Íbúfenfundur um mistæk gatnamót

Bergmálað úr borunni #17

Fyrr í kvöld var haldinn íbúfenfundur um mistæk gatnamót Kringlumýrar- og Miklubrautar.

Á fundinum töluðu þeir Gísli Marteinn Baldursson, Hilmar Sigurðsson og Baldvin Einarsson.

Þeir voru sammála um að íbúfenneysla og akstur um téð gatnamót ættu litla samleið. Hilmar áréttaði vilja íbúa hlíða, holta og norðurmýrar þess efnis að íbúfenneysla yrði bönnuð með öllu milli Lönguhlíðar og Háaleitisbrautar annarsvegar og Bústaðavegs og Háaleitisbrautar/Skipholts hinsvegar. Ennfremur áréttaði Gísli að borgin myndi leggjast alfarið á móti dreyfingu íbúfens við umrædd gatnamót. Baldvin, sem kemur að málinu sem fagaðili, segist telja árangursríkara að beina neyslunni í ríkari mæli í magnyl.

Um gatnamótin sjálf segir Gísli þau vera mistök frá A til Ö. „Það væri miklu frekar að grafa þar síki og notast við gondóla en að standa í þessu bílastappi alltaf hreint.“ sagði Gísli að lokum.

Fjölmenni á íbúafundi um mislæg gatnamót

Neyðarrusl

Bergmálað úr borunni #16

Það gerðist í morgun að Landgelgisgæslunni barst tilkynning um að neyðarsendir gæfi frá sér merki á Snæfellsnesi. Þrátt fyrir að þekkja þá staðreynd að nesið sjálft, Snæfellsnes, tilheyrði landssvæði fremur en sjó var þó ákveðið að kalla út þyrlu og hefja leit. Enda gæti verið um að ræða sjómenn í neyð uppi á jökli. Eftir um tveggja tíma leit fannst sendirinn við ruslagám á Rifi.

Guðbrandur Greipsson, bóndi á Þúfu, rétt utan Rifs, segist hafa staðið að veðurrannsóknum undanfarið og sendirinn hafi verið hluti þess.

„Já ég er svona að dedúa við veðurrannsónkir. Það er mitt hobbý“ sagði Guðbrandur í samtali við blaðamann Bergmálstíðinda. „Ég fékk þennan sendi gefins úr aflóga gúmmíbát úr Herborgu GK 50“ bætir hann við. „Þetta er sendir af Sarbe tegund og ég hafði ekki græna glóru um að hann myndi drífa svona langt. Enda er hann Franskur, sjáðu“ segir Guðbrandur.

Guðbrandur hefur unnið að veðurathugunum á Rifi og hefur m.a. komið sér upp eigin veðurathugunarstöð.

„Mér þykir leitt að hafa staðið að öllu þessu veseni, en sendirinn hefur bara allt í einu farið að virka eftir að hafa ekki virkað hjá mér í tvo mánuði. Ég henti honum í ruslið fyrir um viku síðan“

Bergmálstíðindi vilja, í ljósi þessa, koma á framfæri við sauðsvartan almúgann að vera ekki að standa í einhverju sem hann hefur ekki hundsvit á. Hann kaupi bara lottó og horfi á Bandið hans Bubba.

Neyðarsendir á ruslahaugi

Sviffriðryk

Bergmálað úr borunni #15

Mikið virðist vera um svifryk þessa dagana í borginni. Fyrir 25 árum var ekki eins mikið um svifryk hér, en þeim mun meira um Friðryk. Friðryk mun hafa komist í bíómynd og hvað eina. Því er ekki að leyna að Friðryksmengunin hafi orðið all skæð upp úr 1981. Reyndar hægðist um eftir 1983 en nú, 25 árum síðar mun þessi óværa hafa snúið aftur, í ögn breyttri mynd. Í formi svifryks.

 

Svifryk yfir mörkum í dag

Hólmfríður Júlíusdóttir

Bergmálað úr borunni #14

„Það er búið að vera hasar í dag,“ segir Hólmfríður Júlíusdóttir, þjónustustjóri þjónustuveri Icelandair.

Í dag hóf Icelandair að bjóða félögum Vildarklúbbsins flugferðir á hálfvirði. Um er að ræða ferðir til valinna áfangastaða í Evrópu, s.s. Kärnten í Austurríki, Györ í Ungverjalandi, Pforzheim í Þýskalandi og Sliven í Búlgaríu.

Hólmfríður segir símalínurnar hreinlega hafa rauðglóað í allan dag og hefur hún, ásamt starfsfólki sínu, haft nóg að gera við að taka móti pöntunum og fyrirspurnum.

Hólmfríður er löngu landsþekkt fyrir dugnað og áræðni. Enda ekki að ástæðulausu að til hennar var eitt sinn samið lag.

Mikið álag og mikill hasar

Brottkast fylgifiska. Framtíð fiskveiða

Bergmálað úr borunni #13

Guðjón A. Kristjánsson lýsti í dag áhyggjum sínum yfir auknu brottkasti við fiskveiðar.

„Ég fæ hringingar í eyrað um að menn séu farnir að velja harkalega úr þorskaflanum sem er auðvitað fylgifiskur þess þegar heimildirnar eru svo litlar að menn sjá ekki framtíð sinni borgið við veiðarnar.“ sagði Guðjón meðal annars.

Einar K. Guðfinnsson, sjávarútvegsráðherra, telur það einmitt vera merg málsins sem Guðjón nefndi í ræðu sinni. Að menn kasti úr aflanum vegna aukins hlutfalls fylgifiska. Nú séu fylgifiskar alfriðaðir og því sé þeim varpað fyrir borð. Vissulega sé þetta erfið staða, því ekki sé hægt að meina fylgifiskum að fara í netin og enginn vilji heldur vera settur í steininn fyrir að koma með fylgifisk að landi.

Guðjón telur ástandið ekki geta varað lengur og leggur til að fiskveiðar verði alfarið lagðar af við Íslandsstrendur. Hann telur athugandi að þjóðnýta flotann, með manni og mús og byggja hér upp öfluga ferðaþjónustu, m.a. í formi fiskskoðunarferða ýmiskonar.

Segir brottkast að aukast gífurlega

Yfirlýsing um afslátt og álagningu á olíu

Bergmálað úr borunni #12

Bergmálstíðindum hafa borist eftirfarandi yfirlýsing frá Olíuveldi Íslands hf.

„Olíuveldi Íslands hf. vísar á bug þeim aðdróttunum að veldið stundi álagninga- og afstáttasvindl. Það er ekki rétt að sami afsláttur hafi verið veittur af öllum. Sumir ónafngreindir aðilar gefa prósentuafslátt meðan aðrir ónafngreindir veiti afslátt í krónum talið. Að krónutala reiknuð út frá prósentuhlutfalli afsláttar reynist vera hin sama og föst afsláttarkrónutala annarra, eða að föst krónutala reiknuð yfir í prósentuhlutfall reynist nákvæmlega sama hlutfall og aðrir veiti í afslátt, er hrein tilviljun.

Að auki skal leiðréttur sá grundvallarmisskilningur að álagning sé prósentu- eða krónuálagning. Álagning er í raun útfærð sem eins konar skattur eða afföll, er kallast snuðunarkerfi. Þ.e.a.s. að álagning eins og gjarnan tíðkast hér á landi er útfærð á þann hátt að fyrir hvern lítra af olíu sem keyptur er, fæst aðeins hálfur lítri afgreiddur.“

Athugasemd frá Olís

„Alveg klárlega hagsmunaárás“

Bergmálað úr borunni #11

„Þetta er alveg klárlega hagsmunaárás“ segir formaður hinna nýstofnaðra Samtaka hagsmunaaðila að hagsmunasamtökum, Stulli Jóns. „Það er alveg klárt mál að þetta er bein aðför að því fólki sem kýs að þvælast fyrir og þeyta sínar flautur“ bætir hann við.

Eins og flestir sjálfsagt vita hefur verið í umræðunni að hagsmunaaðilar stefni að aukinni flautustarfsemi og fyrirþvælingi á næstunni, en nýlegar verðhækkanir gætu sett strik í þær fyrirætlanir.

„Hey! Sko. Eins og allir vita sem þekkja varmalögmálið, verður ekkert til úr engu“ segir Stulli. „Þegar ég þeyti mína flautu þarf ég raforku. Hvaðan kemur hún? Jú, á endanum er hún búin til af bílvélinni, knúinni af olíu. Gettitt?“ bætir hann við og er bersýnilega heitt í hamsi. „Dýrari olía samasem dýrara flaut og að auki verður dýrara að lullast um bæinn.“

Það er ljóst að hagsmunaaðilar hafa ekki sagt sitt síðasta orð í þessu máli, enda miklir hagsmunir í húfi.

Eldsneyti hækkar í verði

Hrefnuveiðar um helgina

Bergmálað úr borunni #10

Hrefnuveiðimenn, félagsskapur fjögurra vina úr Grafarvogi, eru byrjaðir að undirbúa veiðar. Blaðamaður 24stunda náði tali af einum þeirra, honum Gunnari. Aðspurður segir Gunnar þetta vera félagsskap gamalla vina úr Rimaskólanum sem allir eigi það sameiginlegt að hrífast af stelpum er beri nafnið Hrefna. „Til dæmis er ég rosa hott fyrir Hrefnu Ólafs, úr Mosó og Palli er alveg slefandi yfir Hrefnu Dögg, úr Garðabænum“ segir Gunnar.

Gunnar segir undirbúning veiðanna hafa staðið yfir í einhverja daga. „Við erum búnir að vera að SMS-ast og tjatta á MSN og sonna. Þær segjast ætla á djammið um helgina og buðu okkur að koma og hitta sig.“

Félagarnir hafa nýtt tímann vel og hafa keypt ný föt fyrir veiðarnar. „Já, við vorum rosa heppnir. Náðum að versla hjá Andrési í tæka tíð. Nú er sú búð að loka“ segir Gunnar, glaður í bragði.

Hrefnuveiðimenn undirbúa veiðar

XVI pápinn

Bergmálað úr borunni #9

Það vakti mikla kátínu viðstaddra þegar Benedikt XVI páfi hitti óvænt fjarskyldan ættingja, við heimsókn sína að höfuðstöðvum NASA í Houston. Þar hitti hann fyrir B108XSD500LXVI, sem er afkomandi D452ZA21XVI er brotlenti í Roswell um árið, eins og frægt er orðið. Eins og frægt varð á sínum tíma kynntist D452ZA21XVI hinni ítölsku Isabel Gnocchi, sem er móðursystir Benedikts XVI páfa. Áttu þau saman tvö börn, þau LFT5A211XVI og títtnefndan B108XSD500LXVI, sem Benedikt hitti á ferð sinni. Eins og áður sagði var um mikla fagnaðarfundi að ræða og átu þeir frændur saman Napólíböku ásamt ólífum frá Tosca. Benedikt, sem alla jafna kallast Benni Bond, segist vilja halda í hefðirnar og hefur því haldið þremur seinustu stöfum ættarnafnsins, sem eru XVI.

Páfi kominn til Bandaríkjanna

Samtök hagsmunaaðila að hagsmunasamtökum

Bergmálað úr borunni #8

Nú er ljóst að hópur fólks sem hagsmuni á að gæta hvað varðar mótmæli og umferðarteppur ætlar að stofna með sér samtök. Hagsmunasamtök. Samkvæmt heimildum mínum, innan þeirra raða, mun vera um að ræða einskonar regnhlífarsamtök. Hagsmunagæslusamtök þeirra sem hagsmuna eiga að gæta hvað varðar hagsmuni hagsmunaaðila. Samtökin munu kallast Samtök hagsmunaaðila að hagsmunasamtökum. Ekki ólik Samtökum aðila að aðildarsamtökum, nema hvað áherslunar verða örlíðið öðruvísi. Áherslurnar muni snúa að hagsmunum fremur en aðild. Að öðru leiti er um svipað rekstrarform að ræða. Sameiginlegan kjötketil félagsmanna þar sem hver og einn getur skarað eld að kökum og kjötbitum. Þetta er vel þekkt rekstrarform sem gefist hefur vel ýmsum félögum gegn um tíðina. Formlegum sem óformlegum, sem eiga það sameiginlegt að byggja á sameiginlegri aðild, hagsmunum, eða fjölskyldutengslum. Má þar nefna Kolkrabbann, Smokkfiskinn og Bananabræður, svo fátt eitt sé nefnt.

Sem formaður Samtaka aðila að aðildarsamtökum vil ég óska þessum systursamtökum velfarnaðar í sinni hagsmunagæslu.

Stofna hagsmunasamtök