.

„Ég var bara einmana eitt kvöldið og langaði í félagsskap. Mér datt í hug að auglýsa eftir súkkulaðigrís, vitandi að konur standast ekki súkkulaði. Þessu átti ég þó aldrei von á.“

Súkkulaðigrísa leitað

Er gróðureldi vonlaus atvinnugrein?

Það er von að menn spyrji sig þeirrar spurningar nú eftir nýjustu fregnir af gífurlegu tapi Gróðrastöðvar Hvaleyrar. „Það virðist ætla að verða með gróðureldi eins og fiskeldi“ segir Rúnar Geirfinnsson, framkvæmdastjóri GH. „Allt sem endar á eldi, endar eins og í eldi. Peningarnir fuðra upp“ bætir Rúnar við.

Bergmálstíðindi leituðu álits Ingimars Ögmundssonar, ráðgjafa, sem hefur sjálfur komið nálægt gróðureldi.

Aðspurður hvort hér á landi sé ekki rekstrargrundvöllur fyrir gróðureldi og þá hvers vegna, svarar Ingimar, „Nei, það er alveg ljóst að gróðureldi á Íslandi er dauðadæmt og fyrir því eru tvær megin ástæður. Fyrst og fremst er sú ástæða að Ísland er kulda- og rokrassgat og því er það hrein firra að reyna svo mikið sem að rækta einhverja jurt hér. Hin ástæðan er sú að Íslendingar kunna flestir ekki með peninga að fara og ættu að halda sig alfarið frá rekstri fyrirtækja, nema rekstrargrundvöllurinn sé tryggður. Svo sem eins og með flestan innflutning. Bíla- eða sælgætisumboð.“

Mikið tjón í gróðureldi

Bjartsýnisbílar

Nú er orkukreppa. Verð á olíu hefur allt að þvi tvöfaldast fáum á árum. Hvað hugsar fólk? Fæstir hugsa um vetni eða rafmagn. Allir þannig bílar hafa bæði ekki dregið nógu langt eða nógu hratt.

Bjartsýnisbílar eru algerlega ný og óþekkt stærð. Þeir ganga fyrir bjartsýni ökumanns. Ný s-amerísk tækni. „Of flókið fyrir íslendinga“, segir Jesus Solaris, forstöðumaður umhverfissviðs Chile. „En bjartsýni má auðveldlega virkja, Verst þið hafið svo lítið af henni.“

Skeljungur hækkar eldsneytisverð

Nýju rökstólarnir komnir í notkun

Forsætisráðuneytið fékk fjárveitingu, á gildandi fjárlögum, til kaupa nýrra rökstóla. Nýju stólarnir voru teknir í notkun í dag. Rökstólarnir sem ráðuneytið hefur notað til þessa eru frá árinu 1966. „Það var löngu kominn tími til að endurnýja rökstólana“ segir forsætisráðherra, Geir H. Haarde. „Gömlu stólarnir eru löngu orðnir rökþrota og þ.a.l. ónothæfir“ bætir Geir við.

Gömlu rökstólarnir, sem eins og áður segir eru frá árinu 1966 voru smíðaðir á Smíðaverkstæði Haraldar, sem var lýst gjaldþrota árið 1982 og hefur þeim ekki verið haldið við síðan þá. Þó hafa gömlu stólarnir skilað sínu.

„Gömlu stólarnir voru t.d. notaðir í Höfða, þegar leiðtogafundurinn stóð yfir“ segir Geir. „Hefði ekki verið fyrir þá, hefði líklega lítið komið út úr þeim fundi. Í þjóðarsáttarsamningunum, árið 1990, voru svo mörg rök sett fram úr stólunum að þeir hafa verið rökþrota síðan. Því var löngu kominn tími til að endurnýja, enda rökleysi ríkisins orðið algert.“

Nýju stólarnir voru formlega teknir í notkun í ráðherrabústaðnum í dag. Matti Vanhanen forsætisráðherra Finnlands, ásamt Geir H. Haarde forsætisráðherra Íslands, settust á rökstólana og á fimm mínútum var kominn rammi að tollaívilnnasamningi milli landanna tveggja.

Hinir nýju rökstólar munu hafa verið smíðaðir í Rúmeníu.

Ráðherrar á rökstólum

Eymd er valkostur

Þessi setning rifjaðist upp fyrir mér í dag þegar ég fékk sendan póst svo uppfullan af heift, frá manneskju sem ég taldi vera vin minn.

Vinskapur og peningar eru eldfim blanda.

Ég ætla ekki að fara ofan í það mál í smáatriðum, nema hvað ákveðin eignaskipti áttu sér stað milli okkar fyrr í vetur og hefur þróun mála á mörkuðum gert að verkum að ég telst hafa verið heppinn en þessi fyrrum vinur minn ekki.

Síðast er við vorum í sambandi, fyrir um mánuði síðan, var kært á milli okkar en nú er komið annað hljóð í strokkinn.

Allt er þetta lærdómur, eins og annað í lífinu. Maður getur ekki stjórnað tilfinningum eða viðbrögðum annarra og skyldi heldur aldrei reyna það. Ótrúlegustu hlutir, sem eru utan valdsviðs manns, geta gert mannst kærasta vin að óvini.

Maður skyldi aldrei taka neinu sem gefnu.

Uppistand á Alþingi

Það vakti mikla lukku viðstaddra í dag þegar Guðni Ágústsson grínisti tróð upp, með uppistandi. Lét hann margann brandarann fjúka ásamt kímnisögum.

„Hann er óborganlegur!“ sagði Geir H. Haarde, forsætisráðherra, með tárin í augunum. „Þvílík snilld!“

Guðni gaf ríkisstjórninni ýmis 'góð ráð', s.s. að reisa skyldi múr umhverfis landið, til að halda frá hinu ógnandi Evrópuveldi og setja heldur meiri kraft í búvörulög, höft og niðurgreiðslur.

 

Telur að ríkisstjórnin eigi að segja af sér

Uppvakningurinn Vöxtur

Í þjóðsögum Jóns Árnasonar segir af Vexti. Vöxtur var uppvakningur er olli mikilli skelfingu meðal bænda á suðurlandi í upphafi sextándu aldar. Hann mun hafa komið í skjóli nætur, laggst á og rýrt bóndans fé. Fer sögum af mörgum hungurdauðanum af hans völdum, eða eins og segir í þjóðsögunum, „Vöxtur kom um kvartil hvert og lá hans leið í bæði fjárhús og fjós. Rýrði hann þar allan pening.“

Færri vita þó að Vöxtur hefur lifað með þjóðinni eftir þetta og fram á þennan dag. Það varð að orðatiltæki að Vöxtur legðist á [bú]pening fólks, þegar rýrnun varð í stofninum. Síðar varð notkunin víðtækari og var jafnframt farið að tala um Vöxt í sambandi við peninga almennt. Vextir og verðbólga eiga nafn sitt að rekja til uppvakningsins Vaxtar.

Birni nokkrum Jónssyni tókst að ráða niðurlögum Vaxtar, við Rangá, árið 1508. Þá segir sagan að á þeirri stundu er Vöxtur var aftur rekinn til heljar hafi hann sagt við Björn, „Aftur mun ég snúa á þúsöldinni þriðju.“

Það er því skiljanlegt að menn séu óttaslegnir nú, réttum 500 árum eftir fráhvarf Vaxtar.

Verðbólgan „skelfileg"

Gas-mann í sviðsljósinu

Eins og flestum er kunnugt hefur Gas-mann verið í sviðsljósinu undanfarið. Hver er Gas-mann? Blaðamaður Bergmálstíðinda hitti hann, í myndatöku með hljómsveit sinni, um helgina.

„Ég er bara gúddí gæi“ svarar Gas-mann, spurningu Bergmálstíðinda. Eins og áður segir hefur Gas-mann verið mikið í sviðsljósinu undanfarið. Gas-mann starfar sem lögregluþjónn, en hefur þann aukastarfa að skemmta landanum.

„Já, ég er að skemmta, milli þess sem ég sinni löggæslustarfinu“ segir Gas-mann. Aðspurður hvort auðvelt sé að samræma þessi tvö störf. „Það getur verið pínu strembið stundum. Sérstaklega þar sem lögreglustarfið er vaktavinna. Ég á hinsvegar svo eðal vinnufélaga að það hefur aldrei verið vandamál að svissa vöktum, ef þannig stendur á“ bætir Gas-mann við. „Þetta er miklu meira gaman, en erfitt. Gasalega gaman“ segir Gas-mann, sposkur á svip.

Rétt aðferð við beitingu piparúða