Enduruppsetning fyrstu forsetatölvunnar lokið

Ólafur Ragnar Grímsson, forseti Íslands, mun á morgun taka á móti forsetatölvu frú Vigdísar Finnbogadóttur, sem nýlega hefur verið enduruppsett. Tölvan er i486 vél af gerðinni Packard Bell, frá árinu 1994.

Tölvan var gjöf þáverandi Bandaríkjaforseta, Bill Clinton, til frú Vigdísar. Tölvan er eign Þjóðminjasafns Íslands en mun verða geymd á Bessastöðum og notuð við hátíðleg tilefni.

Tölvan mun verða til sýnis á Bessastöðum klukkan 15 á sunnudag. Við það tækifæri mun jafnframt hópur félaga í Tölvunördaklúbbi Íslands heimsækja Bessastaði með gömlu tölvurnar sínar.

Tölvan er með Intel 486sx örgjörva og með 4MB minni, 512MB disk, 1MB skjákort, 14" SVGA skjá og innbyggðu 14.4Kbps mótaldi. Hún keyrir Windows 3.1 og er hlaðin forritum, ss Netscape 1.0 og Norton Disk Doctor.

Endurgerð fyrsta forsetabílsins lokið

Gengur dæmið upp?

Er hægt að fara inn á 780.000 vefsíður á 9 mánuðum, á vinnutíma? Fræðilega er það líklega hægt, en varla raunhæft.

Nú veit ég reyndar ekki hvernig vinnutíma Japana er háttað. Hve marga tíma á dag þeir vinna eða hve marga daga vikunnar. Gefum okkur, í gamni, að maðurinn hafi unnið alla daga, 10 tíma á dag. Til að einfalda dæmið segjum við að hver mánuður séu 30 dagar.

Þá eru 9 mánuðir = 270 dagar. 780.000 síður á 270 dögum eru 2.889 síður á dag. 2.889 síður á dag gera þá 289 síður á klukkustund, á 10 tíma vinnudegi, sem gera aftur 4,8 síður á mínútu. Síða á 12,5 sekúndna fresti.

Gerum við ráð fyrir að maðurinn hafi eytt tíma í að skoða síðurnar, en ekki bara flett og flett, hefur hann ekki bara haft lítið að gera í vinnunni. Hann getur ekki hafa gert nokkurn skapaðan hlut. Reyndar hlýtur hann að hafa þurft að vinna mikla yfirvinnu til að ná þessum 780.000 síðum á 9 mánuðum.

Horfði 780 þúsund sinnum á klám í vinnunni

Skák og mát

Forseti Skáksambandsins, Guðríður L. Geirsdóttir, hefur tilkynnt afsögn sína. Í tilkynningu sem hún gaf út í morgun segir hún orsök afsagnar sinnar vera heimaskítsmát gegn Benetict XVI páfa.

„Það er ljóst að forseti þarf að eiga í fullu té við páfann. Að tefla við hann er nokkuð sem allir eiga að kunna. Þegar ég þarf að láta í minni pokann þar, þykir mér tímabært að víkja“ segir Guðríður.

Nú fer í gang undirbúningur kosninga um eftirmann Guðríðar og búast má við spennandi kosningum. „Já, hraði og spenna er nokkuð sem einkennir skákina“ segir Guðríður. „það verður eflaust hamagangur í öskjunni í kosningunum. Ekki síður en við skákborðið.“

Þess má geta, í framhjáhlaupi, að páfi beytti indverskri vörn í skák sinni við Guðríði.

Guðfríður Lilja lætur af embætti forseta Skáksambandsins

Ó-hefðbundnar lækningar

Það kemur ekki á óvart, sú þróun að bakteríur verði sífellt ónæmari fyrir sýklalyfjum. Frá því maðurinn uppgötvaði sýklalyfin hafa þau verið einhverskonar allsherjarredding við hverskonar bakteríusýkingum. Nú er ég ekki að mæla gegn sýklalyfjum. Vitanlega eru tilfelli þar sem sýking er það alvarleg að sýnt er að sjúklingurinn sjálfur, eða ónæmiskerfi hans, nái ekki að vinna bug á henni án inngrips. Inntaka sýklalyfs er inngrip í baráttu ónæmiskerfisins við vágestinn. Þar er tekið fram fyrir hendurnar á líkamanum sjálfum að yfirbuga innrásarliðið og í leiðinni að styrkja ónæmiskerfi sitt.

Ég held að lyftingakappi myndi seint bæta eigin árangur fengi hann aldrei að taka á lóðunum sjálfur heldur mættu alltaf aðstoðarmenn sem lyftu fyrir hann.

Þetta leiðir huga minn einnig að svokölluðum 'óhefðbundnum' lækningum, sem í raun eru mun hefðbundnari en hin viðurkenndu vestrænu læknavísindi. A.m.k. hafa þannig lækningar verið stundaðar mun lengur. Það má samt hinsvegar varla nefna slíkt á nafn án þess að hinir 'beturvitandi' fræðingar ésúi sig í bak og fyrir og froðufelli. Hvers vegna? Jú, vegna þess að í margar eða flestar hinna 'hefðbundinna' lækninga hafa ekki verið vísindalega staðfestar. Þ.e.a.s. að menn hafa ekki getað sýnt fram á að það sé nákvæmlega 'þetta' eða 'hitt' sem orsaki lækninguna, enda ekki hagsmunir þeirra sem fjármagnið hafa að fá fram sannanir í þeim efnum. Jafnvel þótt sýnt sé að sjúklingar læknist þá geta menn, í ljósi þess að sönnun liggi ekki fyrir, véfengt árangurinn. Sagt hann til kominn vegna þess að sjúklingurinn trúði á meðalið, en ekki að meðalið sjálft hefði læknað.

En skiptir það öllu máli? Ef ég eða barnið mitt veiktist og fengi lækningu, væri mér svo gersamlega sama hvað olli henni. Lækningin er það sem máli skiptir. Varla færi ég að bölsótast yfir henni, vegna þess hún væri ósönnuð?

Ég er hvorki sérfræðingur í læknavísindum, né 'óhefðbundnum' lækningum. Ég veit þó að heitið 'óhefðbundnar' lækningar er notað yfir allt annað en þær vestrænu og svo mjög vísindalegu. Allt frá andakukli til hómópatíu. Þó er þar himinn og haf á milli. Ég veit t.d. að hómópatía miðar að því að virkja ónæmiskerfi líkamans til að berjast sjálft við sjúkleikann, en ekki að vera inngrip. Ég hef líka orðið vitni af of mörgum kraftaverkum hómópatíunnar til að ég geti bara afneitað henni vegna þess það vanti sannanir. N.B. er ég ekki hómópati sjálfur.

Hugtakið 'black box' er víða notað um eitthvern hlut, forrit eða tæki t.d., sem fær eitthvað inntak og skilar einhverju út, án þess að liggi fyrir hvað gerist inni í því. Þannig kýs ég að líta á lækningar. Mér er gersamlega sama hvað gerist í lækningaferlinu, eða af hverju það virkar. Meðan inntakið er sjúkleiki og úttakið heilbrigði er ég sáttur. Er það ekki það sem málið ætti að snúast um? Árangur.

Þróun ónæmis gegn sýklalyfjum hafin hér

Framsóknarstofninn að braggast

Þjóðarpúls Gallup var birtur í dag. Samkvæmt honum dalar fylgi ríkisstjórnarflokkanna, fylgi Frjálslynda flokksins stendur í stað en fylgi annarra flokka eykst.

„Þessar tölur eru eins og við má búast, í ólgunni undanfarið“ segir forsætisráðherra, sem ekki vill gera mikið úr þessum tölum.

Það sem mest þykir koma á óvart er að framsóknarflokkurinn skuli enn vera til. Eins og fólki er í fersku minni var sá  flokkur talinn hafa dáið út. Stofninn mun þó hafa náð sér furðanlega vel.

Fylgi við Samfylkingu og ríkisstjórn minnkar

Lúðrasveitin Ómar

Í dag heldur lúðrasveitin Ómar sína árlegu tónleika. Tónleikarnir eru að þessu sinni haldnir á Arnarhóli og hófust þeir klukkan 14.

Á dagskrá tónleikanna eru verk eins og Básúnukvartett Bachs, Einleikur fyrir túpu nr. 4 eftir Brahms og slagverksverkið Bumba og Symball eftir Ketil Sveinsson.

Lögreglan segir allt hafa farið vel fram, að mestu. Þrátt fyrir að í dag sé dagur mótmæla hafi lítið verið mótmælt.

„Það komu upp tvö atvik. Kona henti inniskóm í stjórnanda sveitarinnar, af svölum húss í grenndinni og ungur maður lagði vörubíl sínum á hólnum. Hann mun hinsvegar hafa talið hér væri fólk samankomið að mótmæla háu verði á frostlegi. Hann hefur þegar fært bíl sinn“ segir Ólafur Óliversson, lögregluvarðstjóri.

Lúðrasveitahljómur ómar

Hvernig getur svona gerst?

Ég var að skoða erlendan fréttavef þar sem fjallað er um hið ömurlega mál sem upp kom í Austurríki fyrir fáeinum dögum, þar sem maður hélt dóttur sinni fanginni í 24 ár og gat henni 7 börn. Ekki er langt um liðið síðan annað mál kom upp í Austurríki. Þar hafði 18 ára stúlka sloppið undan manni sem hélt henni í prísund í 8 ár.

Hvernig stendur á að svona hlutir geti gerst? Fólki haldið í fangelsi árum saman án þess að nokkurn gruni neitt?

Þetta er allt of sorglegt til að hafa í flimtingum, en ég spyr mig þó þeirrar spurningar hvort Austurríska lögreglan sé að standa sig. Er ekki kominn tími til að skipta út lögregluhundinum Rex og fara að vinna vinnuna sína?

Þetta er óheyrilega sorglegt.

Mikill hægðarauki

Segir Heimir Sigfinnsson, oddviti, um þá ákvörðun að setja niður rotþró í eynni.

„Þetta mun hafa miklar og góðar breytingar í för með sér fyrir okkur eyjaskeggja“ segir Heimir. „Hér hafa engin vatnssalerni verið hingað til og mun nýja rotþróin marka kaflaskipti í salernasögu eyjarinnar.“

Vegna sjávarstrauma umhverfis eyna hefur ekki þótt þorandi að dæla úrgangi í sjóinn við Flatey. Þess vegna hafa eyjaskeggjar þurft að notast eingöngu við kamra hingað til.

„Þetta verður allt annað líf og mikill hægðarauki fyrir okkur“ segir Heimir.

Tímamót fyrir Flateyinga

Strunzað í dag

Samtök strunsandi kvenna mun standa fyrir strunzgöngu í dag, í tilefni baráttudags verkalýðsins. Strunzað verður frá heilbrigðisráðuneytinu og upp á hlemm. Strunzgangan hefst klukkan 14.

 

 

Félagskonur á æfingu í morgun.

Allra vilji að leysa málið

Sest í hinn helga stein

Það mun verða mikið um dýrðir þegar Bjarni Búason búálfur mun setjast í hinn helga stein við Álfhólsveg í Kópavogi, síðar í dag.

Bjarni, sem á ættir að rekja í steininn, hefur alla sína tíð búið meðal manna.

„Móðir mín, í kví kví, fluttist brott úr steininum ung að aldri“ segir Bjarni. „Hún var í ástandinu. Það vita ekki allir að álfamær stóðu ekki síður í því en mennskar konur, enda fylgdu hermönnunum margir álfar.“

Móðurfjölskylda Bjarna mun taka á móti honum. Móðir hans lést fyrir fimmtán árum. Faðir Bjarna, sem var Bandarískur garðálfur, lést árið 1979. Föðurfjölskylda hans átti ekki heimangengt í dag.

„Nú er ég orðinn gamall og langar að eyða ævikvöldinu meðal míns álfafólks“ segir Bjarni að lokum.

Bjarni sest í helgan stein