Fíkniefnafundur á Seyðisfirði

Landsamtök aðila að fíkniefnasölu, LAF, settu landsfund sinn í félagsheimili Seyðisfjarðar í gær. Fundurinn er vel sóttur. Saman koma þar helstu innflytjendur og dreifingaraðilar. Gestafyrirlesarar koma bæði frá tollgæslu og lögreglu. Fíkniefnahundurinn Kolur hélt áhugaverðan fyrirlestur um greiningu fíkniefnalyktar í gær. Landsfundurinn stendur fram á sunnudag. Þá verður honum slitið á táknrænan hátt, með að feit jóna verður látin ganga milli þingfulltrúa.

Fíkniefnafundur á Seyðisfirði

WTC 7

Ég er ekki mikill samsæriskenningamaður. Það má sjá svik, pretti og vínarbrauð í öllu sé nægur vilji fyrir hendi.

Hins vegar hefur mér fundist einkennilegt þetta með WTC7. Annarsvegar má sjá myndir á youtube, sem ég nenni ekki að finna og setja inn hér (leitið að wtc 7) sem sýna margar litlar sprengingar og hrun byggingarinnar inn á við (að miðju) rétt eins og þegar byggingar eru felldar. Svo er hitt, hvernig fréttamaður BBC gat hafa tilkynnt um hrun byggingarinnar 20 mínútum áður en hún hrundi.

Ráðgátan leyst

Talað með rassgatinu

Var að spökúlera aðeins í þættinum hans Stormskers, hvar hann talaði við Guðna Ágústsson, sem býr í Selfossborg.

Tek nánari púls á því síðar, en ég hjó eftir að maðurinn [Guðni] talaði sérkennilega að mér fannst. Ekki að röddin væri öðruvísi, heldur meira hvað kom út úr honum. Varðandi landbúnað þá sérstaklega.

Ég er t.d. ekki að fatta hvernig Nýsjálenskt kjöt, 50% ódýrara en íslenskt, getur verið dýrara fyrir almenning

Hver er að tala með rassgatinu?

Ákveðnir sjálfstæðismenn

Sem óbreyttur alþýðumaður, þykir mér afar gott til þess að hugsa hve stjórn ríkis vors og höfuðhrepps er ákveðin. Af aðdáunarverðri ákveðni ganga menn mót framtíðinni. Af einurð og festu.

Í vor tjáði formaður sjálfstæðismanna sig um ákveðni. Þá í sambandi við mistök. Talaði hann um ákveðin mistök.

Nú stígur óskabarnið fram. Óskabarnið sem stefnir heilshugar á Cand. Mag. í borgarmálefnum, okkur alþýðunni til vegsauka. Vitanlega látum við mann sem færir oss slíka fórn, ekki lepja dauðann úr skel Lánasjóðsins. Nei, þannig launar maður veljörðarmönnum sínum ekki. Reyndar tel ég víst að þannig hugsi fólk heldur ekki. Slíkt er misskilningur. Já, eins og gulldrengurinn okkar nefnir það á sinn sjálfstæðislega hátt, ákveðinn misskilningur.

Gísli Marteinn: Ákveðinn misskilningur í gangi

Slátranir og svik

Óli telur sig hafa verið svikinn. Hann segir margan Júdasinn leynast innan Sjálfstæðisflokksins. Oddviti Samfylkingar tekur dýpra í árinni. Hann segir þetta vera mestu svik á sögulegum tíma og Júdas blikni í samanburðinum.

Heimildarmaður segir þetta vera eðlilegt, enda sé sláttur í fullum gangi á þessum tíma árs.

Á borgarstjórnarfundi í morgun mættu ungliðar stjórnmálaflokkanna til að mótmæla eða sýna stuðning.

Fyrir utan Ráðhúsið sátu nokkrir ungliðar og léku samkvæmisleiki.

Hér eru ungliðar að setjast eftir að tónlistin hefur verið stöðvuð.

Fyrir innan sátu ungliðar meirihlutaflokanna, sem þóttu hvorki margir né ungir.

Svik, lygi og pólitísk slátrun

Oft veltir lítil þúfa...

Fartölvur eru orðnar býsna algengar á heimilum landsmanna. Ekki eins og fyrir fáum árum, er það voru helst þeir sem þurftu starfs síns vegna að nota fartölvur sem notuðu slík tól. Almenningur notaðist aðallega við borð- og turntölvur. Nú er semsagt öldin allt önnur.

Fartölvur eru þægilegri. Þær má hafa með sér í sófann, upp í rúm, eða bara hvert sem er. Munur að geta bara fært sig um set þegar hentar, á þráðlausu neti.

Einn ókost hafa þær þó umfram stóru borð- og turnvélarnar. Þær eru viðkvæmari fyrir ryki. Það liggur við að tölvurnar í stóru borð- og turnkössunum geti safnað heilum haug af ryki áður en það fer alvarlega að bitna á örgjörvakælingunni. Loftflæðið í kassanum er yfirleitt það gott. Annað er uppi á teningnum með fartölvurnar. Í þeim er öllu þjappað saman og litlu plássi sóað fyrir loftflæði.

Ég fékk mér fartölvu seinasta haust. Hljóðlát og góð. Ég hef m.a. notað hana til að fremja tónlist og þannig bardúsi tilheyrir gjarnan að taka upp söng. Þá skiptir máli að hafa hjóðláta tölvu, sé hljóðneminn staðsettur í ekki nema metra fjarlægð frá tölvunni. 

Í upphafi setti ég inn á tölvuna þau forrit sem ég nota en síðan hefur litlu verið bætt inn. Þó hef ég tekið eftir að hávaði frá henni hefur ágerst seinustu vikur. Í gær var ég að reyna að taka upp söng en það var gersamlega ófært. Það var eins og teppahreinsivél væri í gangi.

Það var kominn tími á að hreinsa hana.

Málið með fartölvur er að þar sem loftflæðið inni í þeim er svo takmarkað þarf afskaplega lítið til að teppa það. Afleiðingin er sú að til að ná þeirri kælingu sem nauðsynleg er verður viftan að snúast hraðar, með tilheyrandi hávaða.

Ég opnaði því mína áðan og blés úr henni rykið. Ég klikkaði reyndar á að smella mynd af henni opinni, til að sýna hvernig útlits er innan í, en það var ekki mikið ryk sem þurfti til að teppa loftúttakið.

Varla getur þetta kallast mikið ryk, á alþjóðamælikvarða.

Reyndar hefur rykhnoðrinn eilítið þjappast saman í mínum meðförum, en hann dugði til að leggjast yfir ristina við lofttútakið, þar sem rykið náði ekki gegn um hana heldur safnaðist fyrir og teppti loftflæðið.

Svona lítur lofttúttakið út utanfrá. Koparristin fyrir innan er hluti af kælikerfinu og innan á hana safnaðist rykið.

Semsagt. Sé fartölvan ykkar orðin helst til hávaðasöm, er bara að opna hana. Það er lok undir sem er losað. Síðan er blásið utanfrá og rykið þyrlast út um opið þar sem lokið var. Svo er lokið sett á aftur og tölvan er hljóðlát sem aldrei fyrr.

Þessi pistill er skrifaður í algeru hljóði og kyrrð.

Kílóið af súpukjöti hækkaði í dag...

...söng Spilverkið í den.

Sú var tíðin að vöruverð var ákvarðað af miðstýrðu apparati, Verðlagsráði. Þær eru ófáar hlýlegar bernskuminningarnar. Hvar maður slafraði í sig súpu í hádeginu, heyrandi Jón Múla í útvarpinu segjandi frá nýjustu ákvörðunum Verðlagsráðs. Kílóið af ýsu kostar þetta, mjólkurpotturinn hitt og bensínlítrinn eitthvað allt annað.

Já, þá voru ekki eiginhagsmunapotandi greifar sem ákvörðuðu eldsneytisverðið, á leynifundum í Öskjuhlíð. Nei. Slíkt var ákveðið af fulltrúum ríkisins, yfir vínarbrauðum og snittum.

Ég veit ekki til að þjónustulipurð starfsfólks á bensínstöðvum hafi verið síðri í þá tíð. Eiginlega bara alls ekki. Þá einbeitti það sér að þjónustu tengda bifreiðum; afgreiðslu eldsneytis, mótorolíu og þ.h. í stað þess að þjónusta bennsínstöðva í dag tengist meira pulsu- og nammisölu en eldsneytissölu. Bætt þjónusta getur því engan veginn réttlætt aukna álagningu á eldsneyti. Einungis græðgi og fákeppni getur skýrt hana.

Hvað hefur þá verið unnið með öllu frjálsræðinu og samkeppninni, sem er alls engin samkeppni?

Hvort er verra, skynsamleg miðstýring eða misnotkun frjálsræðis?

Er ekki bara tími til kominn að endurvekja Verðlagsráð?

Eldsneyti lækkar

Lotterí er lífið - lífið er lotterí

Ég man ekki eftir að hafa séð, hingað til, uppgefið hverjir vinna í lottói. Einungis að einstæð 2ja barna móðir, eða hjón með 4 börn hafi unnið. Eitthvað í þeim dúr. Ekki að nöfn vinningshafa séu gefin upp. Ég álykta þó af þessu að þegar fréttamenn leiti til Íslanskrar getspár sé haft samband við vinningshafa(na) sem síðan ákveði hvort þeir vilji koma fram eða ekki.

Mér sýnist hér vera yfirvegað fólk á ferð sem fari skynsamlega með sitt fé og muni áreiðanlega ekki missa sig í einhverja vitleysuna. Þó er hætt við að skyndilega dúkki upp gamlir vinir og kunningjar, hin ótrúlegustu félagasamtök ásamt öðrum afætum. Ég vona þó að þau sjái gegn um allt slíkt.

Lífið er lotterí, var sungið um árið. Greinilegt er að einnig getur lotterí verið lífið

Ég óska hjónunum hamingju og farsældar.

Milljónamæringar í Fellunum

Pabbi minn er miklu sterkari en pabbi þinn

Condoleezza Rice, utanríkisráðherra Bandaríkjanna, sagði í kvöld að Rússar ættu bara að passa sig. Þeir skyldi halda sig á mottu. Henni var mjög heitt í hamsi og nefndi föður sinn í því sambandi.

Rússar eru mjög uggandi, enda faðir hennar fyrrum leðjuglímumeistari.

Bergmálstíðindi hafa fyrir því nokkuð öruggar heimildir að Rússar hafi skotið á neyðarfundi þar sem hótanir utanríkisráðherra BNA hafi verið ræddar. Igor Lukachev, bráðabirgðaráðherra Rússa í milliríkjaráðuneytinu mun hafa tryggt aðild móðurmróður síns að málinu. Sá er enginn annar en fyrrum ólympíumeistari í hártogun, árið 1964.

Munu ekki líða nýtt járntjald

Samnorrænt skilningsleysi

Danski ráðherrann Try Harder telur að hinum andlausa botni norrænnar menningargeldingar, eins og hann kallar það, sé nú náð. Fyrr í vetur bárust fréttir af dönsku skilningsleysi, en nú virðist sem skilningsleysið sé mun umfangsmeira og almennara.

Nú er svo komið að á fundum Norðurlandaráðs situr fólk og þegir.

„Við höfum reynt esperanto og táknmál. Eiginlega allt nema ensku“ segir Try. „Reyndar geta hinar þjóðirnar reddað sér á einhverskonar norrænu samsulli, en við danir skiljum það ekki og þeir ekki okkur. Ég vildi óska að danir hefði fengið að velja á undan öpunum“ segir Try og vísar þar til sköpunarsögunnar. Sagan segir frá því er almættið úthlutaði tungumálum til dýra og manna. Einungis apar og danir áttu eftir að velja og aparnir fengu að velja á undan.

Skandínavísk ungmenni skilja ekki hvert annað